یونیورسٹی جاتے علما ایک تجزیہ قسط سوم

یونیورسٹی جاتے علما ایک تجزیہ قسط سوم 

تحریر :محمد زاہد علی مرکزی

چیرمین : تحریک علماے بندیل کھنڈ

اعتراض (4) اگر مدارس میں پڑھنے والے طلبا کو ہم اس قدر عقائد میں پختہ نہ کر سکے کہ وہ مدارس کے ماحول سے نکلتے ہی داڑھی، ٹوپی یہاں تک کے مذہب کو بھی داؤں پر لگا دیں تو پھر ایسے نظام تعلیم کا کیا فائدہ جو آٹھ دس سالوں میں تصلب کا خوگر نہ بناسکا ؟ تشخص برقرار رکھنے کے گُر نہ سکھا سکا ؟ روٹی فراہم کرنے سے عاجز رہنے والے خوشوں کو آگ نہ لگا دی جائے؟ باندھ کر رکھا تو عقیدے پر قائم، آزاد ہوے تو سب کچھ گیا، گویا یہ خوبی نہیں مجبوری ہے

قسط اول پڑھنے کے لیے کلک کریں

قسط دوم پڑھنے کے لیے کلک کریں 

جواب : سننے میں یہ اعتراض بجا اور بھلا لگتا ہے لیکن بات ایسی ہے نہیں، جسے آپ مجبوری بتا رہے ہیں ذرا غور فرمائیں تو یہ بات بڑی دور تک جائے گی، پہلے دنیاوی قانون لے لیں پھر قانون الہی سمجھنا آسان ہوگا، دنیا بھر کی حکومتوں نے ہر چیز کے لیے قانون بنا رکھے ہیں جیسے قتل، چوری، ڈکیتی، زنا، لڑائی جھگڑا وغیرہ وغیرہ اب اگر لوگ قتل چوری وغیرہ سے رکے ہوے ہیں

تو یہ اسی قانون کی بنا پر رکے ہوئے ہیں، انسان کو تھوڑی سی آزادی مل جائے تو قتل و غارت گری کا وہ بازار گرم ہوگا کہ تصور بھی نہیں کیا جا سکتا، کسی کی عزت محفوظ نہ رہے گی، دور کیوں جائیے تقسیم ہند ہی دیکھ لیجیے، لا قانونیت کی بنا پر لاکھوں لوگ لقمہ اجل بن گئے، لوگوں نے برسوں پرانی رنجشیں نکالیں کیوں کہ قانون نافذ نہ تھا

اب اگر یہ کہا جائے کہ ایسی حکومتوں کا کیا فائدہ جو لوگوں کو جبرن قتل و غارت گری سے روکیں، اور جیسے ہی لاقانونیت ہو لوگ قتل و غارت گری پر اتر آئیں، “گویا یہ حکومتوں کی خوبی نہیں مجبوری ہے” لہٰذا حکومتوں کے ایسے قوانین سے کیا فائدہ؟ ساری عدالتیں بند کیجیے اور قانون کی کتابوں کو نذر آتش کر دیجیے کیوں کہ

جس کھیت سے دہقاں کو میسر نہ ہو گندم اس کھیت کے ہر خوشہ گندم کو جلا دو اب یہی چیز قانون الہی پر بھی منطبق کریے کہ اللہ رب العزت نے انسان کو شریعت کی زنجیروں سے جکڑا ہوا ہے، جب تک قانون الہی اسلامی عدالتوں کے ذریعے قائم رہا اسلامی سزائیں ملتی رہیں لوگ قابو میں رہے، اب آزاد ہوے تو سارے گناہ کرنے لگے “گویا یہ اسلام کی خوبی نہیں مجبوری ہے ” ایسے اسلامی نظام سے کیا فائدہ؟ خوبی تو تب ہوتی جب مسلمان بہر صورت نیکیاں ہی کرتا، (یعنی فرشتہ ہوتا، پھر انسان بنانے کا مقصد ہی فوت ہوا) اب کون سا مذہب اور کون سی حکومت آپ کے اعتراض کی زد سے محفوظ رہی ؟ –

—–ہم لوگوں کو دو طبقوں میں تقسیم کرتے ہیں اول علما، دوم پروفیسر، ماسٹر، ڈاکٹر، انجینئر وغیرہ، پھر دیکھتے ہیں کہ قوم کے ساتھ کون کتنا مخلص رہا ہے

ایک طرف علما جن کی حالت آج بھی خستہ ہے لیکن وہ اپنے کام سے پیچھے نہیں ہٹے، اور گھر گھر دین پہنچانے میں برابر کوشش کرتے رہے ہیں، کر رہے ہیں اور ان شاء اللہ کرتے رہیں گے، انھیں کی کوششوں کا نتیجہ ہے کہ آج دور دراز علاقوں تک بآسانی دین پہنچ رہا ہے، نیز ناگہانی حادثات کے وقت ان تک مالی امداد بھی فراہم کرتے /کراتے ہیں اور ان کی ضروریات کے وقت حسب حیثیت ان کے ساتھ کھڑے ہوتے ہیں

دوسرا طبقہ دنیاوی علوم کے علم برداروں کا ہے، کیا یہ لوگ علما کی طرح کام کر سکے؟ کتنے انسٹیٹیوٹ کا قیام کیا؟ بل کہ اصل تو یہ ہے کہ یہ لوگ اگر کوئی غریب پوچھنے پہنچ جائے کہ ہمارا بیٹا ہوشیار ہے ڈاکٹر /پروفیسر /انجینیر صاحب بچے کی رہنمائی کریں تو اس غریب کے جوتے گھس جاتے ہیں، پر کام نہیں ہوتا، کیوں کہ انھیں لگتا ہے کہ پھر علاقے میں ہمیں کون پوچھے گا؟ اس لیے کسی کی رہنمائی نہیں ہوتی – ( الا ماشاء اللہ)

علما نے گلی گلی مساجد کا قیام کیا، گاؤں گاؤں مدارس و مکاتب قائم کیے، لیکن دوسری جانب سناٹا رہا، اور آج ساری تباہی کا بوجھ بھی مولوی کے سر ڈال کر دنیا دار طبقہ خوش ہو رہا ہوتا ہے، یہ اس تھیوری پر عمل کرتے ہیں کہ “دشمن آپ پر حملہ کرے اس سے پہلے آپ حملہ کر دیں” لوگ ان سے سوال ہی نہ کر سکیں اس لیے مولوی صاحب کو پہلے ہی اتنا بدنام کر دو کہ آپ سے سوال کسی کے خیال میں بھی نہ آئے۔