پرنٹ میڈیا ضرورت و اہمیت

میڈیا کی تمام اقسام ذہن نشین کرلینے کے بعد پرنٹ میڈیا پر کچھ تفصلی گفتگو کی جاۓ تاکہ اس کی اہمیت و ضرورت اور افادیت معلوم ہو۔ پرنٹ میڈیا کی ایک قسم رسائل وجرائد ہے جسے انگریزی میں میگزین کہا جاتاہے۔ یہ مختلف قسموں کی ہوتی ہیں۔ جو درج ذیل ہیں:

1_ ہفت روزہ: جس کی اشاعت سات دن میں ہو۔

2_ پندرہ روزہ:جس کی اشاعت پندرہ دن میں ہو۔

3_ ماہنامہ: جس کی اشاعت ہر مہینہ ہو۔

4_ دوماہی: جس کی اشاعت ہر دوماہ میں ہو۔

5_ سہ ماہی: جس کی اشاعت ہر تین ماہ میں ہو۔

6_سالنامہ: جس کی اشاعت سال میں ایک بار ہو۔

پرنٹ میڈیا مثلا اخبار الیکٹرانک میڈیا مثلا نیوز چینلز وغیرہ کے اغراض ومقاصد حسب ذیل ہیں :

1_جمہوری ملک میں سرکار کی خامیوں کو اجاگر کرکے ان کی اصلاح کرانے کی کوشش کرنا،تنقید کرنا۔ اس کے تئیں حکومت کو جواب دہ ہونا پڑتاہے۔ اس میں میڈیا جس کی حمایت کردے عوام بھی اسی کی حمایت کرتی ہے۔ اس لیے میڈیا کو کسی کے دباو میں کام نہیں کرنا چاہیے نہ حکومت کے نہ پرائویٹ سیکٹر کے۔ کیوں کہ عوام کو اس پر بھروسہ ہوتاہے اور اور یہ حکومت اور عوام کے بیچ رابطے کا کام کرتی ہے۔لیکن حالات اب گوناگوں مختلف ہوگئے ہیں۔

2_ میڈیا پروپیگنڈا: جس کا مطلب ہے کہ میڈیا کسی بھی شخص کو راتوں رات ہیرو یا زیرو بنا سکتاہے جیساکہ 2014ء کے مرکزی انتخابات میں کیا گیا کہ ہر چینل ہر ڈیبیٹس ہر نشریاتی پروگرام پر ایک ہی جملہ تھا۔ مودی لہر، نتیجہ آپ کے سامنے ہے۔ 3_ خبر فراہم کرنا۔

4_ تعلیم دینا۔ پرنٹ میڈیا مثلا اخبار وغیرہ کا ضمنی مقصد لوگوں کو تعلیم دینا بھی ہے۔ انقلاب پیپر میں مسلسل دو لفظ انگریزی اور دو لفظ اردو کے معنی کے ساتھ شائع ہوتے ہیں علاوہ ازیں جو مضامین ومقالات کے کالم ہوتے ہیں ان میں بیشتر مضامین اسی سے متعلق ہوتے ہیں۔

5_ تفنن اور لطیفہ۔ کچھ کالم لطف اندوزی یا منورنجن وغیرہ کے بھی شامل ہوتے ہیں۔ تاکہ قاری کا دل اکتاہٹ کا شکار نہ ہو۔

6_ سرکار پر اس کی خامیوں کے باعث دباو بنانا۔

7_ ایجنڈا۔ مثلا ملک و بیرون ممالک کے جو حالات چل رہے ہوں ان کا منظر نامہ پیش کرنا اور انھیں دور کرنا اور جو سرد پڑگئے ہوں انھیں نہ دکھانا یا نہ چھاپنا ایجنڈا کہلاتاہے۔جیسے اس وقت یوکرین ورسیا تنازعہ جاری ہے تو اس کی کوریج کرنا اور افغانستان وامریکہ کے تنازعہ سرد پڑگیا تو اسے نہ دکھانا ایجنڈا یا مدعی کہلاتاہے۔ الیکٹرانک میڈیا اور سوشل میڈیا کی بنسبت پرنٹ میڈیا کے فائدے:

پرنٹ میڈیا سے بہت سے وہ فائدے حاصل ہوتے ہیں جو الیکٹرانک میڈیا یا سوشل میڈیا سے حاصل نہیں ہوسکتے۔ مثلا:

کتاب یا رسالے سے ہم اپنی من پسند خبر یا مضمون پڑھ سکتے ہیں جب کہ ریڈیو یا ٹیلی ویژن میں خبر پڑھنے والے یا سنانے والے کا پابند رہنا پڑتاہے۔ یوں ہی وقت کی قلت کو ملحوظ رکھتے ہوۓ ایک ہی مضمون یا کئی ایک میں متفرق پیرا گراف سے کتب ورسائل کا مطالعہ کیا جاسکتاہے ریڈیو یا ٹی۔وی پر نشرکیے جانے والی خبروں میں ایسا ہرگز نہیں ہوسکتا۔

دل چسپ اور معلوماتی تحریروں کو اخبارو جرائد کے ذریعہ محفوظ کیا جاسکتاہے جب کہ الیکٹرانک میڈیا یا سوشل میڈیا یعنی واٹس ایپ فیس بک وغیرہ پر وہ تحریریں غائب ہوجاتی ہیں سواے ان کے جو خود پوسٹ کیں ہوں وہ بھی ناتمام۔

مضمون نگار کے لیے مواقع کی فراہمی اور اپنی زبان پر کماحقہ گرفت جب کہ سوشل میڈیا یا الیکٹرانک میڈیا نے زبان وادب کے معاملے میں لوگوں کو بے دست وپا کردیا۔ تعلیم کا فروغ۔ اس لیے کہ اس سے ہر کس وناکس استفادہ نہیں کرسکتاہے بلکہ پہلے علم حاصل کرے گا پھر کچھ لکھ یا پڑھ سکتاہے۔جب کہ نشریاتی پروگرامس کو ہر خواندہ وناخواندہ سن سکتاہے۔

رموز اوقاف کی پہچان اس کے برعکس دونوں میڈیا پر اس کی معرفت حاصل ہونا دشوار یا نادر ضرور ہے۔

علما کے لیے کتب ورسائل کی طباعت واشاعت نہایت ناگزیر!

آج جب الیکٹرانک میڈیا کے نشریاتی پروگرامس اور پرنٹ میڈیا میں اخبار وغیرہ پر زعفرانی رنگ کا غلبہ ہے اور ان کی شہ رگ حکومت نے دبا رکھی ہے صحیح خبر یا رپورٹ لوگوں تک بالخصوص مسلمانوں تک پہنچنا دشوار ترین ہوگیا ہے اور سوشل میڈیا پر ویسے انتظامیہ اور ایجنسیاں برابر نظر بناۓ ہوۓ ہیں تو علما کے لیے عمدہ رسالوں کی طباعت واشاعت حد درجہ ناگزیر ہوجاتی ہے تاکہ علما وطلبہ اور مسلمانوں کو ملکی وبین الاقوامی منظر نامہ کی خبر رہے۔ انھیں حالات کو مد نظر رکھتے ہوۓ اور پرنٹ میڈیا کی افادیت کو تسلیم کرتے ہوۓ سہ ماہی عرفان رضا رسالے کی بالدوام طباعت واشاعت کا عزم بالجزم کیا گیا۔

مزید برآں مضافات مراداباد کے نوخیز علما اور طلبہ کے لیے میدان صحافت میں طبع آزمائی کا ایک اچھا پلیٹ فارم ہے اور ان کے لیے گولڈن چانس سے کم نہیں۔ یقینا جو لوگ مضمون نگاری نے نابلد ہیں وہ اس سے وابستگی کے بعد استفادہ ضرورکرسکیں گے۔

رسالہ سہ ماہی عرفان رضا مراداباد تقریبا ڈھائی سالوں سے آن لائن شائع ہورہا تھا لیکن اب اس کی مقبولیت اور صحافت میں علما وطلبہ ومسلمانوں کی شراکت کی ضرورت کو مد نظر رکھتے ہوۓ اسے پرنٹ کرکے ہارڈ کاپی میں آف لائن نکالنے کا اقدام لائق تحسین ہے جس کے لیے مدیر اعلی ومجلس ادارت ومشاورت ومعاونت سب قابل تعریف ہیں۔

مضمون نگاری پر راقم کی کئی تحریرں گوگل سائٹس پر اپلوڈ ہیں جیسے : مقالہ نگاری اصول وضوابط ، قلمکار کیسے بنیں؟ قواعد وہدایات۔ مضمون نگاری سے متعلق کچھ اہم باتیں۔وغیرہ۔

پرنٹ میڈیا کا تعلق الیکٹرانک میڈیا کی بنسبت کتابت کے اصول سے زیادہ وابستہ ہے اس کا لحاظ بے حد ضروری ہے۔

کتبہ: محمد ایوب مصباحی

پرنسپل و ناظم تعلیمات دار العلوم گلشن مصطفی بہادرگنج۔

امام مکہ مسجد عالم پورپوسٹ سلطان پور دوست ۔

رکن مجلس ادارت سہ ماہی عرفان رضا مراداباد

وساکن بایزید پور پوسٹ ڈلاری، ٹھاکردوارہ، مراداباد، یو۔پی۔

رابطہ نمبر: 8279422079