خطۂ روہیل کھنڈ کی ممتاز وروحانی شخصیت حضرت سیدنا فیض بخش شاہ

اللہ نے آپ کو بہت سے فضائل بھی عطا فرمائے تھے ۔

پہلی فضیلت آپ کی یہ ہے کہ آپ کبھی بھی خود سے کشف وکرامت کا اظہار نہیں فرماتے تھے باوجود قدرت ہونے کے ہاں اگر کوئی آپ کا امتحان لیتا تو پھر آپ کرامت ظاہر فرمادیاکرتے تھے۔اسی طرح کبھی کسی کو خود سے بیعت نہیں کرتے جب تک کہ طالب بیعت خود سے اظہار نہ کر دیتا بیعت ہونے کا

چناں چہ آپ کے خادم یقین شاہ کا بیان ہے کہ ایک مرتبہ دوشخص آپ کی خدمت میں بیعت ہونے کے لیے حاضر ہوئے ان میں سے ایک یئومنون بالغیب کا نمونہ بن کر آیاتھا آپ نے اس کو فوراً بیعت فرمالیا،اور دوسرا شخص ابو جہل کی سی نیت لے کر حاضر ہوا تھا کہ آپ نے اگرکسی کرامت کو ظاہر فرمایا تو میں آپ سے بیعت ہو جاٶنگا ورنہ نہیں،اس نے آپ سے عرض کی کہ اس وقت آم کا موسم نہیں ہے آپ مجھے بے موسم دو یاتین آم عنایت فرمادیں میں آپ کے سلسلہ میں داخل ہوجائوں گا۔ یہ الفاظ سن کر آپ پر ایک دم جلالی کیفیت طاری ہوگئی

اور فوراً حضرت شاہ درگاہی صاحب نے اپنے خادم خاص یقین شاہ کوآواز دی کہ یقین شاہ!آج ایک شخص بے موسم آم کے پانچ دانے لے کر آیا تھاہمارے بستر کے نیچے رکھے ہوئے ہیں وہ لاکر اس بے یقین اور صفت ابو جہل لئے ہوئے شخص کو دے دو یہ ہماری زیارت اور ہم سے بیعت ہونے کے لیے نہیں بلکہ ہمارا امتحان لینے کے لیے آیا ہے اور اس کو فوراً ہماری محفل سے باہر کردویقین شاہ کہتے ہیں کہ آپ کے اس فرمان سے میرے تعجب کی کوئی حد نہ رہی اور میں سوچتا رہا کہ نہ آم کا موسم ہے اور نہ آم کا لانے والا ہے کوئی، اور اس شخص کو آم دے دئے گئے حضرت کی اس کرامت کودیکھ کر اس نے حضرت سے بہت معافی طلب کی لیکن حضرت نے اس کو بیعت نہیں فرمایا۔

دوسری خوبی:

اللہ نے آپ کو یہ عطا فرمائی تھی کہ آپ بہت زیادہ رحم ونرم دل تھے آپ انسانوں و جانوروں کے ساتھ بہت شفت سے پیش آتے گویا آپ مجسمہ رحمت تھے اگر آپ سفر کرتے اور راستے میں کوئی قصاب کسی جانور کو ذبح کرتا ہوا دکھائی دیتا تو آپ سے اس جانور کی تکلیف نہیں دیکھی جاتی تھی آپ قصاب سے اس جانور کو فوراً خرید کر آزاد کردیتے تھے۔اسی طرح ایک واقعہ میاں حبیب شاہ آپ کے اخلاق کے بارے میں ایک شخص سے نقل کرتے ہیں کہ وہ اور ان کی اہلیہ دونوں حضرت سے بیعت تھے اتفاق سے ان کی اہلیہ کو فالج ہوگیا اور جسم میں سوائے سانس کے قوت حرکت باقی نہ رہی اور اسی حالت میں ایک سال گزر گیا کہیں سے کوئی آرام نہیں ہوا

تو اس فالج زدہ عورت نے اپنے شوہر سے کہا کہ ہم حضرت شاہ درگاہی صاحبؒ کے مرید ہیں ان کو اپنے گھر مہمان بن کر آنے کی دعوت دوحضرت نے اس دعوت کو قبول کیا اور ان کے گھر تشریف لے گئے۔اس عورت نے اپنی فریاد آپ کے سامنے پیش کرتے ہوئے عرض کی کہ حضور آپ سے بیعت ہونے کا مقصد عذاب کے دور ہونے کی غرض ہے

لیکن یہ آپ کی فالج زدہ مریدہ دنیاو عقبیٰ کے درمیان عذاب میں گرفتار ہے اس لیے آپ سے میری عرض ہے کہ آپ دودعاٶں میں سے میرے لئے ایک دعا ضرور فرمادیں،یاتو میری روح میرے جسم سے پرواز کر جائے تاکہ میں دوسروں کی محتاجی سے آزاد ہوجاٶں یا پھر یہ دعا فرمادیں کہ میرے جسم میں پھر وہی طاقت واپس آجائے کہ جس طرح میں اس مرض سے پہلے تھی،حضرت نے اس مفلوجہ کی فریاد سن کر ازروئے رحم اس عورت کے شوہر کو حکم دیا کہ آپ ہمارے اسم اعظم کو پڑھ ان کے اُپر دم کیوں نہیں کردیتے تاکہ ’’یحی ویمیت‘‘(اللہ رب العزت)ہمارے اسم اعظم کی برکت سے اس کے حال پر اپنا رحم وکرم فرمائے اور اس کے بے جان ہاتھ پیروں کوچلنے پھرنے اوراس کے بے جان جسم کوحرکت کرنے کی طاقت عطا فرمادے۔

اس مرید معتقد نے آپ کا یہ فرمان سن کر آپ کااسم مبارک جوعین اسم اعظم تھا اور ہے کو اس مفلوجہ پر دم کرنا شروع کردیااس عمل کے تھوڑی ہی دیر بعد حضرت اس مفلوجہ کے گھر سے رخصت ہونے کیلئے اٹھے تووہ مفلوجہ عورت کہ جس کے ہاتھ پیروں نے کام کرنا چھوڑ دیا دیا تھاوہی عورت بغیر کسی کی مدد کے آپ کو رخصت کرنے کے لیے کھڑی ہوگئی اور دروازے تک آپ کو رخصت کرنے کے لیے آپ کے ساتھ آئی اور پہلے سے زیادہ تندرست ہوگئی،آج بھی اگر کسی مریض یا پریشان حال انسان کو آپکے اسم اعظم کا تعویذ دے دیا جاتا ہے یا اس پر دم کردیا جاتا ہے تو فوراً اللہ اس کو شفا عطا فرماتا ہے۔

تیسری خوبی:

اللہ نے آپ کو یہ عطا فرمائی تھی کہ اللہ نے آپ کو بہت زیادہ دوسروں کو نوازنے اور اپنی مخلوق کے حال پر بہت زیادہ کرم فرمانے والا بنایا تھااور آپ کے زمانے میں کوئی آپ کی نظیر نہیں تھااگر کوئی سائل ایک بار آکر اس دریائے عطا سے اپنے حصے کا لے جاتا پھر وہ اس روز دوبارہ یا اس سے زائد دس بار بھی آتا تو کسی مرتبہ بھی وہ محروم نہ جاتا بلکہ ہر بار سوا لیکر جاتا۔

چوتھی خوبی:

اللہ نے آپ کو یہ عطا فرمائی تھی کہ آپ عفو درگزر کا سراپا مجسمہ اور صبر وتحمل کا پیکر تھے اکثر خدام درگاہ سے نافرمانی یا کسی طرح کی گستاخی یا غلطی سرزد ہوجاتی بنا کسی تادیب کے آپ معاف فرمادیا کرتے تھے۔

پانچویں خوبی:

اللہ نے آپ کو یہ عطا فرمائی تھی کہ آپ کے مزاج میں غیرت درجہ اتم پائی جاتی تھی،گویا آپ کی ذات غیرت الٰہی کا پَرتَو نظر آتی اسی لئے آپ اپنے مریدین کو غائب وحاضر دونوں حالتوں میں کسی غیر کے حوالے نہیں کیا کرتے تھے۔اس کے متعلق یقین شاہ کا بیان ہے کہ جب حضرت شاہ در گاہی صاحب آخری مرتبہ ککرالہ سے رخصت ہوئے توآپ کو اللہ کی طرف سے ظاہر ہوگیا کہ اب دوبارہ اس مقام پر آپ کا آنا نہیں ہوگا اور یہاں کے لوگ مجھ سے ملاقات نہیں کر سکیں گے۔

آپ مصطفٰی آباد (رامپور)کی طرف سفر شروع کرتے وقت ککرالہ کی آبادی سے کچھ فاصلہ پر ویران جنگل میں تشریف لے گئے اور اس مقام وقصبہ کے ہر خاص و عام ،تمام مردو عورتوں،چھوٹے اور بڑوں سب کو اپنے پاس جمع ہونے کا حکم دیااور تاکید فرمائی کہ اگر کوئی خود سے آنے کی طاقت نہیں رکھتا ہوتو دوسرے کے سہارے یا اس کے کاندھے پر سوار ہو کرآ جائے،آپ کے اس حکم کی تکمیل کرتے ہوئے سب کے سب آپ کے پاس حاضر ہوگئے۔

اس مجمع میں سے حضرت شاہ درگاہی صاحب نے ہر چھوٹے سے چھوٹے بچہ کا ہاتھ اپنے دست مبارک میں لیا اور ان بچوں سے مخاطب ہو کر فرمایا کہ تم ہماری بیعت سے مشرف ہوگئے اور ان بچوں کے والدین کو نصیحت کہ جو کچھ ہم نے تم کو اورادو وضائف کی تلقین کی ہے جب یہ بچے ہوشیار ہوجائیں تو ان کو سب کچھ پڑھنا گنا سکھا دینا اور جس طرح میں اس وقت تمہارے پاس حاضر ہو ں میرے یہاں سے جانے کے بعد بھی مجھے اسی طرح اپنے پاس حاضر جاننا کسی اور کی طرف مائل نہ ہوجانا۔اور فرمایا کہ بچوں پر تمہاری تاثیر اب سے بھی زیادہ ہوگی کیونکہ اس وقت فقیر شمشیر در غلاف ہے ۔

اس کے بعد شمشیر برہنہ کی طرح صاف نظر آئے گا ۔اس کے بعد آپ نے مجمع سے مخاطب ہو کر دوسرا حکم صادر فرمایا کہ قیامت تک جو بچہ بھی آپ کے یہاں پیدا ہوگا ہم نے اس کا ہاتھ اپنے دست غیب میں لے لیا ساتھ ہی اس کو اپنی بیعت میں بھی قبول فرمالیا۔اور اگر وہ بچہ بڑا ہوکر دوبارہ بیعت کرنا چاہے ظاہری طور پر تو وہ ہماری بارگاہ کے خدام کی طرف رجوع کرے اور ان سے بیعت ظاہری کر لے آپ کے ان ارشادات کو سن کر سب کے سب مایوس ہو گئے کہ اس سے پہلے کبھی حضرت نے اس طرح کا کچھ ارشاد نہیں فرمایااور سب سمجھ گئے کہ اب حضرت کا اس دار فانی سے رخصت ہونے کا وقت قریب ہے۔

چھٹی خوبی:

اللہ نے آپ کو یہ عطا کی تھی کہ آپ اللہ کے بندوں سے محبت فرمانے میں اپنی نظیر نہیں رکھتے تھے چھوٹا، بڑا ،بزرگ جو بھی آپ کے سامنے آتا آپ اسے دیکھ کر خود اس پر فریفتہ ہوجاتے وہ جو بھی سوال کرتا اس کو فوراً عطا فرمادیتے چناں چہ ایک عورت جو بہت خوب صورت تھی

مگر اس کے ہاتھ پیر پیدائشی بیکار تھے گویا کہ وہ مادر زاد معذورہ تھی اس عورت سے اس کی قوم کا کوئی شخص نکاح نہیں کرتا تھاایک دن وہ حضرت کی بارگاہ میں حاضر ہوئی اور سارا حال حضرت کو سنا دیا

آپ نے ازراہ رحم اس کے اُپر نظر کرم فرمائی وہ ایک دم ایسی تندرست اور مکمل صحت مند ہوگئی کہ گویا اس سے پہلے اس کوکو ئی مرض ہی نہیں تھااور اس قدر تیز رفتار چلنے لگی کہ اگر اس کے متعارفین میں سے کسی کو قصبہ بریلی سے (جوآج شہر بریلی ہے)اوریہ مصطفی آباد (رام پور )سے دوروز کی پیادہ مسافت پر ہے (جوتقریباً65کلومیٹر ہے)سے کوئی چیز منگانی ہوتی یا کسی کو خط بھیجنا ہوتا تو وہ حضرت کا اسم اعظم لے کر اس عورت سے کہتا کہ فلاں شخص کویہ شئے یا کوئی خبر منگانی ہے تووہ عورت صبح کو روانہ ہوتی اور شام تک وہ خبر یا وہ چیز لے آتی حضرت کی نظر کرم سے اس کے اندرایسا جوش وجذبئہ الٰہی پیدا ہوگیا تھا کہ جب چلتی تو قدم آہستہ نہ اٹھاتی بلکہ بجلی کی طرح دوڑ تی ۔

اللہ نے آپ کو روحانی طاقت اس درجہ کمال کی عطا فرمائی تھی کہ جو جس مقصد سے آپ کی بار گاہ میں حاضر ہوتا وہ اپنے مقصد میں کام یاب ہوکر آپ کی بارگاہ سے واپس ہوتا آپ کے دربار میں آنے والا لفظ ’’لا‘‘کا تصور ہی نہیں کرتھا۔

ساتویں خوبی:

اللہ نے آپ کویہ عطا فرمائی تھی کہ دنیا داری کی طرف آپ کی توجہ بالکل نہیں تھی جیسا کہ یقین شاہ کا بیان ہے کہ میں نے ایک کیفیت آپ کی ایسی بھی دیکھی کہ سرتاپا برہنہ تھے اور میں آپ کی اس حالت کو دیکھ کر بہت حیران ہوا صبح کو حضرت نے میرے دل کے خطرات کو ازروئے مکاشفہ آگاہ ہوکر مجھے اپنے پاس بلایا اور فرمایا کہ ہم کو عریاں دیکھنا اس وجہ سے ہے کہ ابتدا سے انتہاء تک ہماری توجہ دنیا کی طرف سے بالکل ہٹی ہوئی ہے یقین شاہ فرماتے ہیں کہ آپ کا یہ ارشاد سن کر میرے دل کا خطرہ دور ہوگیا۔راوی کہتے ہیں کہ ایک مرتبہ میں نے حضرت کو نابینا دیکھا،اور دیکھتا ہوں کہ آپ کے گوشت کے ٹکڑے صنوبر سے مشابہت رکھتے ہیں مگر اس کی جسامت سے بڑے اور دونوں آنکھوں سے لٹکے ہوئے ہیں اس واقعہ سے میرے دل میں تین مہینے تک ایک عظیم خطرہ رہا اور میں اس خطرے کو حضرت سے عرض کرکے دفع کرتا مگر حضرت اس دار فانی سے عالم بقا کی طرف کوچ فرما چکے تھے ۔

مگر توجہ معنوی اور ارشاد روحانی کیلئے گویا آپ ہمارے واسطے موجود تھے چناں چہ حضرت کے ہی تصرفات عالیہ سے مجھے ’’منہاج السالکین ‘‘ کے مطالعہ کا شوق ہوااس میں، میں نے پڑھاکہ ایک شخص نے خواب میں اپنے پیر کو دونوں آنکھو سے نا بینا دیکھا اور وہ اس خواب کو لے کر اپنے پیر کی خدمت میں حاضر ہوامگر اس کے روشن ضمیر پیر نے اس کے بیان کرنے سے پہلے ہی خواب کی تعبیر دیکر اس کو تسلی بخشی اور ارشاد فرمایاکہ اگر کوئی پیر کو ایک آنکھ سے نابینا دیکھے تو سمجھو کہ مقام ’’جبروت‘‘ میں ہے ابھی کامل نہیں،اور اگر دونوں آنکھو ں سے نابینا دیکھو تو سمجھ جائو میرا پیر درجہ ’’لاہوت ‘‘ پر فائز ہے اور کامل ہے یعنی اس کو فنا اور بقا دونو حاصل ہوچکی ہیں۔

راوی کہتے ہیں کہ کتاب کی اس عبارت کوپڑھ کر میں سمجھ گیا کہ یہ بھی حضرت کی کرامت ہے کہ اپنا درجہ کمال کو پہنچا ہوامقام غلام کو خواب میں دکھا دیا اور تین ماہ بعد دل بے قرار سے خطرہ دور ہوگیااور میں سمجھ گیا کہ دونوں آنکھوں کوایک حالت میں دیکھنااس بات کی دلیل ہے کہ آپ درجہ ’’لاہوت ‘‘ پر فائز ہیں اس وقعہ سے معلوم ہوا کہ آپ کی منزلت کے لیے  لامکاں کی طرح کوئی منزل ہی باقی نہیں رہی۔

آٹھویں خوبی:

اللہ نے آپ کو یہ عطافرمائی تھی کہ آپ خاکساری،صبروتحمل،بردباری کا مکمل پیکر تھے راوی کہتے ہیں کہ ایک رات حضرت کو میں نے ایک محفل میں دیکھا اور اس محفل میں حضرت کی خاکساری اس قدر تھی کہ میں دیکھ کر حیران رہ گیا۔

اچانک ایک شخص جس کا نام سلطان تھا اوروہ حضر ت محبوب الٰہی کا مرید بھی نہیں تھا اس نے میرے بیان کی تصدیق کرتے ہوئے ایک واقعہ حضرت کابیان کیاکہ میری شادی کو کچھ ہی عرصہ گزرا تھا ایک دن میں اپنی خسرال گیا میں نے دیکھا کہ حضرت محبوب الٰہی میری خوش دامن کے یہاں مہمان ہیں اور تمام عورتیں بے پردہ آپ کے سامنے ہیں یہ دیکھ کر مجھے نہایت ہی برالگااور آپ کا یہ طریقہ پسند نہیں آیاکہ ایک فربہ جسم والا انسان نا محرم بے حجاب عورتوں کے سامنے بیٹھا ہوا ہے۔

لیکن آپ سے میں نے کچھ نہیں کہا اور میں اضطرابی حالت میں آگیا اور میں دیوانہ وار صحن میں ٹہلنے لگا اور حضرت کی یہ سب باتیں میرے دل میں گردش کر رہی تھیں اسی غصہ کی حالت میں میری نگاہ اپنے پاؤں پر پڑی اور میں نے دیکھا کہ حضرت کا جسم پورے صحن میں بکھرا ہوا ہے اور میرے پیروں کے نیچے آرہا ہے میں نے یہ سب کچھ دیکھ کر بہت غور کی پھر سوچا ہوسکتا ہے کہ یہ میرا وہم ہولیکن حضرت کے جسم کے سوا صحن میں مجھے خاک کا ایک ذرہ بھی نظر نہیں آرہا تھابہت دیر تک اسی کیفیت میں رہنے کے بعد ایک دم میرے اُپر خوف طاری ہوگیا

اور میں نے حضرت سے معافی طلب کی اور عرض کی کہ میں سمجھ گیا کہ آپ کس قدر خاکساری،عاجزی انکساری،صبروتحمل کا پیکر ہیں اس کی مثال ناممکن ہے۔ حضرت کے اوقات کا یہ حال تھا کہ ہر لمحہ استغراق ومحویت کے عالم میں رہتے تھے دن ہو یارات آپ کسی سے کلام نہیں فرماتے اگر چہ جذب کی منزل طے کرکے سلوک کی منزل پر فائز ہو چکے تھے مگر پھر بھی آپ کی حالت جذبی سلوک پر غالب تھی اور ہمیشہ آپ کا حال یہ ہوتا کہ نہ مکمل طریقے سے سوتے اور نہ مکمل طریقے سے جاگتے بلکہ آپ پر ایک طرح کی غنود گی طاری رہتی

حضرت سے اس کیفیت کا سبب معلوم کیا گیا تو آپ نے ارشاد فرمایا کہ فقیر کے دل سے اللہ کے علم کے سوا ہر علم نکل گیا ہے بس ہمیں اللہ کے سوا کچھ یاد نہیں آتا یہاں تک کہ ہمیں اپنی بھی خبر نہیں ہوتی کہ ہم خود کس حالت میں ہیں۔ایسی جذبی حالت نہ حضرت سے پہلے کسی بزگ میں دیکھی گئی اور نہ حضرت کے بعد۔

نویں خوبی:-

اللہ رب العزت نے حضرت محبوب الٰہی کو یہ عطا فرمائی تھی جس کا دین سے بہت اہم تعلق ہے کہ کبھی بھی آپ کے در بارسے کوئی بھوکا نہیں جاتا تھا چاہے دن ہو یارات آپ کے خادم خاص یقین شاہ بیان کرتے ہیں کہ ایک روز آدھی رات کے وقت چالیس مہمان آگئے جو حضرت کے دست مبارک پر بیعت تھے چونکہ میں(یقین شاہ)خانسامہ تھا حضرت محبوب الٰہی نے مجھے حکم دیا کہ یہ لوگ سفر طے کر کے آرہے ہیں بھوکے ہوں گے ان کے لیے کھانا تیار کرو!مہمان کابھوکا رہنا اچھا نہیں ہے،خانسامہ کہتے ہیں کہ میں نے حضرت سے عرض کی اس وقت آدھی رات میں بازار سے کون آٹا لے کر آسکتا ہے ؟۔

یہ سن کر حضرت غضب ناک حالت میں آگئے اور فرمایا یہ احمق مہمان ہم کو امیر سمجھتے ہیں امراء ورؤسا کے یہاں آدھی رات کو کھانا دستیاب ہوجاتا ہے ہمیں توخود اپنی خبر نہیں تو ہمیں کھانے کے سامان کی کیا فکر ہوگی کہ مطبخ میں ہے یا نہیں؟ اس کے بعد حضرت نے فریا جاؤ سیر دوسیرجس قدر بھی آٹا ہے اس کی روٹیاں پکا لو کمی و بیشی کی فکر نہ کرو امیروں کا سامان ان کے گھر میں ہوتا ہے فقیروں کا معاملہ خالق کائنات کے حوالے ہوتا ہے

خانسامہ کہتے ہیں کہ میں حضرت کی حکم کی تکمیل کرتے ہوئے روٹیاں پکاکر حضرت کی بارگاہ میں لے کر حاضر ہوا آپ نے فرمایا کہ روٹیاں مہمانوں کے سامنے رکھ دو اور اپنی چادر روٹیوں کے اُپر ڈال دو اور مجھے حکم دیا کہ خود بھی روٹیوں کے پاس بیٹھ جاٶکپڑا ہٹاکر نہ دیکھنا اور نہ کچھ کسی سے کہنا سنا جب تک کہ سب کھانا نہ کھا لیں اورچارروٹیاں نکال کر مہمانوںکے سامنے رکھنا جب ان کوکھا لیں پھر چار نکال کر رکھ دینا۔

اسی طرح سب ختم کر دینا خانسامہ کہتے ہیں میں نے حکم کو پورا کرتے ہوئے مہمانوں کو کھانا کھلایا اور ان میں سے ہر ایک نے خوب کھایا اوربعد میں،میں نے دستر خوان کو سمیٹ لیااور میں نے چادر ہٹا کر دیکھا تو الحمد للہ جتنی روٹیاں میں نے تیار کی تھیں سب کی سب چادر کے نیچے موجود تھیں،اور مہمان کھاتے وقت آپس میں ایک دوسرے سے کہہ رہے تھے کہ اللہ کی قسم!کہ ایسی لذیذ روٹیاں ہم نے کبھی نہیں کھائیں روٹیاں کھاتے ہوئے ہماری عمر گزر گئی اور نہ اس قدر کبھی سیر ہوئے ۔

یہ جھلک ظاہر فرمائی تھی آپ نے بشکل کرامت حضور صلی اللہ علیہ وسلم کے اس معجزے کی کہ جنگ خندق کے موقعہ پر حضور صلی اللہ علیہ وسلم کے ساتھ کثیر صحابہ کرام کی جماعت حضرت جابر رضی اللہ عنہ کے مکان پر تشریف لے گئی سخت بھوک کی وجہ سے،حضرت جابر رضی اللہ عنہ کے یہاں چند آدمیوں کے کھانے کا انتظام تھا کثیرصحابہ کی جماعت کو حضور صلی اللہ علیہ وسلم کے ساتھ دیکھ کر آپ کو فکر ہونے لگی کہ یہ چند آدمیوں کا کھانا اس جماعت کو پورا نہیں ہوپائے گالیکن ساتھ میں شہنشاہ کونین کے ہونے کی وجہ سے ان کی یہ فکر ختم ہوگئی،آقا علیہ السلام کے حکم کے مطابق سب کو کھانا کھلایا گیا سب نے خوب سیر ہوکرکھایا اور کھانے میں ذرہ برابر کمی واقع نہیں ہوئی اور حضور کے حکم کے مطابق وہ کھانا بعد میں دوسرے بھوکے لوگوں کو بھی تقسیم کیا گیا۔

یہی حال شہنشاہ کونین کے غلاموں کا ہوتا ہے کہ جو اپنے آپ کو ذات مصطفی کے ذریعہ ذات الٰہی میں فناء کر دیتا ہے تو اس کے دربار سے دن ہو یا رات اپنا ہو یا غیر کوئی بھوکا نہیں جاتا ہے ۔آج بھی محبوب الٰہی کے دربار کا یہی حال ہے کہ عرس کے ایام کے علاہ بھی سال کے عام دنوں میں بھی لنگر تقسیم ہوتا رہتا ہے اور مخلوق خدا جوق در جوق آرہی ہے اور محبوب الٰہی کے فیض سے فیض یاب ہو رہی ہے اور ان شاء اللہ تا قیامت محبوب الٰہی کے فیض کا دریا اسی طرح مخلوق خدا کے لیے جاری رہے گا۔ حضرت محبوب الٰہی کی صفات میں یہ بات بھی شامل تھی کہ آپ تمام اولیاے کرام کے سردار حضرت غوث الثقلین محبوب سبحانی قطب ربانی سیدنا شیخ عبد القادر جیلانی کا تصور کثرت کے ساتھ کرنے کی وجہ سے ہو بہو آپ غوث اعظمؒ کے مثل و مشابہ ہو گئے تھے جن حضرات نے آپ کو دیکھا ان کی تصدیق ہے کہ دونوں کی وضع و شکل میں کوئی فرق نہیں تھا گویا تصور غوث صمدانی کے سبب حضرت محبوب الٰہی عین قطب ربانی ہو گئے تھے ۔

اس کی تفصیل اس طرح بیان کی گئی ہے کہ حضرت قدوقامت میں دلکش اوسط درجہ کے تھے

آپ کا رنگ چمک دار خوب صورت تھا ، آپ کی چشمان مبارک بھی اوسط درجہ کی تھیں،چہرئہ مبارک گول تھا اور ناک بھی چہرے کی طر ح دیکھنے میں گول و خوب صورت تھی ، دونوں لب باریک تھے ، آپ کا دہن مبارک زیادہ کشادہ نہیں تھا، آپ کے دندان مبارک موتیوں کی لڑی کی طرح ایک دوسرے سے جڑے ہو ئے تھے ، ریش مبارک بڑی اور گولائی میں تھی،گردن دراز تھی ، سینئہ مبارک کشادہ تھا ، جسم مبارک ابتدا سے جوانی کے آخری حصہ تک حالت جذب کی حرارت کی وجہ سے کمزور رہا،لیکن بزرگی(حالت ضعف)کے زمانے میں جب آپ جذ ب سے سلوک کی طرف آچکے تھے تو موٹا ہوگیا تھااور (معمولی سا) شکم بھی نکل آیا تھا،غرض کہ آپ کے چہرئہ مبارک و ریش مبارک کی خوبصور تی کو دیکھ کر معلوم ہوتا تھا کہ یہ چمکتا ہوا در نایاب آفتاب وماہ تاب ہے ۔

اور اس آفتاب حق سے جو نور کی شعاعیں نکلتی تھیں تو ایسا معلوم ہوتا تھا کہ اس کے سامنے آفتاب کی بھی کیا تاب کہ اس شان کے ساتھ اپنی چمک دمک کا دعوایٰ کرے۔ آپ مرشد معظم سلطان الاولیا حضرت سیدنا حافظ شاہ جمال اللہ صاحب کے اس قدر منظور نظر تھے اگرحضرت حافظ صاحب کے پاس کوئی دعا کرانے کے لیے اپنے حق میں حاضر ہوتا تو حضرت حافظ صاحب فرماتے جاٶ درگاہی کے پاس جاٶ ان سے اپنے حق میں دعا کراؤ۔

چناں چہ لوگ آپ کے پاس حاضر خدمت ہوتے اور عرض کرتے کہ بڑے حضرت نے ہمیں چھوٹے حضرت کے پاس بھیجا ہے اور وہ لوگ آپ کو اپنی آپ بیتی سناتے،آپ مر شد معظم کے حکم کو پورا کرتے ہوئے ان پریشان حال لوگوں کے حق میں دعا فرماتے اللہ رب العزت آپ کی دعاؤں کو اپنے بندو کے حق میں شرف قبولیت عطا فرماتا،اللہ نے اپنے اس ولی کامل کو مستجاب ا لدعوات بنایا تھا کبھی اللہ آپ کی دعاؤں کو رد نہیں فرماتا۔آپ اپنے وقت کے غوث تھے اور غوث وہ ہستی گرامی ہوتی ہے کہ اگر وہ اللہ تعالیٰ کی قسم کھا لے کسی کام کے واسطے تو اللہ اس کی قسم کو پورا فرماتا ہے اس کی دعا کورائیگا نہیں جانے دیتا۔

بہر حال آپ کا دل عشق الٰہی سے معمور اورحب مصطفی صلی اللہ علیہ وسلم سے پُر تھا آپ کی ذات مبارک سے مخلوق خدا کو خدا تک رسائی حاصل ہوئی، شاہ وگدا سب آپ کی چو کھٹ کے غلام بنے یہاں تک کہ نوابین رامپور نے بھی آپ کی بے حد تعظیم و توقیر کی اور عقید ت و احترام کا آپ کے ساتھ سلوک کیا۔

آپ کی ظاہری حیات میں کثیر مخلوق خدا نے آپ سے فیض حاصل کیا اور بعد وصال بھی اللہ رب العزت نے اس فیض باطنی میں خوب اضافہ فرمایا اور یہ فیض آپ کے خلفا کے ذریعہ بر صغیر پاک وہند کی سرحدوں کو پار کرکے دوسرے ممالک تک پہنچا جیسا کہ بنگلہ دیش ، افغانستان ، لنکا ، برما، بخارا ، ایران ، ترکی ، سمرقند اور ملک عرب تک آپ کے خلفا کی رسائی ہے۔

بہر حال آپ کے خلفاء کی صحیح تعداد شمارکرنا ممکن نہیں ہے آپ کے خلفاء کا دائرہ بہت وسیع ہے جن میں سے کچھ کو بہت زیادہ شہرت حاصل ہوئی اور ان میں سے بھی ایک ہستی گرامی حضرت شاہ سلطان امام الدین غالب جہاں قدس سرہٗ آپ کے خلیفہ اکبر و جانشین اعظم تھے اور انہی نے آپ کی صحبت بابرکت میں رہ کر آپ کے جن حالات و واقعات کا خود سے مشاہدہ کیاان کو آپ نے اپنی کتاب ’’مجمع الکرامات ‘‘ میں جمع کیا ۔محبوب الٰہی کے در کے اس معمولی سے غلام (محمد محفوظ قادری)نے بھی ’’ مجمع الکرامات ‘‘ سے استفادہ کرکے آپ کی چند خصوصیات و صفات اور کرامات کو تحریر کرنے کی جسارت کی ۔ در حقیقت آپ کی ذات گرامی اتنی جلیل القدر ہے کہ تحریر میں لانا آسان کام نہیں ہے کیونکہ غوث اعظمؒ کے بعد اگر کسی ولی کامل سے تواتر کے ساتھ کرامات کا اظہار ہوا ہے تو وہ حضرت محبوب الٰہی کی ذات اقدس ہے آپ کے سوا کوئی دوسری ذات گرامی ہمیں نظر نہیں آتی۔

اللہ رب العزت آپ کے غلام کی اس معمولی سی سعی کوآپ کے دربار میں قبول فرماکر مقبو ل وخاص وعام بنائے اور محبوب الٰہی سے دونوں جہان کی وابستگی عطافرمائے۔

آپ کا وصال 14جمادی الاخریٰ1226ھ مطابق 6 جولائی 1811ء کو مصطفی آباد عرف رام پور میں ہوا۔مزار مبارک باغ پختہ پر واقع ہے جو آج تک مرجع خلائق بنا ہوا ہے اور تا قیامت ان شااللہ بنا رہے گا ۔

اللہ رب العزت اپنے اس محبوب بندے کے ظاہری و باطنی فیضان سے اپنے بندوں کو خوب فیض یاب فرمائے۔

از۔ محمد محفوظ قادری ،رامپور یو۔پی

9759824259