عقیدت و مودت اہل بیت کی اموشنل بلیک میلنگ

خطیب بس ایک رو میں بولتا جاتا ہے وہ سامعین کو کرتا پھاڑتا ہوا دیکھنا چاہتا ہے۔وہ بے محل نعروں کو حسینیت کی علامت بتا کر بات بات پہ مجمع کو اپنے فیور میں کرنے کی کوشش کرتا رہتا ہے۔

ہمارے نعت خواں جو محرم کے مہینے میں منقبت خوانی کی تیاری کرکے آتے ہیں وہ منقبت کی حدود سے باہر نکل کر انیس و دبیر کے علاقۂ مراثی میں داخل ہو جاتے ہیں۔یہ بے چارے کریں بھی تو کیا کریں علم و فن سے واسطہ تو رہا ہی نہیں۔شاید اسی لیے اردو کی ایک مثل مشہور ہے “بگڑا شاعر مرثیہ گو، بگڑا گویّا مرثیہ خواں”۔

تقریبا دو دہائی قبل کی بات ہے۔میں دربھنگہ میں ابتدائی جماعت میں زیر تعلیم تھا۔یہ بتا دیں کہ ایام محرم میں دربھنگہ شہر میں چہل پہل بڑھ جاتی ہے۔جا بجا لاٹھی بازی کا دنگل سجتا ہے۔ہر چوراہے، ہر نکڑ پہ ایسی رزم گاہیں سجائی جاتی ہیں۔اسی بیچ ہر شب ذکر اہل بیت کی محفلیں بھی روشن رہتی ہیں۔

مجھے آج بھی یاد ہے کہ شہر دربھنگہ کا ہی ایک خطیب ذکر اہل بیت پر بولتے ہوۓ یہ بول گیا کہ “جب یزیدی فوج نے زینب کی چادر کھینچ لی تو زینب نے اپنے بالوں سے اپنے چہرے کو چھپا لیا” اولا تو یہ روایت کس محدث نے نقل کی یہی محل اعتراض ہے۔

نہ جانے یہ روایت کہاں سے لے آیا۔ثانیا کربلا کے حالات بیان کرنے کا مطلب ہرگز یہ نہیں ہوتا کہ خطیب اس قدر جسارت کرجاۓ کہ حضرت زینب کے لیے شایان شان الفاظ و جملہ بھی منتخب نہ کر سکے۔

اور جس انداز میں بیان کیا گیا لگتا ہے وہ وہیں بیٹھا دیکھ رہا تھا۔جس در پہ جبریل بھی بے اجازت نہ آتے ہوں اس کے مستورات مقدسات کی شان بیان کرنے کے لیے خطیبانہ جسارت نہیں، غلامانہ مودت درکار ہے۔افسوس تو یہ ہے کہ ایک خطیب اس طرح کی روایت بے باکانہ بیان کرتا ہے اسی اسٹیج پر علما و مدرسین کا قافلہ بیٹھا ہوتا ہے پھر بھی کوئی روک ٹوک نہیں ہوتی۔

یہی کوئی ۲۰۱۰ کا سال رہا ہوگا۔میرے ایک ہم جماعت کی دعوت پر مجھے دسویں محرم کو ضلع سمستی پور جانا رہا۔اس جلسے میں کرناٹک سے ایک خطیب بلاۓ گئے تھے۔جسے نقیب جلسہ بار بار “فاتح کرناٹک” کے سابقہ خطاب سے یاد کرتا رہتا تھا۔ان کی تقریر میں ایسی ایسی روایتیں سننے کو ملیں جو مجھ طالب علم کے لیے بالکل نئی تھیں۔

ان روایات میں ایک یہ بھی تھی کہ “جب سر حسین کو ابن زیاد کے پاس لایا گیا تو اس نے نفرت بھرے انداز میں سر کو اٹھا کر اپنی ران پہ رکھا۔اور اسے مارنے لگا۔اس کٹے سر سے ایک قطرہ خون نکلا اور ابن زیاد کی ران کو چھیدتا ہوا، تخت کو چھیدتا ہوا زمین میں سما گیا”(بالکل یہی الفاظ تھے) .

پھر نتیجہ نکال کر پورے خطیبانہ داو کھیلتے ہوۓ کہتا ہے، اے یزیدیو جب حسین کا ایک قطرہ خون اپنا راستہ نہیں بدلتا تو سراپا حسین کیسے راستہ بدل لیتا۔ اس روایت کی سند کیا ہے کس معتبر کتاب میں منقول ہے یہ تو علما اصول حدیث ہی بتائیں گے ویسے اس طرح کی روایت کو درایت کی کسوٹی پر پرکھا جاۓ مجھ سا علم حدیث سے کورا شخص بھی اسے قبول کرنے سے ہچکچاۓ گا۔ اہل سنت کے اندر رفض زدہ امور کا در آنا کوئی نیا نہیں ہے۔

بہت پہلے سے ہمارے سنی حلقے نے بھی ذکر حسین کے نام پہ وہ سب کچھ گلے لگا رکھا ہے جو اہل تشیع کے ہاں رائج تھا۔مگر ہمارے خطبا شیعہ ذاکرین کی پیروی میں اتنا آگے نکل جائیں گے یہ لمحۂ فکریہ ہے۔ہمارے سنجیدہ ذہن علما کو اس پر نکیل لگانے کی ضرورت ہے۔

یہ اسلوب یہ نیا پن صرف اس لیے برتے جا رہے ہیں تاکہ سامعین کو بھرپور محظوظ کیا جا سکے۔بعض بڑے نامور خطبا تو مجمع کو فیور کرنے کے لیے رونے دھونے کی ایکٹنگ تک کرتے ہیں(خدا ہی جانے سر محفل اس آہ و بکا میں کتنا خلوص ہوتا ہے).

یہ بڑا حیرت انگیز ہے کہ خطبا واقعات کربلا کو بیان کرنے کے لیے تصنع و ملمع کاری کا سہارا لیتے ہیں جیسے عرصۂ کربلا کوئی حقیقی جنگ نہیں، بلکہ ہالی ووڈ کی کوئی ایکشن مووی کا ذکر ہو۔(العیاذ باللہ) مظلومان کربلا پر درگاہی حلقوں نے بھی کم ظلم نہیں کیا ہے۔بہت سالوں پہلے تسلیم و عارف کی قوالی میں ہم نے سنا تھا کہ حسنین کریمین نے دو تختیاں لکھیں۔

کون بہتر ہے اس کا فیصلہ کرنے کے لیے پہلے ماں فاطمہ پھر بابا علی، اخیر میں نانا حضور کے پاس آۓ۔پھر جبریل نے جنت سے سیب لاکر اچھالا سیب ہوا میں دو ٹکڑے ہو کر دونوں تختیوں پہ گرا۔یہ واقعہ ہم نے پہلی بار قوالی میں ہی سنا تھا۔تب نہ ہم بالغ تھے نہ ہمارا شعور۔ایسی روایات سماعت کو بہت بھلی لگتی ہیں۔

حسن اتفاق کہ پھر علامہ اسید الحق(ان کے مرقد پر رحمت ہو)کا مضمون “تقریروں میں موضوع روایات: ایک لمحۂ فکریہ” جام نور کے سلسلے وار کالم میں پڑھا جس میں آپ نے لکھا تھا کہ ہزار تلاش کے باوجود یہ روایت مجھے کسی معتبر کتاب میں نہیں ملی،مگر حیرت تو یہ ہے کہ وہ دونوں تختی گجرات کی ایک خانقاہ (متعلقہ خانقاہ کا نام انہوں نے قصدا ذکر نہیں کیا)میں موجود ہیں۔

محرم میں ان کی زیارت کرائی جاتی ہے۔ چلیے فرض کرتے ہیں کہ ایسا ہوا تھا۔تو کیا متعلقہ خانقاہ والے وہیں بیٹھے تھے؟ اتنے صحابہ رہتے ہوئے تختیاں ان کو کیسے مل گئیں؟ یہ روایت سبطین رسول کے بچپنے کا ہے تو اس وقت سارے جاں نثار صحابہ موجود تھے انہوں نے یہ تختیاں نہیں لیں؟

ان جیسے سوالوں کے بعد یہی ذہن میں آتا ہے کہ روایت کو کیش کرنے کے لیے ہی یہ طریقہ چنا گیا ہوگا۔خود کو مقدس بناۓ رکھنے کے لیے اور برہمنیت کی توسیع کے لیے اس طرح کی چیزیں کافی معاون ثابت ہوتی ہیں۔یہ ہمیں نہیں بھولنا چاہیے کہ اہل بیت کی مودت میں خلوص و وارفتگی لازم ہے تبھی ان کی توجہات کے مستحق ٹھہریں گے۔ورنہ آپ لاکھ خود کو مولائی، علوی، فاطمی،حسنی، حسینی، لکھ لیں سب لاحاصل۔

مشتاق نوری