اعلیٰ حضرت اسلام اور شریعت کے سچے محافظ تھے

آٹھ سال کی عمر میں عربی گرامر کی مشہور کتاب ہدایت النحو کی عربی شرح لکھ دیتے ہیں، اور محض تیرہ سال دس ماہ اور پانچ دن کی عمر میں تمام مروجہ علوم و فنون کی تکمیل کرکے فتویٰ نویسی کا آغاز کردیتے ہیں اور والد ماجد علامہ نفی علی خان قادری رحمۃ اللہ علیہ کی اجازت سے مسند افتاء پر مسند نشیں ہوجاتے ہیں۔

امام احمد رضا کی گھٹی میں اللہ ورسول جل و علا و صلی اللہ علیہ وسلم اور اولیائے کرام کی محبت پلا دی گئی تھی، جو آپکے رگ و پے میں سرایت کر چکی تھی، اسلام و سنیت اور دین و شریعت کی عظمت روح میں رچی بسی تھی، اس لئے آپ بچپن سےہی ہمہ وقت عشق الٰہی اور محبت رسول سے سرشار نظر آتے تھے اور سختی سے احکام شریعت پر عمل کرتے تھے، آپ سنتوں کا چلتا پھرتا نمونہ تھے

آپ جتنے بڑے عالم و فقیہ تھے، اتنے ہی زیادہ متقی و پرہیزگار بھی تھے، آپ کی عملی زندگی اور آپکے فتاویٰ اس امر کے گواہ ہیں کہ آپ شریعت سے سرمو انحراف پسند نہیں کرتے تھے

آپ چوں کہ مجدد کے منصب جلیل پر فائز تھے، اور مجدد کا کام ہوتا دین اسلام کی تجدید و احیاء اس لیے آپ تاحیات دنیا بھر سے آئے ہوئے اسلامی سوالات کا قرآن و احادیث کی روشنی میں تحقیقی جوابات دیکر، اسلامی معاشرہ اور مسلمانوں کی اصلاح،اور رد بدعات ومنکرات کے لئے مختلف موضوعات پر عمدہ کتب ورسائل تحریر کرکے باطل افکار و نظریات کی نشاندھی کرکے حقیقی دین و شریعت کو اجاگر کرتے رہے۔

امام احمد رضا قادری علیہ الرحمہ کے عہد کا اگر جائزہ لیا جائے تو معلوم ہوگا کہ اس دور کے بڑے بڑے علماء ومشائخ دنیاوی مصلحت کے نام پر اور دنیاوی مفاد کی خاطر اسلام و سنیت اور دین و شریعت کے احکام کو بدل دیتے تھے

جاہل صوفیاے عوام کو بیوقوف بنانے اور تن آسانی کے لئے شریعت کو طریقت سے جدا کررہے تھے، بلکہ دین کے رہ نما کہلانے والے دانستہ طور پر باطل افکار و نظریات اور خود ساختہ عقائد کو دین و شریعت میں شامل کرکے مسلمانوں کو گمراہ کررہے تھے، حالات بہت ہی بھیانک اور خطرناک تھے

اس دور میں اگر اعلیٰ حضرت امام احمد رضا نہیں ہوتے تو شاید ہندوستان میں کوئی سنی صحیح العقیدہ مسلمان نہیں بچتا، کوئی خانقاہ اور مزار نہیں بچتا، آپ نے اپنے تجدیدی کارناموں سے دین کے غداروں اور انکی سازشوں کو ان کے ناپاک منصوبوں کو خاک میں ملا دیا، گستاخان خدا و رسول کو بےنقاب کیا جس سے وہ زمانے میں ذلیل ورسوا ہوئے

آپ شریعت کے معاملات میں غیروں کے ساتھ ساتھ اپنوں کی بھی پرواہ نہیں کرتے تھے، شریعت کی حفاظت ہی آپکی پاکیزہ حیات و زیست کا اصلی مقصد تھا، شریعت پر استقامت آپکی سب سے بڑی کرامت تھی

آپ نے دین و شریعت کی حفاظت ، مسلمانوں کے ایمان وعقائد، اور اصلاح معاشرہ کی لئے ایک ہزار سے زیادہ کتب ورسائل تصنیف فرمائے، جن سے قیامت تک مسلمانوں کی رہنمائی ہوتی رہیگی، بارہ جلدوں میں آپ کا فتاویٰ رضویہ فقہ حنفی کا عظیم الشان انسائیکلوپیڈیا ہے، جو شرعی دلائل سے مزین اسلامی علوم و فنون اور تحقیقات کا ٹھاٹھیں مارتا ہوا سمندر ہے

اس عظیم انسائیکلوپیڈیا سے دنیا بھر کے علماء و مفتیان کرام اپنی علمی تشنگی بجھا رہے ہیں۔ آپکی تصنیفات عالیہ قدم قدم پر مسلمانوں کی رہنمائی کررہی ہیں، آپکی کتابوں کا مطالعہ کرنے سے اللہ و رسول جل و علا و صلی اللہ علیہ وسلم، انبیاء ومرسلین، صحابہ و اولیا وعلما، اور سادات کرام کی دل میں بےپناہ محبت پیدا ہوتی ہے، علمی صلاحیت پیدا ہوتی ہے، شرعی دلائل ازبر ہوتے ہیں، ایمان وعقائد میں مضبوطی آتی ہے۔

سنی مسلمان بدمذہبی سے محفوظ رہتے ہیں، اس لیے اعلیٰ حضرت امام احمد رضا کی عقیدت و محبت سنی صحیح العقیدہ مسلمان ہونے کی پہچان بن گئی ہے

آپ اسلام و سنیت کے سچے پاسبان تھے، شریعت کے محافظ و امین تھے۔ اگر ایمان بچانا ہے عقائد مضبوط کرنے ہیں۔

تو اعلیٰ حضرت کا عمدہ تصنیف “تمہید ایمان” کا مطالعہ کیجئے، باطل اور گمراہ فرقوں سے ایمان بچانا ہے تو “حسام الحرمین” پاس میں رکھیں، قرآن مجید کا ترجمہ کے لیے”کنزالایمان” پڑھیں، علم غیب مصطفیٰ کا مسئلہ سمجھنے کے لیے”الدولت المکیہ”اذان قبر کے لیے”ایذان الأجر” دینی مسائل کے لیے “احکام شریعت”اور “عرفان شریعت” مسلمانوں کی ترقی کے لیے”فلاح تدبیر و نجات” رد حرکت زمین کے لیے”فوز مبین” اسی طرح تمام اسلامی عقائد و نظریات اور تمام شرعی مسائل سمجھنے اور قرآن و احادیث کے مطابق انہیں درست کرنے کے لیے “فتاویٰ رضویہ” کو اپنے مطالعہ کی میز کی زینت بنائیے۔

محمد افتخار حسین رضوی

ٹھاکر گنج کشن گنج بہار

9546756137