دہلی کی جامع مسجد نقوش و تاثرات

مینا بازار کے راستے ہم مشرقی دروازے کی جانب بڑھ رہے تھے اور اس کی خصوصیات اور اپنی قسمت پر نازاں تھے کہ یہی وہ ۳۵ سیڑھیوں پر مشتمل زینہ ہے جس کے ذریعے بادشاہ مسجد میں داخل ہوتے تھے، جس مشرقی دروازے سے ہم داخل ہو رہے تھے اس کا نام گیٹ نمبر دو اور باب شاہجہاں ہے، جیسے ہی ہم مکمل سیڑھیاں چڑھ کر اوپر پہنچے اور پیچھے مڑے جسم پر لرزہ طاری ہوگیا۔

ذہن ایک کے بعد ایک تحریری نقوش سامنے رکھنے لگا، اور دل باوجود صدی بیت جانے کے بےمہار دھڑ کے جا رہا تھا کیونکہ سامنے ایک ایسی عمارت اور ندی تھی جسے تاریخ لال قلعہ اور جمنا ندی کا نام دیتی ہے، اور چند منٹ ساکت جسم کے ساتھ ہماری ڈبڈباتی آنکھیں اس کھائی کو دیکھنے کی کوشش کر رہی تھیں

جس میں بادشاہ کے کئی سپاہی انگریزوں سے اپنی جان بچانے کے لیے کود پڑے تھے، اور پھر جاں بحق ہوگئے تھے، آج لال قلعہ کا وہ دردناک منظر آنکھوں کے سامنے تھا جسے تاریخ نے اپنے لفظوں میں پیوست کر رکھا ہے۔

خیر نمدیدہ ہم پھر مسجد کی طرف مڑے اور صحن میں داخل ہونے لگے، نیچے پاؤں تپا دینے والے سرخ سنگ ریزے تھے اوپر چلچلاتی دھوپ تھی مگر ہمارے اندر شوق تھا،۔

جذبہ تھا اپنے بادشاہ کی عظمت کو قریب بالکل قریب سے دیکھنے کا سو ہم نے سب برداشت کیا، وہ صحن (جس میں کم و بیش پچیس ہزار افراد بیک وقت نماز ادا کر سکتے ہیں) عبور کر کے مسجد کی عمارت میں پہنچے، ہم نے صحن کے بیچ و بیچ ایک بڑے اور گہرے حوض کا بھی پڑھ رکھا تھا تو اس کے قریب گئے اور شوق کی آنکھوں سے بغور دیکھا۔

پوری مسجد میں سیاحوں اور لطف لینے والوں کی خوب بھیڑ تھی، کچھ لوگ سیلفیوں میں کچھ رشک بھری نگاہوں سے ہاتھ اٹھا اٹھا کر اپنے ساتھیوں کو معلومات دینے میں تو کچھ حوض پر وضو وغیرہ میں مشغول تھے

کچھ اللہ کے خاص بندے بندیاں ایسی بھی تھیں کہ ہم نے دیکھا کہ وہ مسجد میں نمازوں میں مصروف ہیں، کچھ عورتیں ملازمین کی سختیوں پر نکتہ چیں تھیں غرض کہ پورا ماحول نہایت خوشگوار تھا،

گرمی بھی شدت کی تھی مگر مسجد کے ارد گرد اور اندر تو گرمی نام کی کوئی چیز ہی نہیں تھی، بغیر پنکھے کے ٹھنڈی ٹھنڈی ہوائیں ہم سے ٹکرا رہی تھیں، واقعی ایسی خوشگوار فضا دنیا کے بازار میں ہرگز نہیں مل سکتی۔

یہ اللہ کی بڑی عظیم نعمت ہے کہ پورے شہر کے لوگ اس کے سائے میں آکر چند گھنٹے سکون کے ساتھ بیٹھتے ہیں ورنہ دہلی کی گرمی ایسی ہوتی ہے کہ بس اللہ ہی کی پناہ۔ 

تھوڑی دیر ادھر ادھر نظارہ کرنے کے بعد ہم نے قصد واپسیں کیا اور پھر جامع مسجد میٹرو اسٹیشن پلیٹ فارم نمبر دو سے جامعہ ملیہ اسلامیہ ہوتے ہوئے شاہین باغ پہنچے۔ یہ دوسری اور آخری قسط دو نششت میں یہیں شاہین باغ میں مکمل ہو رہی ہے۔ 

قارئین جامع مسجد کی تاریخی حیثیت کے سلسلے میں چند معلومات ویکیپیڈیا سے مستعار لے کر آپ کی خدمت میں پیش ہے اسے بھی پڑھ کر معلومات میں اضافہ کریں۔

” مسجد جہاں نما جو جامع مسجد دہلی کے نام سے مشہور ہے، بھارت کے دار الحکومت دہلی کی اہم ترین مسجد ہے۔ اسے مغل شہنشاہ شاہجہاں نے تعمیر کیا جو 1656ء میں مکمل ہوئی۔ یہ بھارت کی بڑی اور معروف ترین مساجد میں سے ایک ہے اور پرانی دلی کے مصروف اور معروف ترین مرکز چاندنی چوک پر واقع ہے۔

بنیادی معلومات

سنہ تقدیس

6 اکتوبر 1650ء

تفصیلات

گنجائش 25,000

لمبائی 40 میٹر (130 فٹ)

چوڑائی 27 میٹر (89 فٹ) 

گنبد 3

مینار 2

مینار کی بلندی

41 میٹر (135 فٹ)

مخروطہ کی بلندی

40,000 میٹر (130,000 فٹ)

مواد

لال سنگ ریگ، سنگ مرمر

مسجد کے صحن میں 25 ہزار سے زائد افراد کی گنجائش ہے۔ اس کی تعمیر پر 10 لاکھ روپے کی لاگت آئی۔

شاہجہاں نے اپنے دور حکومت میں دہلی، آگرہ، اجمیر اور لاہور میں بڑی مساجد تعمیر کرائیں جن میں جامع مسجد دہلی اور لاہور کی بادشاہی مسجد کا طرز تعمیر تقریباً یکساں ہے۔

مسجد کے صحن تک مشرقی، شمالی اور جنوبی تین راستوں سے بذریعہ زینہ رسائی حاصل کی جاسکتی ہے۔ مسجد کے شمالی دروازے میں 39، جنوبی میں 33 اور مشرقی دروازے میں 35 سیڑھیاں ہیں۔ مشرقی دروازہ شاہی گزر گاہ تھی جہاں سے بادشاہ مسجد میں داخل ہوتا تھا۔

مسجد 261 فٹ طویل اور 90 فٹ عریض ہے، اس کی چھت پر تین گنبد نصب ہیں۔ 130 فٹ طویل دو مینار بھی مسجد کے رخ پر واقع ہیں۔ مسجد کے عقبی جانب چار چھوٹے مینار بھی موجود ہیں۔

اظفر منصور

8738916854