خواتین کے حقوق کے تحفظ کے عہد کے ساتھ تعلیمی ہفتے کا آغاز

آل انڈیا علما بورڈ کے قومی جنرل سیکر یٹری علامہ بنئی حسنی نے کہا کہ علماء بورڈ آج کے اس اجلاس کے ساتھ تعلیمی ہفتے کا آغاز کر رہا ہے ہفتے بھر میں مختلف مقامات پر تعلیم سب کے لیے کے عنوانات پر جلسے منعقد ہوں گے اور آخری جلسہ 19 نومبر کو اورنگ آباد میں منعقد ہوگا۔

اس موقع پر ڈونگری پولیس اسٹیشن کی سینئر پولیس انسپکٹر شبانہ شیخ جو اس جلسے میں خصوصی طور پر مدعوتھیں نے آئمہ کی تنخواہ کے لیے ایک معیاری اسکیل مقرر کرنے کی صلاح دی ساتھ ہی ساتھ مسلم علاقوں میں نو جوانوں کی تربیت اور اصلاح کا مشورہ دیا۔

اسلام جمخانہ کے چیئرمین اور جلسہ کے مہمان خصوصی یوسف ابراہانی نے اظہار خیال کرتے ہوے اس بات پر افسوس کا اظہار کیا کہ قوم کے 98 فیصد افراد نے قوم کے ضرورت مند لوگوں کے بارے میں فکر کرنی ہی چھوڑ دی ہے ۔

انہوں نے کہا کہ ہمارے قوم میں اب بھی مخصوص طبقہ کے لوگ تعلیم پر توجہ دے رہے ہیں اور بڑا طبقہ خواب غفلت میں ہے اور یہ بڑے افسوس اور تشویش کی بات ہے ۔ انہوں نے دوٹوک انداز میں کہا کہ میٹنگوں اور جلسوں سے کچھ نہیں ہوگا اس پرٹھوس لائحہ عمل کے ساتھ کام کرنے کی ضرورت ہے ۔

پچھلے 40 سالوں سے مختلف شعبہ حیات میں قوم کی رہ نمائی اور ہزاروں طلبا کی مالی اعانت کر رہے ڈاکٹر محی علی پاشنکر نے قوم کو مشورہ دیا کہ وہ اگلے دس سالوں کے لیے سیاست ، دھرنوں اور مورچوں سے دور رہ کر صرف اور صرف تعلیم ،تجارت اور سرکاری ملازمتوں کے حصول کی کوششیں تیز کردیں ان شاء اللہ ملک میں قوم کے حالات سدھر جا ئیں گے ۔

انہوں نے اس بات کو بھی دہرایا کی موجودہ حکومت کو اقلیتوں کے مفادات کی کوئی فکر نہیں اس کے باوجود ہمیں ان سے بات چیت کے دروازے کھلے رکھنے چاہئیں اور ہر سطح پر بات چیت کرتے رہنا ہوگا۔

انہوں نے صلح حدیبہ کا حوالہ دیا اور کہا کہ قوم کوصلح حدیبیہ عمل کرنے کی ضرورت ہے ۔ انہوں نے زکوۃ کے اجتماعی نظام کے لیے اپنی جاری کوششوں کی تفصیلات فراہم کی اور علما بورڈ سے تمام مکتب فکر کے علماء کی ایک میٹنگ منعقد کرنے کی درخواست کی ۔

میٹنگ میں شمش العلما مولانا سید اطہر علی ، حیدرآباد سے آنے والے مولا نا ریاض الدین نقشبندی، نے یوم تعلیم کی مناسب سے سامعین کو خطاب کیا اور ہر حال میں تعلیم کے حصول پر زور دیا۔