دینی جلسوں میں اصلاحی مقاصد کا فقدان

سیمانچل،بہار دیہی علاقہ کے محنت وجفاکش، ایماندارسنی سادہ لوح مسلمانوں کاٹھاٹھیں مارتا مجمع اس امید پراپنی دن بھر کی تَکان بھلاکر ،نیند قربان کررہاتھا کہ خطیب اعظم کی زبان سے نکلے ہوئے بیش بہا گوہر ِآبدارسے دامن مراد بھر لوں گا۔

مگر ہائے افسوس ………………………….!

خطیب جھنکار،واعظ گرج دار جیسے ہی مائک پر آئے ،اپنے مخصوص لب لہجہ میں سامعین سے مخاطب ہوئے اور پھر کیا تھا،آوازوں کی گرج،مثل برق ِ طپاں انداز بیاں،ساؤنڈ کی کڑک، لباس کی بھڑک دیکھ کر سامع کادل گیا دھڑک ، تقریباً ڈیڑھ / دوگھنٹے کے ظریفانہ اسلوب،طنزومزاح سے پُر مزاحیہ خطابت ہوتی رہی ہے۔ آغاز گفتگو کو دیکھتے ہی اہل فکر ونظر نے اسٹیج کوالوداع کہہ دیا ۔ اور تھکے ماندے سامعین بھی محفل چھوڑنے پر مجبور ہوگے ۔

آج کے اکثر جلسوں کے حالات اسی طرح کےہیں۔ سیرت النبیﷺ کا جلسہ ہو یا جشنِ خلفاے راشدین رضوان اللہ علیہم اجمعین یا فیضانِ اولیاء کانفرنس چاہے جس نام سے بھی موسوم ہو مگرخطاب اس کے برعکس ہی سننے کو ملتا ہے۔

اتفاق سے اگر کسی پیر صاحب کی شرکت ہوگئی تو پھر مکمل کانفرنس ان کی نذر ہوجانی ہے۔اور ان کی کرامات بیان کرنے پر ہی شعرا ،خطبا اپنی مکمل کاوش صرف کرنے کی کوشش میں لگ جاتے ہیں۔ نعت و منقبت کے نام پرپیر صاحب کی تعریفات میں شب گزر جاتی ہے ۔

اور ایسا ہو بھی کیوں نہ ؟ کیوں کہ آج کے اکثر جلسوں میں اگر کوئی آقائے کریم ﷺ کی نعت پاک ،یاصحابہ واغواث کی شان اقدس میں اکابرین صوفیا و مشائخ کا تحریر کردہ کلام پڑھ دے تو سامعین اور اہل اسٹیج کی جانب سے حوصلہ افزائی کےایک بھی جملے سننے کو نہیں ملتے لیکن اس کے برعکس ہو تو……….ہر چہار جانب سے نعرے اور داد وتحسین کی صدائیں گونج اٹھتی ہیں۔

اکثر جلسوں کی بے مقصدیت کا حال یہ ہوتا ہے کہ تیاریاں ہو رہی ہیں، رضا کار دوڑ دھوپ کر رہے ہیں(وہ رضا کار جن میں سے اکثر چہرے مہرے سے بھی مسلمان نہیں معلوم ہوتے) کھاناپک رہا ہے، شامیانہ لگ رہا ہے، مہمانوں کی آمد آمد ہے۔ مگر قریب میں مسجد ہوتی ہے، اذان ،نماز ہوتی ہے

مگر دین کے یہ سپاہی تن من دھن سے اپنے کام میں لگے ہوئے ہیں، اکا دکا جو پہلے سے نماز کے پابند ہوتے ہیں ان کے علاوہ باقی سب ’’دین کے کام‘‘ میں مشغول رہتے ہیں۔ بتایا جاتا ہے کہ کسی وقت میں جب ٹی وی اور موبائل کا چلن زیادہ نہیں تھا اور سینما بینی کے بعض لوگ عادی ہوتے تھے اس وقت جلسوں کے اس قسم کے رضا کار جلسے کی رات ’’ دینی کاموں‘‘ سے فارغ ہوکر اس شوق کی تکمیل میں مشغول ہو جایا کرتے تھے۔ محفل وعظ تو تا دیر رہے گی قائم ٭ یہ ہے مے خانہ ابھی پی کے چلے آتے ہیں

بہر حال جلسے کے انعقاد سے قبل منتظمین کو چاہیے کہ جلسے کے اہداف و مقاصد طے کریں اور اپنا ٹارگیٹ متعین کر لیں۔ ان ہی مقاصد کے حصول کے لیے ان کی جد وجہد ہو، اور بعد از جلسہ جائزہ لیں کہ کیا کھویا کیا پایا۔

اسی تناظر میں جلسے کی کامیابی یا ناکامی کا حکم لگایا جائے۔ کسی جلسے کی کامیابی یہ نہیں ہے کہ وہ دیر رات تک چلا ، یا اس میں فلاں مشہور مقرر کی شرکت اور تقریر ہوئی، یا سامعین کی تعداد بہت زیادہ تھی، یا اس کا نظم ونسق بہت اچھا تھا، وغیرہ وغیرہ۔بلکہ جلسہ کی حقیقی کامیابی یہ ہے کہ وہ عوام کے قلوب واذہان کو جنھجھوڑنے میں کتنا کامیاب رہا۔ اس سے معاشرہ کی کیا اصلاح ہوئی، کس برائی کا اس سے خاتمہ ہوا، کس اچھائی کے فروغ کا سبب بنا۔

یہ وہ حقائق ہیں جن کی وجہ سے مذہبی جلسوں کے انعقاد کا اصلی مقصد فوت ہوتا ہوا نظرآتا ہے،اس کے ذریعہ نہ تولوگوں کے اندرجذبہ عمل پیدا ہوتا ہے اورنہ ہی خوف وخشیت الٰہی ۔دینی محفلوں کی ناکامی کی بڑی وجہ یہ ہے کہ اکثر مقررین کوئی پائیداراورمؤثرخطاب کرتے ہی نہیں صرف قصے اورکہانیوں میں وقت ضائع کرتے ہیں۔

اورعقائد واعمال کی دعوت دینے کے بجائے اپنی ہی جماعت کی قدآور،گرانقدراورمعظم شخصیتوں کوطعن وتشنیع کے تیرسے گھائل کرنے میں لگے رہتے ہیں۔ایسی صورت میں دینی جلسوں کی تقریری کوششیں سادہ لوح سنی مسلمانوں کے اندرمؤثرنہیں ہورہی ہیں تواندازہ لگایا جاسکتا ہے کہ کہ معاندین ومخالفین اسلام کے اندرکیسے اثراندازہوسکتی ہیں،اورلوگ اسلام وایمان اوراس پرعمل کی جانب کیسے مائل ہوں گے۔

دینی جلسوں کوکام یاب بنانے کے لیے ہمارے بیدارمغزاوراہل فکر و نظرعلماے کرام کوتوجہ دینی چاہیے ۔

منتظین جلسہ سے راقم کی درخواست ہے کہ اپنے جلسوں میں ایسے خطبا کومدعوکریں جوعلمی اورعملی دونوں خوبیوں سے مزین ہوں، مخلص اوربے لوث ہوں،قوم وملت کے بہی خواہ ہوں،مؤثرشخصیت کے حامل ہوں ، پیشہ و راوردنیا دارخطیبوں کوہرگزدعوت نہ دی جائے اگرچہ وہ شہرت کی بلندیوں کوچھورہے ہوں، کیوں کہ ایسے لوگ خودغرض اورمفادپرست ہوتے ہیں۔ قوم وملت کا دردا ن کے دلوں میں نہیں ہوتاہے۔

لہذا ان سے اصلاحی مقاصداوردعوت وتبلیغ کی توقع فضول ہے۔

واللہ المستعان والموفق الی الصراط المستقیم۔