زمین حجاز پر بیتے دو عشرے

ہماری حریف جماعتوں نے ایک مدت سے عرب کی یہ نبض پکڑ رکھی ہے اور دھڑلے سے برصغیر ہند و پاک کی نہ صرف اپنی بلکہ اہل سنت و جماعت کی اجازتیں بھی اپنے طرق پر تقسیم کرتے ہیں۔ یہ کام اتنی چابک دستی سے ہو رہا ہے کہ کچھ یار لوگوں نے تو اسی شغل کو مقصد حیات بنا رکھا ہے اور اس بابت وہ اتنے متحرک ثابت ہوئے ہیں۔

کہ انھوں نے اپنے سلسلوں کی مضبوطی کے لیے دنیا جہاں کی سیر و سیاحت کر کے تین تین ہزار تک اسناد و اجازات جمع کر رکھی ہیں اور اسی سے اندازہ لگایا جا سکتا ہے کہ بازار کا مزاج کیا ہے۔ خوشی کی بات ہے کہ بشارت بھائی نے کتابی پروجیکٹس کی طرح اس سلسلے میں بھی منظم طور پر کام شروع کر رکھا ہے، اللہ خوب برکتوں سے نوازے۔ رات بھر علمی، کتابی اور دیگر ملی مسائل پر خوب باتیں رہیں۔ یقیناً ان سے مل کر انرجی تازہ ہو جاتی ہے۔

باب السلام کی طرف احاطہ حرم سے باہر زیادہ تر وقت مقفل رہنے والی ایک لائبریری بنی ہوئی ہے، جس کے بارے میں کہا جاتا ہے کہ وہ اصل مولد رسول ہے، جسے گزرتے زمانے کے ساتھ بدلا جاتا رہا اور اب اس کی شکل لائبریری کی ہے۔ بتاتے ہیں کہ پہلے اس کی زیارت کرنے والوں پر سختیاں کی جاتی تھیں

لیکن آج کا لبرل ازم اس سلسلے میں چشم پوشی سے کام لیتا ہے۔ اسی لائبریری کے ٹھیک سامنے حرم شریف کے اندر ایک حمام بنا ہوا ہے، جس کے بارے میں عام ہے کہ وہ وہ ابو جہل کا مکان ہوتا تھا۔ عمرہ کرنے والوں کا صفا اور مروہ کی سعی کے بعد اسی حمام کے قریب سے نکلنا ہوتا ہے۔

اسی جانب حرم شریف کو ٹچ کرتے ہوئے کوہستانی سلسلے کا حصہ شاہی محل ہے۔ بادشاہ سلامت جب تب یہاں تشریف لاتے ہوں گے لیکن ان کی شاہانہ سطوت نے حرم شریف کا دائرہ ضرور تنگ کر رکھا ہے۔ بتاتے ہیں کہ دنیا بھر سے آنے والے وی وی آئی پی مہمانوں کا قیام اسی محل میں ہوتا ہے اور اسی کے ایک حصے سے امام حرم کی بھی آمد و رفت ہوتی ہے۔

افواہ ہے کہ حرم محترم کی مستقبل قریب میں ہونے والی نئی توسیع کے لیے محل سمیت اس پہاڑ کو یہاں سے ہٹایا جائے گا۔ سر اٹھا کر دیکھنے کے بعد محل کی دیوار کے ایک حصے میں ایک طاقچہ نظر آتا ہے، جس کے بارے میں شور رہتا ہے کہ وہ اس بڑھیا کا مکان ہوتا تھا جو پیغمبر اسلام صلی اللہ تعالیٰ علیہ و سلم پر کچرا ڈالا کرتی تھی، بادشاہ نے محل بناتے وقت اس یاد کو زندہ رکھنے کے لیے یہ طاقچے رکھا ہے۔

نہیں معلوم کہ جنت البقیع تک کے آثار باقی نہ رکھنے والے مزاج کے بارے میں یہ بے پر کی کس نے اڑائی ہے البتہ اتنا ضرور ہے کہ از روئے روایت نہ ایسی کوئی بڑھیا تھی اور نہ ایسی حکایت۔

ایسی ہی مضحکہ خیز بات حرم شریف سے متصل ایک جگہ کے بارے میں کہی جاتی ہے جہاں ماضی قریب کی کسی کھدائی میں کچھ ہڈیاں بر آمد ہو گئی تھیں تو یہ بات اڑا دی گئی کہ یہ وہ جگہ ہے جہاں عرب اپنی بچیوں کو زندہ دفن کیا کرتے تھے۔

باب السلام سے جنت المعلی کا راستہ قریب پڑتا ہے اور اسی راستے پر مسجد جن، مسجد شجر اور مسجد رایہ بھی واقع ہوتی ہیں۔ مسجد جن یعنی وہ مقام جہاں قوم جنات نے قرآن مجید کی غیر معمولی تاثیر کے نتیجے میں رسول اللہ صلی اللہ تعالیٰ علیہ وسلم کے ہاتھوں ایمان قبول کیا، جس کی تفصیل سورہ جن میں موجود ہے۔

مسجد شجر وہ پاکیزہ مقام ہے جہاں مشرکین مکہ نے حضرت رسالت مآب صلی اللہ تعالیٰ علیہ وسلم کی صداقت کی دلیل کے طور پر کسی معجزے کا مطالبہ کیا تو آپ نے قریب موجود درخت کو بلایا اور حکم پاتے ہی وہ درخت اپنی جڑیں اکھاڑتے ہوئے آپ کے دربار میں حاضر ہو کر سلامی پیش کرنے لگا۔ مسجد رایہ یعنی جھنڈے والی مسجد، اس جگہ تعمیر کی گئی ہے جہاں رسول اللہ صلی اللہ تعالیٰ علیہ وسلم نے فتح مکہ کے دن اپنا پرچم بلند کیا تھا۔

جنت المعلی جنت البقیع کے بعد روئے زمین کا دوسرا سب سے افضل ترین قبرستان ہے، جہاں ام المومنین حضرت سیدہ خدیجۃ الکبریٰ اور دیگر متعلقین رسالت کے علاوہ بڑی تعداد میں خوش قسمت حجاج و معتمرین، زائرین حرم اور محبوبان خدا دفن ہیں۔ لمبے چوڑے قبرستان کا حسن انتظام دیکھنے سے تعلق رکھتا ہے۔

لاش کے پہنچنے سے لے کر تدفین تک کا مرحلہ پوری خوش اسلوبی کے ساتھ محض دس بارہ منٹ میں پایہ تکمیل تک پہنچ جاتا ہے البتہ جنت البقیع کی طرح انیس سو چوبیس کے بعد پیدا شدہ عربی مزاج کے مطابق یہاں بھی کوئی ایسی قبر نہیں جس کے متعلق وثوق کے ساتھ یہ نشاندہی کی جا سکے کہ فلاں کی ہے اور یہی وہ دل سوز موقع ہوتا ہے، جب عرب کی بلند قامت ترقیاں ہیچ نظر آنے لگتی ہیں۔

آتے جاتے اور حرم شریف میں پہنچتے ہی کوشش ہوتی تھی کہ زم زم زیادہ سے زیادہ پیا جائے۔ ایک دن یہ تجربہ کیا کہ ایک ساتھ کتنا زم زم پیا جا سکتا ہے، مجھ جیسے کم نوش نے اس دن ایک ساتھ سات گلاس نوش کیے اور کمال یہ کہ نہ کوئی اضافہ احساس ہوا اور نہ نقصان۔

(باقی)

از:- خالد ایوب مصباحی شیرانی

چیرمین:- تحریک علمائے ہند، جے پور