حماس اور اسرائیل جنگ سے ابھرتے حقائق

اس کے بعد دنیا کو وہی معلوم ہے جو اسرائیلی ذرائع ابلاغ بتارہے ہیں ، تخمینے اور اندازے ہیں یا پھر حامی و مخالفین کی بڑکلیں ، جن میں کوئی حماس کو فاتح دکھا رہا اور کوئی اسرائیل کو ۔ غیر جانبدار صحافی حضرات صرف سوال ہی قائم کرپارہے ہیں ۔ حماس اور اسرائیل کے درمیان جاری جنگ سے عالمی سطح پر کچھ ”نئے حقائق“ ابھر کر سامنے آئے ہیں جو قومی اور بین الاقوامی سیاست پر گہرے اثرات مرتب کریں گے ، ہم کوشش کریں گے کہ اپنے قارئین کے سامنے ان حقائق کو نمبر وار بیان کریں ۔

1۔ یہ پہلی مرتبہ ہے کہ اب کی بار فلسطینیوں کی حمایت میں عالم اسلام کے ساتھ ساتھ غیر مسلم ممالک اور شخصیات بھی بہت بڑی تعداد میں سامنے آئی ہیں اور اسرائیل کی بربریت پر کھل کر اظہار خیال کیا ہے ۔

2 ۔ عالم اسلام میں مسلح فوجی قوت ، اقدام ، رعب و دبدبے اور بروقت فوجی فیصلوں Militry decision کے اعتبارسے ایران ، پاکستان اور ترکی سے اگے ہے ، یعنی شیعہ دنیا غالب ہے اور سنی دنیا اس معاملے پیچھے ۔ یہ سچ ہے کہ پاکستان ایک ایٹمی  طاقت ہے

مگر یہ بھی سچ ہے کہ اسرائیل اور حماس جنگ میں پاکستان سے بڑا ”گونگا شیطان“ کوئی نہیں بنا رہا ، دوسری سچائی یہ ہے کہ افغانستان کی جائز طالبان حکومت کو برباد کرنے میں پاکستان امریکہ کا فرنٹ لائن اتحادی رہا ہے جب کہ” ایران“ حزب اللہ اور اپنی پراکسیز کے واسطے سے جاری جنگ میں برسر پیکار ایک ناقابلِ فراموش کردار ہے ۔ تو عالم اسلام کی تمام اسلام پسند طاقتیں سن لیں کہ پاکستان موجودہ حکمرانوں کے ساتھ ( بغیر کسی استثناء کے ، بشمول مولانا فضل الرحمٰن اور عمران خان ) مکمل طور پر ایک ناقابلِ اعتبار مسلم ملک ہے ۔

3۔ امریکہ کے مقابلے میں دو عالمی طاقتیں روس اور چین مسلمانوں سے زیادہ نزدیک ہیں ۔ ضرورت ہے کہ عالم اسلام بیدار مغزی کا ثبوت دے اور اس نزدیکی کا فائدہ اٹھاکر اپنے دیرینہ مسائل بشمول قضیہ فلسطین حل کرلے ۔

4۔ بھارت کے جارح ہندتوا عناصر کا دل اسرائیل کے لیے دھڑکتا ہے مگر پیٹ عربوں سے جڑا ہوا ہے عقل مند لوگ زندگی گزارنے کے لیے ہمیشہ پیٹ کی سنتے ہیں دل کی نہیں اب دیکھتے ہیں کہ بھارتی حکومت بیوقوف ہے یا عقل مند ؟ اچھی طرح سمجھ لیں بھارت میں یہ تعداد ایسی ہی کم ہے جیسی کہ مسلمانوں میں اسرائیل کے حمایتی کم ہیں ۔ بھارت کی اکثریت آج بھی فلسطین کے ساتھ ہے ۔

5 یہ پہلی مرتبہ ہے کہ اقوامِ متحدہ میں فلسطین کے حوالے سے عالم اسلام کا پلڑا بھاری رہا اور اقوام متحدہ کے سیکرٹری جنرل نے اسرائیل کو واضح لفظوں میں ٹوکا ، نتیجتاً اسرائیل کے وزیراعظم بنجامن نتن یاہو نے سکریٹری جنرل کا استعفی مانگ لیا ۔

6۔ حماس اور فلسطین کے حوالے سے ترکیے کے صدر رجب طیب اردوغان نے شاندار سفارتکاری کی ، جس کے نتیجے میں روس نے حماس کے وفد کو ماسکو بلایا ، روسی صدر ولادیمیر پوتن کا یہ قدم واضح طور پر امریکا اسرائیل اور مغرب کو اکسانے والا ایک قدم ہے ، جبکہ قضیہ فلسطین کے مستقل حل کی طرف ایک اہم قدم ۔

6۔ اب کی بار قضیہ فلسطین کے دو ریاستی حل کی گونج عالم اسلام کے ساتھ روس چین اور بھارت کی حمایت کے ساتھ پہلے سے زیادہ سنائی دی ، یہ بھی قضیہ فلسطین کے مستقل حل کی طرف ایک کامیاب قدم ہے ۔

7۔ حماس –اسرائیل جنگ سے پہلے تقریباً دوسال سے روس – یوکرین جنگ بھی جاری تھی مگر جیسے ہی حماس اور اسرائیل کی جنگ چھڑی تو یوکرائن اور روس کی جنگ منظرنامہ سے بالکل غائب ہوگئی

جب کہ یوکرین کی جنگ دو عالمی طاقتوں کے درمیان ہے اور غزہ پٹی کی جنگ ایک گروپ اور طاقتور اسٹیٹ کے درمیان ہے ، یہ تبدیلی بتلاتی ہے کہ امت مسلمہ دنیا اور بین الاقوامی سیاست میں کتنا اہم مقام رکھتی ہے ؟

اس کا اندازہ سوائے مسلمانوں کے پورے عالم کفر کو ہے ۔ کاش کہ مسلمانوں کو بھی ہوجائے ۔

تحریر : توصیف القاسمی (مولنواسی)

مقصود منزل پیراگپوری سہارنپور موبائل نمبر

8860931450