مسلمانوں کا تاب ناک ماضی اور موجودہ حالات

اے پیارے مسلمانو! کیا ہمیں نہیں معلوم کہ اگر آج بھی ہم شیطان و نفس کی غلامی کی زنجیروں کو توڑ کر مکمل طور پر اسلام کے دائرے میں رہ کر زندگی گزارنے لگیں

تو آج بھی ہمیں دنیا میں فتح و کامرانی، اور ظفر و نصرت کے پرچم نصب کرنے اور ترقی کے بام عروج تک رسائی حاصل کرنے سے کوئی روک نہیں سکتا۔۔۔۔۔۔اور ذرا سنیے تو سہی۔۔۔۔۔

رب تعالیٰ کیا فرماتا ہے؟

ترجمہ: اے ایمان والو!اسلام میں پورے پورے داخل ہوجاؤ اور شیطان کے قدموں پر نہ چلو بیشک وہ تمہارا کھلا دشمن ہے۔ (البقرہ/آیت، 208)

اے کاش! اہل ایمان اپنے اسلاف کے درخشندہ اور تاب ناک کردار سے انکی کامیابیوں اور کامرانیوں سے سبق حاصل کریں اور اپنے اوپر سے غفلت و سستی چادر اتار پھینکیں، اور رنج و الم سے دور ہوکر ہمت و حوصلوں اور قوت ایمانی کے سہارے کارزار حیات میں آگے بڑھنے لگیں تو اللہ عزوجل اور اس کے رسول صلی اللہ علیہ وسلم فضل وکرم سے ہم‌ ضرور فتح و نصرت سے ہم کنار ہوں گے۔

ذرا قرآن کریم کی اس عظیم بشارت پر غور کریں اور پروردگار عالم کے اس فرمان عالی شان کو سرمۂ بصیرت بنائیں۔

ترجمہ: اور نہ سستی کرو اور نہ غم کھاؤ تمہیں غالب آؤ گے اگر ایمان رکھتے ہو (آل عمران-آیت/139)

یاد رکھیں ! ہمیں موجودہ دور میں اپنے اعمال و افعال اور گفتار و کردار کا بار بار اور مسلسل محاسبہ کرنا چاہیے تاکہ ہم خود کو اسلاف کے کردار کے سانچے میں اچھی طرح ڈھال اور سنوار سکیں، تاکہ دین اسلام کے دشمن کبھی ہمیں مغلوب اور مرعوب نہ کرسکے۔

علامہ اقبال فرماتے ہیں :

عمل سے زندگی بنتی ہے جنت بھی جہنم بھی

یہ خاکی اپنی فطرت میں نہ نوری ہے نہ ناری ہے

اس مقصد عظیم کے حصول کے لیے ہمیں مضبوط و مستحکم ہونے اور آخری دم تک متحرک و فعال رہنے کی سخت ضرورت ہے۔ حرکت سے ہے زندگی جہاں کی یہ رسم قدیم ہے یہاں کی اور اس حقیقت سے ہم انحراف نہیں کر سکتے کہ جب تک ہم خود ہی اپنے حالات کو بدلنے کی مکمل کوشش نہیں کریں گے، غفلت، کاہلی، بزدلی، بداعمالی، پست ذہنیت، خوف و ہراس اور جہالت کے دلدل سے نکل کر بیداری کا ثبوت نہیں دیں گے، ہمیں کامیابی نہیں مل سکتی، ذرا دل تھام کر دیکھیے اللہ تعالیٰ قرآن مجید میں کیا ارشاد فرماتا ہے؟

رب العالمین جل شانہ فرماتا ہے۔

ترجمہ: کنزالایمان آدمی کے لیے بدلی والے فرشتے ہیں اس کے آگے اور پیچھے کہ بحکمِ خدا اس کی حفاظت کرتے ہیں بےشک اللہ کسی قوم سے اپنی نعمت نہیں بدلتا جب تک وہ خوداپنی حالت نہ بدل دیں اور جب اللہ کسی قوم سے برائی چاہے تو وہ پھر نہیں سکتی اور اس کے سوا ان کا کوئی حمایتی نہیں۔

کسی شاعر نے کیا خوب فرمایا ہے

خدا نے آج تک اس قوم کی حالت نہیں بدلی

نہ ہو جس کو خیال آپ اپنی حالت کے بدلنے کا

محمد افتخار حسین رضوی