حقیقی تصوف اسلام کی سچی تصویر ہے

حقیقی تصوف اسلام کی سچی تصویر ہے

دامن اسلام سے وابستہ ہونے والے پادری ہلیریا ہیگی کا اعترافی بیان ہمارے لیےچشم کشا ہے

ڈاکٹر غلام زرقانی

گذشتہ دو ہفتوں سے عالم عیسائیت دم بخود ہے ۔

ہوایہ ہے کہ کیلیفورنیا کے ایک مشہور پادری نے عیسائیت ترک کرکے دامن اسلام میں پناہ لے لی ہے ۔

خیال رہے کہ ہلیریاہیگی ماضی میں کئی چرچوں سے وابستہ رہے ہیں ۔ پہلے روسی ارتھوڈیکس ، پھر ایسٹرن کیتھولک چرچ سے منسلک رہے ۔

موصوف نےعیسائی پادری کی منصبی ذمہ داری اداکرنے کے لیے لازمی تعلیم مشہور سینٹ نازیانز ، ویسکونسن سے حاصل کی اور بیزانتائن کیتھولک پادری بنائے گئے ، اور ابھی حال ہی میں انھوں نے ایسٹرن کرسچن چرچ قائم کرنے کا اعلان کیا تھا۔

اس طرح آپ کہہ سکتے ہیں کہ ہلیریا ہیگی نے قلبی سکون کی تلاش میں وقفے وقفے سے کئی دروازوں پر دستک دی ہے، تاہم ان کی پیاس کہیں نہیں بجھی ، بالآخرچشمہ اسلام کے ایک گھونٹ نے انھیں پوری طرح سیراب کردیا۔

ہلیریاہیگی کا عیسائیت کے پادری ہونے سے لے کر اسلام تک کا سفر کوئی اچانک نہیں ہوا ہے ، بلکہ تقریبا دوعشروں پر محیط ہے ۔ انھوںنے اپنے اعترافی بیان میں کہا ہے :

By 2003, I yearned to become Muslim. I saw the beauty of it. The depth. The truth of it. I spoke with the Imam about conversion. I hung out at the local Islamic Center. I made Muslim friends. It was a beautiful and joyful moment. But I didn’t convert. At the time, I was too fearful of such a conversion

’’ میں نے ۲۰۰۳ء؁ میں اسلام قبول کرنے کا ارادہ کرلیا تھا۔ میں نے مذہب اسلام کی خوبصورتی دیکھی، میں نے اس میں گہرائی وگیرائی محسوس کی اور میں اس کی حقانیت سے متاثرہوا

یہاں تک کہ امام مسجد سے اسلام قبول کرنے کے بارے میں معلومات بھی حاصل کیں۔ میں مقامی اسلامی مرکز سے مربوط ہوااور مسلم دوست بنائے ۔ یہ تجربات میرے لیے نہایت ہی قابل مسرت تھے

لیکن میں نے اس وقت اسلام قبول نہیں کیا، کیوں کہ میں اس کے عوامی رد عمل سے کسی حد تک خوفزدہ تھا۔ ـ‘‘

اسلام سے قربت کی ابتداکے حوالے سے جو اطلاعات سامنے آرہی ہیں ، ان سے محسوس ہوتاہے کہ ہلیریاہیگی، جو اب سعیدعبداللطیف سے پہچانے جاتے ہیں ، عیسائیت میں رہبانیت اور اسلام میں فکر تصوف میں مماثلت تلاش کرتے رہے ۔

چناں چہ انھوں نے مغربی دنیامیں فکر تصوف کے لیے مشہور ومعروف مولانا رومی اور شیخ ابن عربی کے افکار وخیالات سے استفادہ کرنا شروع کیا، جو بالآخر دامن اسلام سے وابستگی پر منتج ہوا۔

ذرائع ابلاغ میں اسلام کی جو شبیہ پیش کی جاتی ہے ، اس نے بھی سعید عبداللطیف کے قبولیت اسلام میں منفی کردار ادا کیا۔ عالم اسلام میں قتل وخون اور سفاکیت وبربریت کے خوںچکاں حادثات نے ایسا تاثر دیا کہ وہ تھوڑی دیر کے لیے محسوس کرنے لگے کہ اسلام لانے کے بعد شاید معاشرہ انھیں ایک دہشت گرد کی طرح دیکھے گا۔

بہرکیف، اپنے نشرشدہ بیان میں موصوف لکھتے ہیں کہ میں نے کئی بار ارادہ کیا، لیکن ہمت نہیں جٹاپارہاتھا۔ کچھ تومعاشرے کا خوف ، کچھ اہل خانہ سے مزاحمت کا خیال اور پھر طویل عرصے تک ایک عظیم ذمہ دار منصب پر فائز ہوتے ہوئے ہزاروں لوگوں کی محبت وشفقت سے محرومی کا احساس اعلان حق کی راہ میں رکاوٹ بنا رہا، لیکن بالآخر میں نے طے کرلیا کہ گھر کے باہر عیسائیت کی تبلیغ اور گھر کے اندر اسلام سے محبت زیادہ دنوں تک ساتھ ساتھ نہیں چل سکتی ، اس لیے میں اپنے اسلام کا اظہار کر رہا ہوں ۔

ظاہرہے کہ بات اگر کسی عام شہری یا عصری تعلیم یافتہ فرد کے قبولیت اسلام کی ہوتی ، تویہ چنداں حیران کن نہ ہوتی، لیکن یہاں تو معاملہ مذہب عیسائیت میں کمال حاصل کرنے والے ایک سند یافتہ اور منجھے ہوئے تجربہ کار پادری سے متعلق تھا

اس لیے جنگل کی آگ کی طرح یہ خبر پوری دنیا میں پھیل گئی ، حتی کہ بڑے بڑے عیسائی مراکز نے صفائی دینے کی کوشش شروع کردی اور بہتوں نے تویہ پیشین گوئی تک کردی ہے کہ موصوف جلد ہی دوبارہ عیسائیت کی طرف واپس آجائیں گے ۔