جمعہ اور اس کے فضائل و مسائل

تحریر: افتخاراحمد قادری برکاتی :: جمعہ اور اس کے فضائل و مسائل

جمعہ اور اس کے فضائل و مسائل

ہفتے کے سات دن ہر قوم ہر مذہب اور ہر دور کی وضعوں میں تقریباً متفق علیہ رہے ہیں،البتہ مختلف قوموں نے ان کے مختلف نام وضع کئے-چنانچہ ہفتے کا ایک مخصوص دن جو ازل ہی سے بے پناہ اہمیتوں اور فضیلتوں کا حامل ہے جسے ہم اردو و عربی زبان میں جمعہ کہتے ہیں فارسی میں اسے آدینہ کہتے ہیں۔

اور ظہور اسلام سے قبل اہل عرب اسے عروبہ کے نام سے موسوم کرتے تھے- عرب میں پہلی مرتبہ اس دن کا نام عروبہ سے بدل کر جمعہ کعب ابنِ لوی نے رکھا جو سرور کونین صلی الله تعالیٰ علیہ واٰلہٖ وسلّم کے جد امجد حضرت عبد المطلب کے پردادا تھے

جیسا کہ قرآن وحدیث اس امر پر دلالت کرتی ہیں کہ حضرت آدم سے لے کرحضرت عبد اللہ تک سرور عالم صلی اللّٰہ تعالیٰ علیہ واٰلہٖ وسلّم کا نور ہمیشہ پاک پیشانیوں میں منتقل ہوتا رہا

جناب کعب ابنِ لوی بھی بت پرست نہ تھے،وہ اس دن لوگوں کو حرم کعبہ کے گرد جمع کرتے اور

خطبہ دیتے یہی مناسبت تبدیلی اسم کا سبب بنی-چوں کہ جمعہ،جمع سے ماخوذ ہے جس کے معنی جمع اور اکٹھا ہونے کے ہیں- قرآن مجید میں اس دن کا تذکرہ اسی نام سے آیا ہے،اذا نودی الصلوت من یوم الجمعہ،حدیث پاک میں ہے کہ اسی دن تمام مخلوقات کی تخلیق مکمل ہوئی- اسی دن ملک الموت نے تمام مقامات کی مٹی جمع کرکے خمیر کیا اور حضرت آدم کا پتلا تیار ہوا

اسی دن وہ جنت میں داخل کیے گئے اور اسی دن جنت سے باہر تشریف لائے- اسی دن ان کی توبہ قبول ہوئی- اور اسی دن حضرت آدم علیہ السلام کی وفات ہوئی- مشكاةشریف کی حدیث کہ نفخئہ اولی بھی اسی دن ہوگا،جس سے تمام مخلوقات فنا ہوجائے گی،کل من علیھا فان ویبقی وجہ ربک ذوالجلال والاکرام،کا وعدہ پورا ہوگا

اسی دن نفخئہ ثانیہ بھی ہوگا جس پر تمام لوگ اپنی اپنی قبروں سے اٹھیں گے،حتی کہ مشکات شریف کی حدیث ہے کہ حضور اکرم صلی اللّٰہ تعالیٰ علیہ واٰلہٖ وسلّم نے ارشاد فرمایا جمع کے دن صبح صادق سے سورج نکلنے تک تمام مقرب فرشتے،زمین وآسمان،ہوائیں،پہاڑی حتیٰ کہ چرند پرند تک ساری مخلوق خوف زدہ رہتی ہے کہ کہیں آج ہی قیامت کا دن نہ ہو،جب سورج نکل آتا ہے تو وہ اطمینان کا سانس لیتے ہیں

صرف انسان و جنات ہی ایسی مخلوق ہیں جو اس سے غافل رہتے ہیں-اللّٰہ رب العزت نے اس دن کو جمعہ کہا اس لیے کہ اس دن تمام مسلمان جمع ہوکر اللّٰہ تعالیٰ کی عبادت کرتے ہیں- ارشاد ربانی ہے والیوم الموعود وشاھدومشھود،یوم موعود سے مراد قیامت،یوم مشہود سے مراد یوم عرفہ ( نویں ذی الحجہ) ہے جب حجاج کرام میدان عرفات میں جمع ہوتے ہیں

اور شاہد کا معنیٰ حاضر ہونے والا- اس سے مراد جمع ہے یعنی یوم عرفہ میں لوگ دور دور سے جمع ہوتے ہیں اور یوم جمعہ کی وہ خاص نعمت و رحمت ہے جو خود ہمارے گھر میں آکر ہمیں جھنجھوڑ جھنجھوڑ کر کہتی ہے کہ اے ایمان والو! غفلت سے بیدار ہوجاؤ تم کتنے بے ہس و حرکت اور غفلت کے عادی ہو چکے ہو کہ رحمت و نور کا خزانہ تمہارے پاس آگیا ہے مگر تم دامن تک نہیں پھیلاتے

جمعہ کی فضیلت :

جمعہ کے دن کو اللّٰہ رب العزت نے ہر شریعت میں اپنے بندوں کی عبادت وریاضت کے لئے پسند فرمایا- توریت میں اس کی رحمتوں اور عظمتوں کا تذکرہ موجود تھا- مگر خصوصیت کے ساتھ اللّٰہ نے قوم یہود سے اس دن میں عبادت کا ذکر نہ فرمایا بلکہ انہیں اختیار دیا گیا تھا کہ تم ہفتے کے کسی ایک دن کو عبادت کے لیے خاص کرلو-

مگر ان کی نظریں اس یوم رحمت تک نہیں پہنچ سکیں- شاید منشائے ایزدی یہی تھا کہ اسے امت محمدیہ کے لیے خاص کرلیا جائے

یہ رب کریم کا فضل بے پایاں ہے جو ہمیں غلامئ مصطفٰی کے سبب نصیب ہوا- اللّٰہ کے رسول صلی اللّٰہ تعالیٰ علیہ واٰلہٖ وسلّم نے ارشاد فرمایا، (مشکات شریف الجمعہ) یعنی جمعہ کا دن یہود ونصاریٰ پر بھی فرض کیا گیا تھا مگر وہ اس میں اختلاف کربیٹھے بایں طور کہ یہود نے سنیچر کو اپنی عبادت کے لیے خاص کیا کہ اسی دن اسے فرعون سے نجات ملی تھی

اور نصاریٰ نے اتوار کو اپنے لیے منتخب کیا مگر جمعہ کی طرف کسی نے توجہ نہیں دی،ہمیں اللّٰہ تعالیٰ نے اس کی ہدایت دی یعنی عظمت و رفعت والا دن ہم پر ظاہر فرمایا گیا اور واضح طور پر بتادیا تاکہ ہم انتخاب میں غلطی نہ کریں- اور جس دن کو مسلمانوں نے منتخب کیا وہ جمعہ تھا اور اسی میں نمازِ جمعہ بھی ہے

اس کی تفصیل کچھ اس طرح ہے کہ مرقات نے ابنِ سیریں سے ایک روایت نقل کی ہے کہ حضور صلی اللّٰہ علیہ واٰلہٖ وسلّم کے ہجرت فرمانے سے قبل مدینہ کے انصار نے سوچا کہ جب یہودیوں اور عیسائیوں کے لیے عبادت کا دن مقرر ہے،تو کیوں نہ ہم بھی اس طرح کا دن مقرر کرلیں،چناچہ انہوں نے جمعہ کے دن سعد ابنِ زارہ کو امام بناکر ان کے پیچھے دو رکعتیں ادا کیں

حدیث بالا میں ھدانا کے لفظ سے اس جانب بھی اشارہ ہو سکتا ہے کہ اللّٰہ نے میری امت کے خیال کو پسند فرمایا- پھر جب حضور اکرم صلی اللّٰہ تعالیٰ علیہ واٰلہٖ وسلّم نے مدینہ کی طرف ہجرت فرمائی تو جمعہ کا حکم آچکا تھا۔