جنگ آزادی میں مسلمانوں کی حصہ داری

پُلاسی کی جنگ:

انگریزوں نے رفتہ رفتہ اپنا کاروبار بڑہانا شروع کیا لیکن اورنگزیب عالمگیر کی وفات 1707ء تک مغلیہ حکومت مضبوط ہونے کی وجہ سے انگریزوں کوکامیابی نہیں مل سکی ۔اورنگزیب کی وفات کے بعد جب دہلی جیسا مرکز کمزور پڑ گیا اور صوبوں میں طوائف ا لملوکی شروع ہوئی تو ایسٹ انڈیا کمپنی کو چاروں طرف پھیلنے کا موقع ملا

جس کا افسوس ناک سانحہ 1757ء میں پلاسی کے میدان میں دیکھنے کو ملا ،جب بنگال کے نواب’’ سراج الدولہ ‘‘کی فوجوں کو اپنوں کی سازش کا شکار ہوکر ایسٹ انڈیا کمپنی کی مٹھی بھر فوج سے شکست کاسامنا کرنا پڑا،اور نواب سراج الدولہ کے ساتھ غداری کرنے والا ’’میر جعفر ‘‘تھاجس نے انگریزوں کی چاپلوسی کرکے نواب کو شکست کا سامنا کرایا۔

اس سانحہ سے نواب سراج الدولہ سمجھ گئے کہ انگریز اس ملک پر قابض ہونا چاہتے ہیں اس لئے سب سے پہلا علم بغاوت ا نگیریزوں کے خلاف سراج الدولہ نے بلند کیا اور آپ سب سے پہلے مجاہد آزادی کہلائے۔

بکسر کی لڑائی:

بکسر کے مقام پر22اکتوبر1764ء کوانگریزوں سے زبر دست جنگ ہوئی اور مغل باد شاہ شاہ عالم اور اودھ شجاع الدولہ کو شکست ہوئی اور بنگال سے اودھ تک انگریز وں کی حکومت قائم ہو گئی ۔دوسرے نمبر پر انگریزوں کے خلاف علم بغاوت بلند کرنے والے مرد مجاہد شیر میسور ٹیپوسلطان ہیں اور ایسٹ انڈیا کمپنی کو سب سے زیادہ خطرہ ٹیپوسلطان سے ہی تھا اس لیے انگریزوں نے ٹیپوسلطان کو راستہ سے ہٹا نے کے لیے پوری کوشش شروع کی،۔

ٹیپوسلطان کے وزیرمیرصادق سے انگریزوں نے خفیہ طورپرہاتھ ملایا ،میر صادق نے میر جعفر کی راہ اختیار کرتے ہوئے ٹیپو سلطان کو 1799ء میں شہید کرا دیا ۔ٹیپوسلطان کی شہادت کے بعد برطانوی اثرات چاروں طرف کو بہت تیزی سے پھیلتے گئے اور اسی زمانے میں دینی مدارس بڑی تعداد میں تباہ و برباد کئے گئے اورایسٹ انڈیا کمپنی نے دہلی کی طرف قدم بڑہانے شروع کر دئے دہلی کی مغلیہ حکومت آخری سانسیں لے رہی تھی آخر کار 1803ء میں انگریزوں نے دہلی پر قبضہ کرلیا ۔

شاہ عبد العزیزمحدث دہلوی کا فتویٰ:

جب چاروں طرف انگریزوں کے اختیارات ہونے لگے ساتھ ہی مذہب اسلام کے تشخص کو مٹانے کی ناپاک کوششیں شروع ہوئیں تو ان نازک حالات میں دہلی میں انگریزوں کے خلاف ایک تحریک وجود میں آئی جس کے بانی وروح رواں شاہ ولی اللہ محدث دہلویؒ تھے ۔آپ کی وفات کے بعد آپ کے فرزند وجانشین اعظم شاہ عبد العزیز محدث دہلوی نے اس تحریک کو آگے بڑھایا ۔

اور انگریزوں کے خلاف 1803ء میں ایک فتویٰ جاری کیا اور ہندوستان کو دارالحرب قرار دیا اور یہ فتویٰ ہندوستان کی آزادی کا نقطئہ آغاز وسبب بنا اور اس فتویٰ کے اثرات جب ظاہر ہونا شروع ہوئے تو علما اور عوام کا غصہ انگریزوں کے خلاف پھوٹ پڑااور باقاعدہ انگریزوں کے خلاف تحریک شروع ہوگئی اور اس تحریک میں بہت سے علما شہید بھی ہوئے اور یہ تحریک انگریزوں کے خلاف اسی طرح آگے کوبڑہتی رہی

یہاں تک کہ 1857ء کا دور آگیا۔اور 1857ء میں شاہ ولی اللہؒ ،شاہ عبدالعزیزؒاور شاہ اسحاق محدث دہلوی اور ان کی جماعت کی محنت رنگ لائی اور اسی جماعت کے جوش وجذبے کو دیکھتے ہوئے انگریزوں کے خلاف ایک اور جماعت وجود میں آئی ۔

جس میں مفتی کفایت اللہ ،مولانا محمد علی جوہر ،مولانا شوکت علی ،مولانا ابوالکلام آزاد ،مولانا حسرت موہانی ،مولانا حسین احمد مدنی،مولانا امداداللہ مہاجر مکی ،مولانا فضل حق خیرآبادی اور ان کے علاوہ بے شمار علماء نے علاقوں کے دورے کئے عوام کو دینی شعور کے ساتھ بیدار کیا اور حکمت عملی کے ساتھ عوام کو انگریزوں سے مقابلہ کے لیے تیار بھی کیا اور ساتھ ہی بے شمار علما نے اپنی جانوں کی قربانیاں بھی پیش کیں وطن عزیز کے لیے ۔

الغرض اس مشن اور تحریک کو کامیاب بنانے کے لیے برادران وطن مہاتما گاندھی اور دیگر ساتھیوں کوبھی ساتھ میں شریک کیاگیا،ان بزرگوں اور بے لوث مسلمانوں کی قربانیوں کے نتیجہ میں 14-15اگست 1947ء کو درمیانی شب ہندوستان کی آزادی کا اعلان کیا گیا

اور وطن عزیزبرطانوی سامراج اور غلامی کی زنجیروں سے نکل کر آزاد ہوا اور 26جنوری 1950ء کو نئے دستور کے ساتھ ہندوستان کو جمہوری ملک قرار دے دیا گیا۔ افسوس! جن مقاصد کے تحت مجاہدین آزادی اور دیگر اسلاف نے آزادی حاصل کی تھی وہ مقصد فوت ہوگیا۔

از۔۔۔۔۔۔۔ محمدمحفوظ قادری

رام پور یو۔پی9759824259