اِسلام ہی سچا دین کیوں قسط دہم

اِن آیاتِ کریمہ میں یہ بتایا گیا ہے کہ یہ پیغام کسی انسان ، فرشتے، جن یا دیگر مخلوق کی جانب سے نہیں آیاہے ؛ بلکہ یہ عالم کے پروردگار کی جانب ہے ۔ اسی لیے یہ فرمایاگیا کہ ’’اپنے رب کے نام سے پڑھیے جس نے پیدا کیا‘‘ یعنی یہ پیغام اسی رب کے نام سے ہے جو خالق بھی ہےاور قادرِ مطلق بھی کہ جس نے جمے ہوئے خون سے انسان کے حیوانی وجود کو پیدا کیا۔ وہ رب انتہائی کرم فرمانے والا ہے ۔

اسی کرم کا نتیجہ ہے کہ اُس نےانسان کو عقل و شعور کی دولت سے نوازا اور وہ سب کچھ سکھایا جو اس کی دنیوی اور اخروی زندگی کے لیے ضروری ہے۔ چنانچہ یہ وحی بھی اسی تعلیم کا حصہ کا ہے، جو ایک کریم ، قادرِمطلق ،علیم اور حکیم مَولا کی جانب سے عطا کی جارہی ہے۔

یہاں’’ربک الذی خلق‘‘ فرما کر زمانۂ جاہلیت کے اِس تصورِ باطل کی نفی کی گئی کہ ’’پالنے والے، پیدا کرنے والے ، حفاظت کرنے والے، رزق دینے والے اور دیگر کام کرنے والے‘‘ الگ الگ خدا ہیں اور دو ٹوک انداز میں کائنات کی اِس حقیقت سے پردہ ہٹایا گیا کہ اِس کائناتِ ہست و بود کا جو پیدا کرنے والا ہے وہی اِسے چلانے والا اور پرورش کرنے والا بھی ہے ۔ ایسا ہرگز نہیں کہ خالق کوئی اور ہے اور رب کوئی اور۔

اس کے بعد اگلی آیت ’’انسان کو خون کے لوتھڑے سے پیدا کیا‘‘ انسان کے مادی وجود کی ابتدا کو بیان کرتی ہے۔

قرآنِ حکیم نے اُس زمانے میں وجودِ انسانی کی ابتدا کو بیان فرمایا ہے جب کہ جدید ٹکنالوجی اور مختلف سائنسی آلات کا تصور بھی نہیں تھا۔ اِس دوسری آیت میں تخلیق کا یہ عمل اس لیے بتایا گیا؛ تاکہ ’’وحی ‘‘[کلامِ الٰٰہی]بھیجنے والی ہستی کا تعارف ہو جائےکہ اس کے رب اور خالق ہونے کا ثبوت یہ ہے اُس نےانسان کو بستہ خون سے بنایا ہے۔

ظاہر سی بات ہے کہ اُس دَور کا انسان اتنا تو سمجھتا تھا کہ شکمِ مادر میں انسان کی تخلیق منی کے قطرے سے ہوتی ہے ؛ لیکن اُس کے علم میں یہ نہ تھا کہ منی آگے چل کر کن مراحل سے گزرتی ہے ، میڈیکل سائنس کے وجود سے سیکڑوں سال پہلے انسانی تخلیق کا یہ مرحلہ قرآنِ مجید نے بیان کر دیا ۔ انسانی تخلیق کا یہ مرحلہ تو خالقِ حقیقی ہی بیان کر سکتا ہے جس کی قدرت اِتنی عظیم ہے کہ وہ ایک بے جان جمے ہوئے خون سے ’’زندگی‘‘ کو وجود بخشتی ہے ۔

اگلی آیتِ کریمہ میں یہ بتایا گیا ہےکہ تمھارا خالق و پروردگار بہت ہی کرم ، لطف اورمہربانی فرمانے والا ہے۔ یقیناً وہ سب سے بلندو بالا ہے؛ لیکن دنیاوی حکمرانوں کی طرح وہ سختی یا تشدد کرنے والا نہیں ہے۔ اُس کی ’’وحی‘‘ عذاب کا پیغام نہیں ؛بلکہ پوری انسانیت کے لیےرحمت کی سوغات اور ہر فردِ بشر کے لیے اعلیٰ ترین نصب العین ہے۔

وہ بات اچھی طرح سمجھانے کے بعد ہی انسان کوکسی حکم کا پابند و مکلَّف بناتا ہے ؛کیوں کہ وہ ظالم نہیں ؛ بلکہ انتہائی کریم ہے۔اُس کا بے پایاں کرم ہی تو ہے کہ ’’اُس نے انسان کو قلم کے ذریعے زیورِ علم سے آراستہ فرمایا‘‘۔قلم، انسانی سوچ ، اُس کےعلم اور خیالات کو منتقل کرتاہے۔لیکن اگراس سے مراد وہ طریقۂ کار لے لیا جائےجو علم کو آگے پہنچانے کا ذریعہ بنتا ہے

جس سے علم ایک شخص سے دوسرے شخص، ایک جماعت سے دوسری جماعت اور ایک زمانے سے دوسرے زمانے میں منتقل ہوتا ہے تو قلم کے ذیل میں قلم کے علاوہ کمپیوٹر، اور دیگر ذرائع ابلاغ بھی شامل ہو جائیں گے۔

راقم کی ناقص فہم کے مطابق قلم کا ذکر یہاں ضمناً ہواہے۔ اصل فوکس ’’ انسان کو سکھانے اور اسے علم سے نوازنے‘‘ پر ہے۔ پچھلی آیتِ کریمہ میں’’ جمے ہوئے خون سےانسان کے حیوانی وجود کی ابتدا ‘‘کی بات کہی گئی۔

اب یہاں انسا ن کے ’’روحانی وجود ‘‘کی ابتدا کی بات کی گئی اور یہ بتایا گیا کہ خالقِ کائنات نے کس طرح انسان کو سکھا یا ، اسے زیورِ علم سے آراستہ فرما کر، دیگر مخلوقات سے ممتاز فرمایا اور اس کے سر پر اشرف المخلوقات کا تاجِ زریں رکھا۔ اس میں اس جانب بھی اشارہ ہے کہ اس نے انسان کے حیوانی وجودکو تخلیق آشنا کرنے کے بعد تنہا نہیں چھوڑا؛بلکہ اس کو وہ سب کچھ سکھایا جس کی اسے حاجت تھی۔

چوں کہ سیکھنے کا عمل انسانی عقل سے وابستہ ہے۔ اس لیے یہ آیتِ مبارکَہ علم کے ساتھ عقل کی اہمیت کو بھی واضح کررہی ہے۔ عقل کے بغیرانسان دینی اور دنیوی دونوں لحاظ سے غیر مکلف رہتا ہے،اُس پر نہ تو دنیاوی قانون لاگو ہوتا ہے اور نہ ہی دینی حکم۔ اس سے ثابت ہوا کہ علم کی روشنی میں عقل کا صحیح استعمال ہی انسانی زندگی کا اعلیٰ

ترین نصب العین اور عظیم بنیادی مقصد ہے۔

پانچویں آیتِ کریمہ ’’انسان کو سکھایا جو وہ نہ جانتا تھا‘‘ کے ذریعے یہ بتلایا کہ انسان کو جو کچھ بھی علم ملا ، جو بھی معرفت ملی، وہ سب خلاقِ کائنات اللہ عز وجل کی جانب سے ہے۔اگرچہ انسان اپنی سعیِ پیہم ، جہدِ مسلسل اور تجربات ومشاہدات سے بھی مختلف علوم و فنون حاصل کر لیتا ہے ؛ مگر اگر تائیدِ الٰہی شاملِ حال نہ ہو تو انسان کو کسی علم کی بھنک لگ سکتی ہے اور نہ وہ کسی فن سے آشنا ہو سکتا ہے ۔

مختلف قدیم و جدید علوم اورسائنسی ایجادات بھی نصرتِ الٰہی سے بے نیاز نہیں ہیں ۔انسانوں کو ماضی میں علم کا جو بھی حصہ ملا ، اس کے لیے حال میں معرفت کے جو بھی دروازے کھلے یا کھل رہے ہیں اور مستقبل میں حقائقِ عالَم کے چہرے سے جو بھی پردے ہٹیں گےوہ سب اِس آیتِ کریمہ کے تحت مندرج ہو گئے ۔

یہ ہے قرآنِ کریم کی جامعیت و وسعت کا عالَم کہ آج تک تاریخِ انسانی میں جتنی فلسفیانہ کوششیں ہوئی ہیں وہ سب درجۂ یقین تک پہنچنے سے محروم رہیں؛ مگر سورۂ علق کی مختصر سی پانچ ابتدائی آیتوں میں فلسلے کے تمام موضوعات پر حتمی روشنی ڈال دی گئی ہے ۔ فالحمد للہ علیٰ ذٰلک۔ ثابت ہوا کہ قرآنِ مجید ’’کلامِ اِلٰہی ‘‘ ہے جو ہمارے آقا ، اُمی پیغمبر حضرت محمد مصطفیٰ ﷺ کی زبانِ اقدس پر جاری ہوا ۔

[جاری]

تحریر : سید محمد اکرام الحق قادری مصباحی عفی عنہ

پرنسپل: دارالعلوم محبوبِ سبحانی کرلا ویسٹ ممبئی

من جانب : نور ایمان اسلامک آرگنائزیشن کرلا ویسٹ ممبئی انڈیا۔