محکمہ تعلیم بہار کی اردو دشمنی

محکمہ تعلیم بہار کی اردو دشمنی

بہار کے تمام مُحِبَّانِ اردو، عاشقان اردو اور بالخصوص اردو اساتذہ، اردو کی تنظیموں اور تحریکوں کو انتہائی رنج و ملال کے ساتھ باخبر اور آگاہ کررہا ہوں کہ بہار ایجوکیشن پروجیکٹ کونسل کی طرف سے بہار کے تمام سرکاری اسکولوں کے لئے نیا نظام الاوقات (समय सारणी) جاری کیا گیا ہے، اسی کے مطابق ہر جماعت میں پڑھانا ہوگا،لیکن اس نظام الاوقات میں اردو زبان کو شامل نہیں کیا گیا ہے۔

اردو کو مکمل طور پر نظر انداز کر دیا گیا ہے، پہلی سے دسویں کسی بھی درجہ میں اردو کی کوئی گھنٹی نہیں رکھی گئی ہے۔ جو تمام مُحِبَّانِ اردو کے لئے بہت زیادہ حیرت انگیز اور انتہائی افسوس ناک ہے۔ کیونکہ اب اسی نظام الاوقات کے مطابق ہر ٹیچر کو پڑھانا ہوگا، اب اردو اساتذہ کو بھی اردو پڑھانے نہیں دیا جائے گا۔

اب مسلمان طلبہ اور طالبات اسکول میں اردو نہیں سیکھ پائیں گے۔ اب بےشمار مسلم طلبہ وطالبات کو اسکولوں میں اردو سے محروم کر دیا جائے گا۔

ذرا سوچیے کہ یہ محکمہ تعلیم بہار کی کھلی اردو دشمنی نہیں ہے تو اور کیا ہے؟ بلاشبہ یہ مسلمانوں کے ساتھ سراسر ناانصافی ہے۔ بلکہ اس نظام الاوقات سے صاف ظاہر ہے کہ حکومت اور محکمہ تعلیم کی نیت صاف نہیں ہے، ایسا محسوس ہورہا ہے کہ یہ لوگ رفتہ رفتہ اسکولوں سے اردو کو نکال باہر کرنا چاہتے ہیں۔ یہ حکومت اردو کو مٹانا چاہتی ہے۔ محکمہ تعلیم، بہار کے مسلم بچوں کو اردو سے محروم کرنا چاہتی ہے۔

سوال یہ ہے کہ آخر اردو سے محکمہ تعلیم کو عداوت کیوں ہے؟ ہماری تنظیمیں تحریکیں اور خاص کر اردو اکیڈمی پٹنہ کیا کررہی ہے؟

اردو کی روزی روٹی کھانے والے خاموش تماشائی کیوں بنے ہوئے ہیں؟

اردو دشمنی کے خلاف صدائے احتجاج بلند کیوں نہیں کرتے؟ کیا ہمارے سیاستدانوں پر یہ فرض عائد نہیں ہوتا کہ وہ اردو کی تعمیر وترقی پر توجہ دیں۔ میری تمام محبان اردو سے عاجزانہ درخواست ہے کہ غفلت کی چادر کو ہٹاکر بیداری کا ثبوت دیتے ہوئے، اپنی محبوب ترین زبان اردو کے حق میں آواز بلند کیجیے تاکہ اردو کی تعمیر وترقی اور ترویج و اشاعت میں کوئی رکاوٹ پیدا نہ ہو سکے۔

کاٹ کر رکھ دی گئیں زبانیں نفرت کے خنجر سے

اب ان کانوں میں الفاظ کا رس کون گھولے گا

ہمارے عہد کے بچوں کو انگلش سے محبت ہے

ہمیں ڈر ہے کہ اب اردو کون بولےگا

از قلم محمد افتخار حسین رضوی