تیری یہ ستم ظریفی کی کہیں نظیر نہیں ملتی

اگر انسانی حقوق کے تناظر میں دیکھا جائے توآسام حکومت کا یہ فیصلہ ایک بد بختانہ فیصلے کے مترادف ہے سب سے بڑا اور اہم سوال یہی ہیکہ کیا خواتین سے کم عمری میں شادی کرنے کے عوض میں مردوں کو جیل میں ڈالنے سے مسلئہ حل ہوجائے گا؟۔

ایک عام آدمی کا جواب بھی نفی میں آئے گا بلکہ یہ بھی کہے گا کہ نئے نئے مسائل پیداہوں گے جیل جانے والے شوہر کے بیوی بچوں کی کفالت کون کرے گا؟

ان کی پرورش اور دیکھ بھال کون کرے گا؟کسی بھی خاندان کا مضبوط ستون باپ ہوتا ہے حکومت اگر اسی کو سلاخوں کے پیچھے ڈھکیل دے گی تو کیا اسکا گھر اور خاندان نہیں اجڑے گا؟

کیا یہ حکومت کا اپنی رعایا کے ساتھ ظلم نہیں کہلائے گا؟

اس سے متعلق دو ہی اہم باتیں ہوسکتی ہیں یا تو یہ سب باتیں حکومت کی سمجھ سے پرے ہےیا پھر حکومت جانتے بوجھتے اس کام کو انجام دینا چاہتی ہے آسام ایک ایسی ریاست ہے جہاں اگر چہ کہ خواندگی کا کل تناسب 72 فیصد ہے لیکن ایسے بھی علاقے موجود ہیں

جہاں تعلیم کا دور دور تک فقدان نظر آتا ہے کچھ علاقے ایسے بھی ہیں جو فسادات کی نذر ہوجاتے ہیں جس کے بعد وہ آبادی مختلیف مسائل کا شکار ہوجاتی ہے خط غربت کی زندگی گذارنے والے خاندان تعلیم کا انتظام نہیں کرسکتے

ایسے خاندانوں کو صرف اپنی لڑکیوں کی شادی کی فکر لاحق ہوتی ہے وہ چاہتے ہیں کہ کسی بھی طرح محنت مزدوری کرتے ہوئے وہ اپنی لڑکیوں کی شادی کرواکر فراغت حاصل کرلیں آسام کے یہی علاقےمعاشی پسماندگی کا بھی شکار ہیں جن میں اکثریت مسلمانوں کی ہے

اگر آسام میں مسلمانوں کی تعلیمی صورتحال کا جائزہ لیا جائے تو معلوم ہوتا ہیکہ مسلمانوں کا تعلیمی تناسب 61.92ہے جو دیگر طبقات کے مقابلہ کم ہےجبکہ آسام کی کل آبادی کا35 فیصد تناسب مسلمان ہیں لیکن حکومت کی جانب سے تعلیمی مواقع فراہم نہیں کیے جاتے معاشی پسماندگی کو دور نہیں کیا جاتا نظم ونسق کی پابندی نہیں کی جاتی

اگر ایسی حکومت تعلیم ,معیشت,یا دیگر امور کو مضبوط نہیں بناسکتی تو انھیں ضرورت ہے کہ وہ پہلے اپنی رعایا کے بنیادی مسائل پر توجہ دیں لیکن آسام حکومت ان سب مسائل پر غور خوص کرنے کے بجائے قانون کی لاٹھی کاغیر انسانی رویہ کے طور پراستعمال کررہی ہے ابھی چائلڈ میارج ایکٹ کے

خلاف جو گرفتاریاں ہورہی ہے ان گرفتاریوں کی رپورٹ بتارہی ہے کہ اسمیں اکثریتی تناسب مسلمانوں کا ہے ایسے میں کئی سوالات بھی اٹھتے ہیں کیاآسام حکومت مسلمانوں کے خلاف سازش کے طور پر اس کام کو انجام دے رہی ہے؟

آسام کے ایم پی بدر الدین اجمل نے آسام حکومت پر الزام بھی لگایا کہ یہ مسلمانوں کے خلاف کوئی نئی سازش ہے۔

جس میں 90 فیصد سے زائد مسلمانوں کو گرفتار کیا جائے گا لیکن ہمارا ماننا ہیکہ یہ مسلمانوں کے خلاف سازش ہو یا نہ ہولیکن جس طریقے سے گرفتاری ہورہی ہو کیا وہ طریقہ ایک جمہوری ملک کے لیے مناسب فیصلہ ہے؟۔

ملک کا ہر شہری یہی کہے گا کہ یہ ایک جابرانہ نظام کا حصہ ہے کئی خاندانوں کی خواتین اپنے شوہروں کی گرفتاری کی وجہ سے بلک بلک کر رو رہی ہیں حکومت کے خلاف سڑکوں پر اتر کر احتجاج کررہی ہیں سوال پوچھ رہی ہیں کہ ہمارا گھر کون چلائے گا؟۔

لیکن آسام کی بے حس حکومت اپنی تانا شاہی میں مگن ہے جنھیں نہ اپنی رعایا کا درد نظرآرہا ہے نہ ان کی مشکلات,بات تو یہ بھی سمجھ سے باہر ہے کہ آسام حکومت شادی شدہ مردوں کو جیل میں ڈال کر ان کی ازدواجی زندگی کو کیوں تباہ کرنا چاہتی ہے؟

اگر حکومت اس کم عمری شادی پر روک لگانا چاہتی ہوتو وہ گذرے ہوئے کل سے آگے بڑھ کر آئندہ کا لائحہ عمل تیار کریں جس کیلئے تین نکات انتہائی اہم ہے پہلا نکتہ یہ کہ ایسے علاقے جہاں تعلیمی طور پر پسماندگی کا شکار ہوں وہاں تعلیم کو مروج کریں تعلیم سے متعلق عوام کو آسانیاں فراہم کریں تاکہ عوام میں تعلیم کے زریعہ قانون کے متعلق شعور بیدار ہوسکے

دوسرا نکتہ یہ کہ سماج میں کم عمر میں کی جانے والی شادی پر شعور بیداری مہمات چلائیں عوام کو قانون سے متعلق معلومات فراہم کریں اور کم عمر میں شادی کرنے پر ہونے والے نقصانات سے واقفیت کروائیں

تیسرا اہم نکتہ ہے کہ اگر حکومت چاہتی ہیکہ کم عمر کی شادی پر پابندی کے اثرات سماج میں مرتب ہوں تو اس کا اطلاق ہونے والی شادیوں سے کیا جائے نہ کہ گذری ہوئی شادیوں کو نشانہ پر لیا جائے حکومت شادی کے رسم و رواج کو ادا کرنے والے مذہبی پیشواؤں سے گفت و شنید کی جائے انھیں سرکاری طور پر اس چائلڈ میارج ایکٹ کا پابند بنائے پھر بھی باوجود اس کے اسکی خلاف ورزی ہوتی ہوتوجب قانون کا استعمال کیا جائے۔

لیکن حکومت ان سب کو درکنار کرتے ہوئے اپنے من چاہے فیصلے صادر کررہی ہے حکومت کو یہ یاد رکھنا ہوگا کہ وہ ایک جمہوری نظام کی حکومت چلارہی ہے جو آج اقتدارمیں ہے کل نہیں بھی ہوسکتے کمسن عمر میں لڑکیوں کی شادی جو قانونی طور پر جرم ہے

جس کا رپورٹ میں اوسط ہر سو میں 32 لڑکیوں کے متاثر ہونے کی تصدیق ہوئی ہے تو حکومت سے سوال یہ ہےکیا دیگر سنگین جرائم کا تناسب ریاست میں اس سے ذیادہ نہیں ہے؟پھر کیوں حکومت دیگر جرائم کے تدارک کے لیے کوئی منصوبہ نہیں بنارہی ہے ایسے نامناسب فیصلے ناکام حکمرانی کی بھی تصدیق کررہے ہیں کہا جاتا ہے حکومت اپنی رعایا کا اعتماد حاصل کرتے ہوئے چلائی جاتی ہے

اگر اسکے برعکس ہوتو وقت آنے پر رعایا انھیں دھول بھی چٹادیتی ہے بہر کیف ہم یہ کہہ سکتے ہیں کہ آسام حکومت کی یہ ستم ظریفی کی کہیں کوئی نظیر نہیں ملتی۔

سید سرفراز احمد,بھینسہ