یوم آزادی اور جلتا ہندوستان

یوم آزادی اور جلتا ہندوستان

تحریر :_ محمد رضوان احمد مصباحی

سارے جہاں سے اچھا ہندوستاں ہمارا

ہم بلبلیں ہیں اس کی یہ گلستاں ہمارا

آج ہم آزادی کا جشن منا رہے ہیں اور ملک و ملت کی خاطر اپنی جان و پران کی قربانی دینے والے جان باز سپاہیوں کی بارگاہ میں خراج عقیدت و نذرانہ عقیدت پیش کرتے ہیں ۔

کیوں کہ ٹھیک ٧٦/ سال پہلے ١٩٤٧ء کو ہمارا ملک انگریزوں کے ظلم و جبر اور جبری استعداد والی حکومت کے چنگل آزاد ہوا تھا ۔یہ کسی پر مخفی نہیں کہ اس جنگ و لڑائی میں کتنی جانوں کی قربانیاں پیش کی گئیں، کتنے لوگ اس آزادی کے لےبے گھر ہو گئے، کتنوں کو صولیوں پرچڑھا کر شہید کیا گیا اور سیکڑوں کی تعداد میں لوگوں کو زندہ نذر آتش کیا گیا، دہلی کی شاید ہی کوئی گلی اور چوراہے تھے

جو ان شہیدوں کے خون سے لت پت ہو کر رنگین نہ ہو گئے ہوں۔ اس جنگ میں ہر طبقے اور مذاہب کے لوگوں کی شمولیت ہوئی۔ جب سارے مذاہب کے ماننے والوں نے بلا تفریق رنگ و نسل اور مذہب وملت اپنی آواز بلند کی تبھی جاکر اس ملک کو آزادی ملی ہے۔

لیکن میں سمجھتا ہوں جس مقصد کے لیے اتنی بڑی آزادی کی لڑائی لڑی گئی تھی

ایک علم کے تحت سارے لوگ یکجا ہو گئے تھے نہ کسی نے کہا تھا اس وقت کہ تو ہندو ہے، مسلم ہے، سیکھ ہے وغیرہ وغیرہ بلکہ سب کی ایک آواز بلند ہورہی تھی کہ ہم سب ہندوستانی ہیں ہمارا ملک ایک ہے اور ہم اسی ملک کو غلامی کی زنجیروں سے آزاد کرنے کے لیے اپنی جانوں کی قربانی دے رہیں۔ کہیں نہ کہیں اس مقصد کو آج بالائے طاق رکھ دیا گیا ہے۔

جب ہم ایک نظر آج سے ٧٦ سال پہلے والے ہندوستان کو دیکھتے ہیں اور ایک نظر آج کے ہندوستان پر ڈالتے ہیں تو بہت ہی زیادہ فرق اور تبدیلی نظرآتی ہے۔ آج کے موجودہ ہندوستان کو اپنی آنکھوں سے دیکھ کر خود ہی فیصلہ کریں اور بتائیں کہ ہندوستان کو کس طرح آگ میں جھونک دیا گیا ہے ۔

بالخصوص جب سے بھارتیہ جنتا پارٹی کی حکومت آئی ہے فرقہ وارانہ فسادات کو دن بدن بڑھاوا دیا جارہا ہے۔

آئے دن مذہب کے نام پر دسیوں لوگوں کی جانیں ان دھرم کے ٹھیکیداروں کی نذر ہو جایا کرتی ہیں۔ ہندوستان کی بھائی چارگی کو نہ جانے کس کی نظر لگ گئی ہے کہ فسادات رکنے کا نام ہی نہیں لیتا۔ “بیٹی پڑھاؤ بیٹی بچاؤ” کا نعرہ دینے والے آج خود ہی بیٹیوں کی عصمت کی حفاظت نہیں کر پا رہے ہیں ہیں۔

بلکہ محافظ آج خودہی ڈاکو بن گئے ہیں بلفظ دیگر رچھک خود ہی بھچھک (रक्षक खुद ही भक्षक बन गए हैं ) بن گئے ہیں۔ اس کی زندہ جاوید مثال منی پور کا حالیہ حادثہ ہے جس نے پورے ملک کو جھنجھوڑ کر رکھ دیا ہے ۔ کس طور پر ایک عورت کی عزت کے ساتھ کھلواڑ کر کے انہیں ننگا پوری جماعت کے ساتھ گھما کر اس کی آبروریزی ریزی کی جا رہی ہے ۔

مگر حکومت کی کرسی پر قبضہ جمائے ہوئے ان ڈاکوؤں کو اس کی کوئی پرواہ نہیں۔ سینکڑوں مسلمانوں کے گھر پر بلڈوزر جلایا جا رہا ہے، گڑگاؤں کی مسجد کو آگ لگا کر امام صاحب سمیت تین لوگوں کو موت کے گھاٹ اتار دیا گیا گو کہ پورا ملک جل رہا ہے ۔

نفرت کا بازار گرم کیا جارہا ہے۔ فرقہ وارانہ فسادات کو ہوا دیا جارہا ہے، لیکن افسوس کی بات یہ ہے کہ ہر محاذ پر صرف ایک ہی مذہب کے ماننے والے مسلمانوں کو ہی ٹارگیٹ کیا جاتا ہے ۔

پھر ان فسادات کا الزام مسلمان ہی کے سر پھوڑا جاتا ہے ۔مگر افسوس کہ اتنا ہونے کے باوجود بھی ہمارے وزیرا اعظم اپنی چپی اور خاموشی کو نہیں توڑتے ہیں۔ ایسا لگتا ہے کہ انہوں نے خاموشی کا روزہ رکھا ہوا ہے ، زبان گونگ ہوگئی ہے ۔