میرا تو ٹکٹ کنفرم ہے

بروز اتوار، بتاریخ : 17، ذی الحجہ 1443ھ مطابق : 17،جولائی 2022ء کو سرزمین دو گچھی، قصبہ، پورنیہ ،بہار میں حافظ و قاری محمد فیصل رضا علائی رشیدی سلمہ کی والدہ مرحومہ،ناصر رضا ممبئی کی مامی جان کے ایصالِ ثواب کی محفلِ چہلم میں راقم بحیثیت خطیب موجود تھا ۔ اس پروگرام کی سرپرستی مصنف کتب کثیرہ، قاضی سیمانچل، مناظر اہل سنت، حضرت علامہ و مولانا مفتی زبیر عالم صدیقی صاحب قبلہ فرما رہے تھے۔ پروگرام تقریباً ۲/ بجے شب اختتام پذیرہوا۔

دور دراز سے آئے ہوئے مہمان ومیزبان وغیرہ تھکے ماندے تھے، سارے لوگ بستر استراحت پردراز ہوگئے۔دو مداحان کومدعوکیاگیاتھا۔ جن میں سے ایک اپنی بائک سے اپنے ساتھی کے ہمراہ روانہ ہوگئے۔ دوسرے ثناخوان رسول جناب شہادت حسین حبیبی تھے جن کورخصت کرنے کے لیے ’’زیرومائل،گلاب باغ، پورنیہ ‘ جانا تھا۔عزیزم ناصر رضا ممبئی نے مجھ سے کہا کہ ’’شمس بھائی‘‘میرے ساتھ چلیں گے؟ ۔

میں نے سوچا کہ نیند تو ویسے بھی آنے والی نہیں ،چلو چلا جائے ،اسی بہانے پرانی یادیں تازہ ہوجائیں۔ بہر حال ہم تینوں فورویلر سے ’’زیرومائل‘‘ پہنچے ،بس کا انتظار تھا۔ اتنے میں عزیزم ناصر رضا وہاں کی مشہور دکان سے لذیذ و ذائقہ دار چائے لائے اورہم تینوں نے مل کرچائے نوشی کی۔ کچھ لمحات گفت وشنید کی محفل جاری رہی کہ اتنے میں سلی گوری جانے والی بس آگئی اورہمارے معزز مہمان ہم سے رخصت ہوگئے۔

وہاں سے ہم دونوں تقریباً ساڑھے تین بجے ’’دوگچھی‘‘پہنچے ۔ میں نے سوچاکہ اگرسوگیا توشاید فجرکی نماز ترک ہوجائے گی ۔ اسی لیے ناصر رضا کے ساتھ گفتگو شروع ہوگئی ۔ وہ اپنی آب بیتی سناتے رہے اورمیں سنتا رہا ……………….. عزیزم ناصر رضا ممبئی ہرسال عرس مخدومی کچھوچھہ مقدسہ اورعرس رضوی بریلی شریف جایا کرتے تھے ۔

اثنائے گفتگو انہوں نے مجھ سے کہا کہ اس بار عرس مخدومی میں آپ جا رہے ہیں کیا ؟۔  میں نے کہا اب تک ارادہ نہیں بنا ہے، دیکھتاہوں کیا ہوتا ہے؟ اتنا سن کر ناصر رضانے کہا کہ :’’میرا توٹکٹ کنفرم ہے !‘‘۔

نماز فجر ادا کرنے کے بعد ہم دونوں سوگئے اورپھرظہرکے وقت بیدارہوکر میں قطب پورنیہ حضور شیخ جمال الحق مصطفیٰ بندگی ودیگر اولیا چمنی بازار رضوان اللہ علیہم اجمعین کی بارگاہ کے لیے عازم سفر ہوا۔

اوراس طرح یہ ملاقات نہایت ہی خوش گوار رہی۔ گھرپہنچ کر تیسرے روز وطن اقامت کی جانب نکل پڑا اوریہاں پہنچ کر خدمت دین وسنیت میں مشغول تھا کہ ۲/اگست ۲۰۲۲؁ مطابق ۳/ محرم الحرام ۱۴۴۴؁ھ بروز منگل بعد نماز مغرب موبائل فون پر بیل بجی ،دیکھا توایک پرانے دوست کا نام اسکرین پرنظرآیا۔

کال رسیوکرتے ہوئے سلام ودریافت احوال سے فارغ ہواتو اس نے فوراً اطلاع دی کہ ناصر رضا ممبئی ہمارے بیچ نہیں رہے ! میری زبان سے اچانک یہ جملہ نکلا کہ بالکل غلط، ایسا نہیں ہوسکتا۔

اورواقعی میرے لیے یہ خبرناقابل یقین تھی ۔ کیوں کہ دو روز قبل ہی ناصر رضا نے پٹنہ سے بہت دیر تک بات کی تھی۔ اور طبیعت بھی درست ہی تھی۔ خیر اس نے کہا کہ آپ اس کی تحقیق کرلیں ۔ جب میں نے ان کے ماموں زاد برادران ودیگر خویش و اقارب سے رابطہ کرنے کی کوشش کی توکسی نے بھی فون رسیو نہیں کیا۔

اس کے بعد میری قلبی اضطرابی بڑھنے لگی ،جوں ہی سوشل میڈیا کھولاتو دیکھا کہ ہر طرف سے یہ جانکاہ خبر گردش کررہی ہے۔ تب دل نے کہا کہ واقعی ہردل عزیز بے لوث اور علما کا احترام کرنے والا،طلبہ سے شفقت برتنے والاہم سب کا پیارا’’ناصر رضا‘‘اللہ کوپیارا ہوگیا۔

زبان سے کلمہ استرجاع جاری ہوگیا۔ اورقلب ولسان نے رقت کے ساتھ دعائے مغفرت کیا۔ اورقلب مضمحل و ذہن مضطرب بول اٹھا:

کیا بھروسہ ہے زندگانی کا 

آدمی بلبلا ہے پانی کا

صبح ہوتی ہے شام ہوتی ہے 

زندگی یوں ہی تمام ہوتی ہے۔

فرش گیتی پر جو بھی آیا ہے اسے ایک نہ ایک دن داعی اجل کو لبیک کہنا ہے ،اور دارِ فانی سے دارِ بقا کو رحلت کرنا ہے۔ دنیا کے سفر میں ہر انسان محوِ سفر ہوتاہے کہ ایک روز دنیا اورآخرت کے درمیان موت کی دہلیز پر پہنچ جاتاہے۔ یہ بات بھی مبنی برحقیقت ہے کہ بغیر وقت مقررہ کے کسی کو ہر گز موت نہیں آسکتی ہے۔

یقین جانیں ناصر رضا ممبئی سے میری آخری ملاقات میں جو باتیں ہوئیں وہ ایک عظیم یاد گار ہیں ۔ اور ناصر رضا کا یہ جملہ کہ ” میرا تو ٹکٹ کنفرم ہے” اس نے موت سے پندرہ روز قبل ہی یہ آگاہ کر دیا تھا کہ سفر آخرت کے لیے میرا ٹکٹ بالکل کنفرم ہو چکا ہے ۔ اللہ رب العزت سے دعاہے کہ مولیٰ تبارک و تعالیٰ اپنے حبیب پاک صلی اللہ علیہ وسلم کے صدقے عزیزم ناصر رضا مرحوم کی مغفرت فرمائے اور جنت الفردوس میں جگہ عطا فرمائے آمین ۔

رنج کتنا بھی کریں ان کا زمانے والے

جانے والے تو نہیں لوٹ کے آنے والے

کیسی بے فیض سی رہ جاتی ہے دل کی بستی

کیسے چپ چاپ چلے جاتے ہیں جانے والے