اسلام سچا دین کیوں قسط ہشتم

[۸] جنگِ بدر میں فتح و کامرانی کی پیش گوئی: اللہ ربُّ العزت نے سورۂ روم میں ارشاد فرمایا :۔(سورۂ روم ۔ آیت نمبر ۱: تا ۶)

ترجمہ:رومی [روم کے عیسائی، ایرانی مجوسیوں سے ] مغلوب ہو گئے ، قریب کی سر زمین[ملکِ شام] میں اور وہ اپنے مغلوب ہونے کے بعد عن قریب دو بارہ غالب ہوں گے ، چند سالوں میں ، پہلے[ بھی] اور بعد [بھی] حکم اللہ ہی کو زیبا ہے ، اور اس دن مومن خوش ہوں گے ، اللہ کی مدد سے ، وہ جس کی چاہتا ہے مدد فرماتا ہے اور وہ بہت غالب بے حد رحم فرمانے والا ۔

اِن آیتوں کا پس منظر یہ ہے کہ ہجرتِ نبوی سے تقریباً سات سال پہلے ، اُس وقت کی دو سپر پاور طاقتوں یعنی ایرانی اور رومی حکومتوں میں خوف ناک جنگ چھِڑ گئی ۔جنگ کی خبر جب مکۂ مکرمہ پہنچی تو مسلمانوں کی خواہش یہ ہوئی کہ رومیوں کو غلبہ حاصل ہو ، کیوں کہ وہ اہلِ کتاب اور بہت سے عقائد میں مسلمانوں کے ساتھ شریک تھے ، جب کہ کفارِ مکہ نے چاہا کہ ایرانیوں کو کام یابی ملے ،کیوں کہ وہ اُن کی طرح مشرک و بت پرست تھے ۔

سوے اتفاق کہ کافروں کی منشا کے مطابق ایرانیوں کو رومیوں پر غلبہ حاصل ہوگیا، یہ خبر مسلمانوں پر برق( بجلی) بن کر گری اورانھیں قلبی تکلیف لاحق ہوئی ، جب کہ کافروں نے شادیانے بجائے اور خوب خوشیاں منائیں ، یہاں تک کہ لاف زنی کرتے ہوئے اُنھوں نےمسلمانوں سے یہ تک کہہ دیا : رومی تمھاری طرح امورِآخرت کو مانتے ہیں ؛ لہذا وہ تمھارے بھائی ہوئے اور ایرانی ہماری طرح بت پرست ہیں ؛لہذا ہم ان کے بھائی ٹھہرے ۔

سنو!جس طرح ہمارے بھائیوں نے تمھارے بھائیوں کو شکستِ فاش دی ہے ، اگر تم نے ہم سے جنگ کی تو ہم تمھیں اس سے بد ترشکست دیں گے ۔ اس وقت اللہ ربُّ العزت نے سورۂ روم کی مذکورہ چھ آیتوں کے ذریعے مسلمانوں کویہ تسلی بخش بشارت دی کہ نَو سال کے اندر رومیوں کو ایرانیوں پر دو بارہ غلبہ حاصل ہوگا ،اس وقت تمھیں بھی عظیم فتح نصیب ہوگی اوراس دن تمام مسلمان خوشیاں منائیں گے ۔

جس وقت یہ بشارتیں دی گئیں تھیں ، اس وقت رومیوں کے غلبے کا کوئی امکان تھا نہ مسلمانوں کی کام یابی کی کوئی سبیل ؛ بلکہ مسلمانوں کو مسلسل دُھتکاراجا رہا تھا اور انتہائی ذلت کے ساتھ اُنھیں ہر جانب سے کھدیڑا جا رہا تھا ؛ مگر بالآخر وہی ہوا جس کی پیش گوئی قرآنِ مقدس نے کی تھی۔

چناں چہ نَو سالوں کے اندر حالات تبدیل ہو گئے ، اُدھر رومیوں نے شام کی سر زمین سے ایرانیوں کو مار بھگایااور اِدھر بدر کے میدان میں تین سو تیرہ مجاہدینِ اسلام نے انتہائی بے سر و سامانی کے عالَم میں،مختلف ہتھیاروں سے لیس نہایت آسودہ حال ایک ہزار تجربہ کار سورماؤں کا غرور خاک میں ملا کر، اسلام کا سرہمیشہ کے لیے فخر سے بلند کر دیا۔

ثابت ہوا کہ اسلام ’’دینِ برحق‘‘ہے اورہمارا قرآنِ مقدس اُس خدا کا نازل کیا ہوا ہے جو ہر قسم کے غلبہ و اقتدار کا مالک ہے ۔

[جاری]

تحریر: سید محمد اکرام الحق قادری مصباحی عفی عنہ

پرنسپل: دارالعلوم محبوبِ سبحانی کرلا ویسٹ ممبئی

پیش کش : نور ایمان اسلامک آرگنائزیشن کرلا ویسٹ ممبئی انڈیا