نیا ہفتہ نیا دن سال نو جس وقت آتا ہے

ماہ محرم الحرام کا چاند نظر آتے ہی ذکر شہادت کی مجلسیں منعقد ہونا شروع ہو جاتی ہیں- اور صحابہ کرام رضوان الله تعالیٰ علیہم اجمعین و اہلبیت اطہار اور دیگر جگر گوشئہ بتول اور امام عالی مقام حضرتِ سیدنا امام حسین رضی الله تعالیٰ عنہ کی قربانیوں ان کی عظمت و رفعت کا تذکرہ کرکے شمع ایمانی کو تیز کیا جاتا ہے، جو یقیناً کار ثواب اور اپنی نسلوں تک پیغام اسلام پہچانے کا عظیم ذریعہ ہے

ان مجالس کا انعقاد شریعت مطہرہ کے دائرے میں رہتے ہوئے کس طرح کرنا چاہیے اس تعلق سے امام اہل سنت مجدد دین و ملت سیدی سرکارِ اعلیٰ حضرت الشاہ امام احمد رضا خان قادری فاضلِ بریلوی علیہ الرحمتہ والرضوان اپنے فتویٰ میں ارشاد فرماتے ہیں:

جو مجلسِ ذکر شریف حضرتِ امام عالی مقام حضرتِ سیدنا امام حسین رضی الله تعالیٰ عنہ و اہل بیت اکرام رضوان الله تعالیٰ علیہم اجمعین کی ہو جس میں روایات صحیحہ معتبرہ سے ان کے فضائل و مقامات و مدارج بیان کیے جائیں، اور امور مخالف شرع سے یکسر پاک ہوں فی نفسہ حسن و محمود ہیں – خواہ اس میں نثر پڑھیں یا نظم، اگرچہ وہ نظم بوجہ ایک مسدس ہونے کے ذکر میں ذکرِ حضرتِ سید الشہداء ہے- فتویٰ رضویہ/ جلد نمبر 24/ صفحہ نمبر 523)

حضورِ صدر الشریعہ حضرتِ علامہ مفتی محمد امجد علی اعظمی علیہ الرحمتہ والرضوان مجالسِ محرم سے متعلق تحریر فرماتے ہیں کہ: عشرہ محرم میں مجلس منعقد کرنا، اور واقعات کربلا بیان کرنا جائز ہے -جبکہ روایات صحیحہ بیان کی جائیں، اور ان واقعات میں صبر و تحمل، رضا و تسلیم کا بہت مکمل درس ہے- اور پابندی احکامِ شریعت و اتباع سنت کا زبردست عملی ثبوت ہے کہ دین حق کی حفاظت میں تمام اعزاز و اقربا و رفقاء اور اپنے کو راہ خدا میں قربان کیا، اور جزع و فرع کا نام بھی نہ آنے دیا- مگر اس مجلس میں صحابہ کرام رضی الله تعالیٰ عنہم کا بھی ذکر خیر ہونا چاہیے تاکہ اہلبیت اور اس کے علاوہ کی مجلسوں میں فرق و امتیاز رہے- (بہار شریعت/ حصہ 06/ صفحہ نمبر 247)

قوم مسلم میں تعزیہ داری کی انتہائی غلط و قبیح رسم پروان چڑھ گئی ہے، امام اہل سنت سرکارِ اعلیٰ حضرت امام احمد رضا خان قادری فاضلِ بریلوی علیہ الرحمہ فتویٰ رضویہ میں تفصیل کے ساتھ ذکر فرماتے ہیں کہ آج کی مروجہ تعزیہ داری قطعاً بدعت و ناجائز و حرام ہے، تعزیہ داری کے سلسلے میں آج کل جو ڈھانچے بنائے جاتے ہیں، ان کے اندر مصنوعی قبر بناتے ہیں، پھر اس پر پھول چڑھاتے ہیں، ان سے منتیں مانگتے ہیں، پھر اسے لے جاکر دفن کر دیتے ہیں، کہیں امام عالی مقام کی سواری بٹھاتے ہیں، اور اس کو نعل صاحب کی سواری کہتے ہیں،چڑھاوے چڑھائے جاتے ہیں، منتیں مانگتے ہیں، اس قسم کی بہت سی باتیں کی جاتیں ہیں یہ سب بدعات و خرافات ہیں، حضرتِ امام عالی مقام کے واقعات تو ہمارے لیے نصیحت تھے

لیکن افسوس! کہ ہم نے آج کھیل تماشہ بنا لیا ہے- امام اہلسنت مجدد دین و ملت اعلیٰ حضرت عظیم البرکت الشاہ امام احمد رضا خان قادری فاضلِ بریلوی علیہ الرحمہ نے ماہ محرم الحرام میں کیے جانے والے برے کاموں کی سخت مذمت فرمائی ہے- آپ تحریر فرماتے ہیں کہ تعزیہ ممنوع ہے، شرع میں اس کی کچھ اصل نہیں اور جو کچھ بدعات ان کے ساتھ کی جاتی ہیں سخت ناجائز ہیں- تعزیہ پر مٹھائی چڑھائی جاتی ہے اگرچہ حرام نہیں ہو جاتی مگر اس کے کھانے میں جاہلوں کی نظر میں ایک امر ناجائز کی وقعت بڑھانے اور اس کے ترک میں اس سے نفرت دلانی ہے لہٰذا نہ کھائی جائے- ڈھول بجانا حرام ہے- (فتویٰ رضویہ/ جلد نمبر8/ صفحہ نمبر 180)

صدر الشریعہ حضرتِ علامہ مولانا امجد علی اعظمی علیہ الرحمتہ والرضوان بہار شریعت میں بڑے مفصل اور واضح انداز میں ان بدعات و خرافات کی تردید فرماتے ہیں آپ تحریر فرماتے ہیں کہ: تعزیہ داری کے واقعات کربلا کے سلسلے میں طرح طرح کے ڈھانچے بناتے ہیں، اور ان کو حضرتِ امام عالی مقام رضی الله تعالیٰ عنہ کے روضہ مبارک کی شبیہ کہتے ہیں، کہیں تخت بنائے جاتے ہیں، کہیں ضریح قبریں بنائ جاتی ہیں، اور علم و شدے نکالے جاتے ہیں، ڈھول تاشے اور قسم قسم کے باجے بجائے جاتے ہیں، تعزیوں کا بہت دھوم دھام سے گشت ہوتا ہے آگے پیچھے ہونے میں جاہلیت کے سے جھگڑے ہوتے ہیں، کبھی درخت کی شاخیں کاٹی جاتی ہیں، کہیں چبوترے کھدوائی جاتے ہیں، تعزیوں سے منتیں مانی جاتی ہیں، سونے چاندی کے علم چڑھائے جاتے ہیں، ہار پھول ناریل چڑھائے جاتے ہیں

وہاں جوتے پہن کر جانے کو گناہ جانتے ہیں، بلکہ اس شدت سے منع کرتے ہیں کہ گناہ پر بھی ایسی ممانعت نہیں کرتے، چھتری لگانے کو بہت برا جانتے ہیں، تعزیوں کے اندر مصنوعی قبریں بناتیں ہیں، ایک پر سبز غلاف اور دوسرے پر سرخ غلاف ڈالتے ہیں، سبز غلاف والے کو حضرتِ سیدنا امام حسن رضی الله تعالیٰ عنہ اور سرخ غلاف والے کو حضرتِ سیدنا امام حسین رضی الله تعالیٰ عنہ کی قبریں یا شبیہ بتاتے ہیں، اور وہاں شربت مالیدہ وغیرہ پر فاتحہ دلاتے ہیں، یہ تصور کرکے کہ حضرتِ سیدنا امام حسین رضی الله تعالیٰ عنہ کے روضے اور مواجہ اقدس میں فاتحہ دلا رہے ہیں، پھر یہ تعزیے دسویں تاریخ کو مصنوعی کربلا میں لے جاکر دفن کرتے ہیں گویا یہ جنازہ تھا جسے دفن کر آئے، پھر تیجہ دسواں چالیسواں سب کچھ کیا جاتاہے اور ہر ایک خرافات پر مشتمل ہوتا ہے، اسی سلسلے میں نوحہ و ماتم بھی ہوتا ہے، اور سینہ کوبی بھی ہوتی ہے، اتنے زور زور سے سینہ کو کوٹتے ہیں کہ سینے میں خون بہنے لگتا ہے یہ سب ناجائز و خرافات ہیں، تعزیوں کے پاس مرثیہ پڑھا جاتا ہے، اور تعزیہ جب گشت کو نکلتا ہے اس وقت بھی اس کے آگے مرثیہ پڑھا جاتا ہے، مرثیہ میں غلط واقعات نظم کیے جاتے ہیں

اہل بیت اکرام کی بے حرمتی اور بے صبری اور جزع و فزع کا ذکر کیا جاتا ہے، کیوں کہ اکثر مرثیے رافضیوں کے ہی ہیں، بعض میں تبراء بھی ہوتا ہے، مگر اس رو میں سنی بھی بے تکلف پڑ جاتے ہیں، اور انہیں اس کا خیال بھی نہیں ہوتا کہ کیا پڑھ رہے ہیں، یہ سب ناجائز و گناہ کے کام ہیں- اظہارِ غم کے لئے سر کے بال بکھیرتے ہیں، کپڑے پھاڑے ہیں، اور سر پر خاک ڈالتے ہیں، یہ سب ناجائز اور جاہلیت کے کام ہیں، ان امور سے بچنا نہایت ہی ضروری ہے، احادیثِ مبارکہ میں ان سب کاموں کی ممناعت آئی ہے، مسلمانوں پر لازم ہے کہ ایسے امور سے پرہیز کریں جن سے الله رب العزت اور رسول کریم صلی الله تعالیٰ علیہ واٰلہٖ وسلّم ناراض ہوتے ہیں، کہ یہی نجات کا راستہ ہے- ( بہار شریعت/ حصہ 16/ صفحہ نمبر 248/249)

لہٰذا مسلمانوں پر لازم ہے کہ وہ ان تمام بدعات و خرافات سے بچیں اور عوام اہلسنت کو بچائیں، دوسرے لوگ اہل بیت پر الزام لگاتے ہیں کہ یہ تمام خرافات سنیوں کے ہیں حالانکہ کوئی بھی عالم اورکسی بھی کتاب میں ان خرافات کو جائز نہیں کہا گیا بلکہ علماء اہلسنت نے اس کی جم کر مخالفت فرمائی ہے، یہ سب جاہل عوام کے کام ہیں

لہٰذا ہمیں ان کی اصلاح کے لیے کمر بستہ ہونا چاہیے اور جو جائز امور ہیں ان کو دل و جان سے کرنا چاہیے- الله رب العزت ہمیں حق قبول کرنے اور حق پر ثابت رہنے اور حق کو عام کرنے کی توفیق و طاقت عطا فرمائے-

.کریم گنج، پورن پور،ضلع پیلی بھیت،مغربی اتر پردیش

iftikharahmadquadri@gmail.com