مسئلہ فلسطین عالمی ضابطہ حیات کے پس منظر میں

دوسری جنگ عظیم کے بعد جب اقوام متحدہ کا قیام عمل میں آیا اور یہاں کے حالات پرسکون بنانے کے لیے کوشش ہوئی ، تو۱۹۴۷ء؁ میں یہ طے پایا کہ ایک حصہ پر یہودی ریاست بن جائے اوردوسرےحصے پر فلسطین قائم ہوجائے، جس میں دریائے اردن کا مغربی کنارہ اور غزہ شامل ہو ، اور یروشلم کو بین الاقوامی شہر تسلیم کرلیا جائے ۔ اس طرح آنا فانا اسرائیل کے قیام کا اعلان ہوگیا۔

دوسری طرف اس ظلم کے خلاف عرب اٹھ کھڑے ہوئے اور اسے تسلیم کرنے سے انکارکردیا ۔ نتیجہ یہ ہوا کہ اسرائیل اور عرب کے درمیان جنگ چھڑ گئی ۔ ۱۹۴۸ء؁ کی جنگ میں اسرائیل نے مزید علاقے اپنے تصرف میں لے لیے، تاہم بیت المقدس اب بھی اس کے تصرف سے آزاد رہا۔

۱۹۶۷ء؁ کی جنگ کے نتیجے میں اسرائیل نے دریائے اردن کا مغربی کنارہ، بیت المقدس، غزہ کی پٹی، صحرائے سینا اور گولان کے علاقے پر بھی قبضہ کرلیا ۔ مصرکےصدر انور سادات نے اسرائیل سے معاہدہ کے نتیجے میں صحرائے سینا کو آزاد کرالیا، لیکن باقی حصے اب تک اسرائیل کے تصرف میں ہیں ۔

خیال رہے کہ یہاں مجھے فلسطین کی تاریخ نہیں بتانی ہے اور نہ ہی مختصرسے کالم میں اس کی گنجائش ہے ،بلکہ جوبات مجھے اب عرض کرنی ہے ، اس کے لیے آپ کو ذہنی طورپر تیار کرنا مقصود ہے ۔ اور میں سمجھتا ہوں کہ اب ہم وہاں تک پہنچ چکے ہیں ۔

آپ نے ملاحظہ کیا ہوگا کہ جسے ’اسرائیل ‘ کے نام سے یاد کیا جاتا ہے 

وہاں پہلی جنگ عظیم کے دوران ساٹھ ہزار یہودی اور چھ لاکھ مسلمان آباد تھے ۔

لیکن جب ساری دنیا سے یہودیوں کو لاکر بسانے کا سلسلہ شروع ہوا تو ۱۹۴۸ء؁ میںیہودی آبادی ۷ لاکھ کے قریب تک جا پہنچی ۔اس طرح آپ یقین کے ساتھ کہیے کہ برطانوی سرپرستی میں عالمی طاقتوں نے زبردستی اس علاقے میں یہودیوں کو لاکر بسایا ہے ۔ یہی وہ منزل ہے

جہاں لمحے بھر کے لیے ٹھہر کرغورکیجیے کہ کس عالمی ضابطہ حیات کے مطابق کسی بھی بڑی طاقت کو یہ اجازت حاصل ہے کہ وہ دوسرے ملک میں اپنی مرضی سے کسی قوم کو آبادکرے ؟

دوسرے لفظوں میں یوں کہہ لیں کہ آپ کے گھر کو زبردستی کسی دوسرے شخص کی ملکیت میں دینے کی اجازت کسے حاصل ہے؟

یا یوں کہہ لیں کہ آپ برطانیہ جاناچاہتے ہیں اور روس آپ کو اجازت دے کہ وہاں چلے جائیں ، توکیا یہ اجازت عالمی قوانین کی روشنی میں کسی کے لیے بھی قابل قبول ہوگی؟

ٹھیک ہے تسلیم کرلیا کہ یہودیوں کے ساتھ یورپ میں ظلم ہواہے ، اور آپ کو ان سے ہمدردی ہے ، توچاہیے یہ کہ آپ اپنے ملک کا ایک حصہ ان کے نام کردیں ، لیکن یہ کیسے ہوسکتا ہے کہ دوسرے کی زمین پر اس کی اجازت کے بغیر آپ انھیں لاکر بسادیں ؟

صاحبو! کان قریب کیجیے توکچھ عرض کروں ۔ مسئلہ فلسطین پر دورخ سے گفتگوہوسکتی ہے ، ۔ اسے یوں سمجھیے کہ کوئی شخص آپ کی اجازت کے بغیر آپ کے گھر گھس آئے اور آپ نے اسے ایک مکا رسید کردیا۔

اب دوبنیادوں پر بات ہوسکتی ہے ؛ ایک یہ کہ آپ بغیر اجازت گھر میں کیسے گھس گئے اور دوسری بنیاد یہ کہ مالک مکان نے اسے مکا کیوں رسید کیا ؟

عالمی ضابطہ حیات کے مطابق توبات پہلی بنیاد پر ہوگی کہ آپ بغیر اجازت کیوں داخل ہوئے ، لیکن عجیب بات یہ ہے کہ مسئلہ فلسطین کے حوالے سے لوگ مصر ہیں کہ بات دوسری بنیاد سے شروع ہونی چاہیے کہ مالک مکان نے زبرستی گھر میں داخل ہونے والے کو مکا کیوں مارا ؟

اور سنیے کہ آج کی ترقی یافتہ دنیا میں ضابطہ حیات اور دستور وقوانین کے ہزار اختلافات کے باوجود یہ حق آج بھی سب تسلیم کرتے ہیں کہ آپ کے گھر میں کوئی زبردستی گھسنے کی کوشش کرے

تو آپ اسے مکانہیں ، بلکہ گولیوں سے نشانہ بھی بناسکتے ہیں اور قانون آپ سے کوئی باز پرس نہیں کرے گا۔

خیال رہے کہ میں نے اپنی زبان سے نہ توکسی کی حمایت کی ہے اور نہ ہی کسی کی مخالفت ، بلکہ غیر جانبداری کے ساتھ صرف حقیقت سے پردہ اٹھایا ہے اور فیصلہ آپ کے ضمیر پر چھوڑ دیا ہے ۔

ghulamzarquani@yahoo.com