مسلم لڑکیاں فتنہ ارتداد کی جال میں اس کے وجوہات و حل

Spread the love

تحریر: محمد عامر حسین مصباحی مسلم لڑکیاں فتنہ ارتداد کی جال میں اس کے وجوہات و حل

مسلم لڑکیاں فتنہ ارتداد کی جال میں اس کے وجوہات و حل

حالیہ دنوں میں شوشل میڈیائی پلیٹ فارم سے جس تیزی کے ساتھ مسلم لڑکیوں کا غیرمسلم لڑکوں کے ساتھ عشق و معاشقہ اور ہندوانہ رسم و رواج کے مطابق شادی کرلینے کی تصویریں اور ویڈیوز موصول ہورہی ہیں

وہ مسلم سماج کے اندربہت زیادہ بے چینی اور اضطرابی کیفیت پیدا کررہی ہیں۔ یہ بھی ایک حقیقت ہے کہ جتنی خبریں موصول ہورہی ہیں

اور جتنی تصاویر اور ویڈیوز آرہی ہیں وہ سب کی سب صحیح نہیں بلکہ بہت سی فرضی کہانیاں، جھوٹی خبریں اور افواہیں بھی ہیں جسے سوچی سمجھی سازش کے تحت پھیلانے کا کام کیا جارہا ہے تاکہ ہندوتوادی شدت پسند تنظیمیں اپنے ناپاک عزائم کو پایۂ تکمیل تک آسانی کے ساتھ پہنچا سکیں

مگر ساری خبریں جھوٹی بھی نہیں کہ معتمد ذرائع سے معلوم ہوا ہے کہ پہلے کی بنسبت اس میں بہت تیزی آتی جارہی ہےاورآئے دن ملک کےکسی نہ کسی صوبہ وضلع سے ایسی خبریں آہی جاتی ہیں جس سے ہماری غیرت کا جنازہ نکل جاتا ہے

ایک ہی ملک کے ہر صوبہ و ضلع اور بستی میں ساتھ ساتھ ہندومسلم کا اجتماعی زندگی گزارنے کی وجہ سےشاذونادر ایسے واقعات پیش آجاتے تھے

جس میں ایک مسلم لڑکے کو کسی غیر مسلم لڑکی سےیا ایک مسلم لڑکی کو غیر مسلم لڑکے سے محبت ہوگئی اور نتیجہ بھاگ کر کورٹ میرج کرنے تک پہنچ گئی مگر یہ کسی بھی دھرم کے ماننے والوں کے نزدیک درست عمل نہیں بلکہ اسلام میں تواس طرح کی شادی سرے سے منعقد ہی نہیں ہوسکتی ۔

مگر متشدد ہندوتوادی تنظیمیں اب ملک میں فرقہ واریت اور دنگے فساد برپا کرنے نیز ملک کی امن و شانتی کو بھنگ کرنے کے لیے ایک منظم سازش کے تحت مسلم لڑکے کی غیر مسلم لڑکی کے ساتھ حرام محبت و شادی کو ’’ لوجہاد‘‘ کا نام دے کر ان چیزوں کو مسلمانوں کے عزائم سے جوڑچکے ہیں

اور اب اس کے خلاف پوری قوت کے ساتھ طاغوتی طاقتیں میدان میں آچکی ہیں، جہاں معاملہ ان کی اپنی لڑکیوں کا آتا ہے تو ’’ لو جہاد‘‘ اوردوسری طرف خود منظم سازش کے تحت مسلم لڑکیوں کو جال میں پھنسا کر پیار و محبت کا نام دے کر شادی کرادیتے ہیں۔

یہ کیسی دوغلی پالیسی ہے؟ضروری ہے کہ حکومتِ ہند اور عدالتِ عظمیٰ اس طرف مضبوط قدم اٹھائیں تاکہ اس معاملے کا حل نکالا جاسکے۔

اب ان کا مقصدہر ایک پرواضح ہوچکا ہے کہ زیادہ سے زیادہ مسلم لڑکیوں کو اپنے جال میں پھنساکر شادی بیاہ اور گھومنے پھرنے کی آزادی کا لالچ دے کر ان کے ایمان کا سودا کیا جائےاور ان لڑکیوں کی زندگیاں تباہ کردی جائیں۔

اور یہ حقیقت ہے کہ وہ لڑکیاں جو اپنی قوم اور مذہب سے غداری کرکے غیروں کے دامن میں چلی جاتی ہیں ان کی زندگیاں جہنم بنادی جاتی ہے ان کے ساتھ ناروا سلوک کیا جاتا ہے بلکہ زدوکوب کرکے جان تک لے لی جاتی ہے۔

ابھی چند دنوں قبل اخبار کی سرخی بننے والی یہ خبر ’’ مذہب چھوڑ کر شادی کرنے والی رضوانہ کا عبرت ناک انجام ‘‘یعنی باہر گھمانے کی فرمائش کرنے پر شوہر’ سدھارتھ‘نے قتل کردیا ‘‘ قلوب و اذہان کو جھنجھوڑنے والی تھی۔

اسی طرح میرٹھ سے خبرآئی کہ’’حِنا ‘‘اور ’’ افسانہ‘‘ نامی لڑکیوں کے عاشق’’گووربھ تیاگی‘‘اور ’’آکاش‘‘نے دونوں کوخوفناک موت کا مزا چکھایا۔

یقیناً یہ خبریں اور یہ لڑکیاں باقی اس طرح کے ناپاک ارادہ رکھنے والی لڑکیوں کے لیے سراپا عبرت کا نشان ہیں مگر شوشل میڈیا پر اکٹیو رہنے والی لڑکیاں ان کے عبرت خیز انجام کی پرواہ کیے بغیر اپنے عاشقوں پر اعتماد کرکے ان کے ساتھ چلی جاتی ہیں حالانکہ ان کا بھی انجام وہی ہوتا ہے

اگر ماری نہیں گئیں تو انھیں بھی بے یارومددگار چھوڑ دیا جاتا ہے اور پھر نہ ہی انہیں اپنے عاشقوں کے گھر پناہ ملتی ہے اور نہ ہی والدین کے گھر۔

تعجب تو اس بات پر ہے کہ اسلام کی وہ مقدس شہزادیاں جنھیں ان کے دین و مذہب نے سب سے زیادہ پردے کا حکم دیا اور انہیں بار بار متنبہ کیا جاتا رہا کہ غیر تو غیر اپنوں (غیرمحرم مسلمان)سے بھی حیا کریں اور اپنی نگاہیں نیچی کریں مگر کیا وجہ ہےکہ ہماری اسلامی بہنوں کی نگاہیں غیر اسلامی مردوں سے لڑنے لگ گئی ہیں؟۔

کیا وجوہات ہیں جو اسلامی طرزِ عمل سے ان کو بغاوت کرنے پر مائل کرنے لگی ہیں؟۔

کیوں ان کے قدم لڑکھڑانے لگےہیں؟ کیوں ایک مسلمان گھرانے میں پیدا ہونے والی شہزادیاں اپنی عزت و عصمت کا سودا کرنے کو تیار بیٹھی ہیں اور جائز طریقے پر نکاح کرکے گھر بسانے کی بجائے اپنی دنیا و آخرت سب کچھ تباہ کررہی ہیں ؟؟؟

اگر ان اسباب و علل پر نگاہ کرتے ہیں تویہ وجوہات سامنے آتے ہیں ۔

(۱) قلوب میں خوفِ خدا ومحبتِ رسول علیہ السلام کا فقدان
(۲) مسلم گھرانوں میں اسلامی اور مذہبی ماحول کی جگہ مغربی ماحول کی پذیرائی
(۳) عصری تعلیمات سے حددرجہ لگاؤ ،قرآن و سنت اوردینی و اسلامی تعلیمات سے دوری
(۴) لڑکے اور لڑکیوں کو عصری اعلیٰ تعلیم دلانے کی خاطر شادی میں تاخیر کرنا ۔
(۵) وقت گزاری کے لیے فلمیں ،ڈرامے، سیریلز،کمیڈی اور فحش وحیا سوز ویڈیوز دیکھنا۔
(۶) لڑکے اور لڑکیوں کاعصری علوم کے حصول کی خاطر ایسے کالجز اور یونیورسیٹیز کا رخ کرنا جہاں باہمی اختلاط کو غلط نگاہ سے نہیں دیکھا جاتا بلکہ مردوعورت کا قدم سے قدم ملا کر چلنا ترقی کی راہیں ہموار کرنا سمجھا جاتا ہے،لڑکوں کی لڑکیوں سے دوستی کو معیوب نہیں سمجھا جاتا بلکہ اسے بھی فیشن کے طور پر دیکھا جاتا ہے اور ان کی حوصلہ افزائی کی جاتی ہے۔
(۷) غیر مسلم لڑکوں سے مسلم لڑکوں کی دوستی اورانھیں بخوشی اپنے گھروں تک لانا ۔
(۸) لڑکیوں کا اپنے بھائی کے غیر مسلم دوستوں سے بے تکلف ہوجانا۔
(۹) والدین کا اپنے بچوں کی نگرانی نہ کرنا بلکہ انھیں آزادی کے نام پر ہر طرح کی کھلی چھوٹ دے دینا ۔
(۱۰) لڑکیوں کا خود سے پارچُن کی دکانوں پر جاکر بناؤ سنگار کا سامان خریدنا ۔
(۱۱) بلا ضرورت بغیر کسی محرم کے اکیلے ہی مارکیٹ میں زیورات کی دکانوں میں جانا ۔
(۱۲) لڑکیوں کا گھر سے باہر مکمل بن سنور کر نکلنا
(۱۳) ہر گھر میں بلکہ ہر فرد کے ہاتھوں میں انڈرائڈ موبائل کا ہونا وغیرہ وغیرہ۔

یہ ساری وہ وجوہات ہیں جن سے آج ہماری نسلِ نو بہکتی ،بگڑتی اور اپنے دین و مذہب سے باغیانہ رویہ اختیار کرتی جارہی ہے۔ اگر یہی سلسلہ رہا اور ان کی بہترین تعلیم و تربیت اوران کی حرکات و سکنات پرکڑی نگاہ نہیں رکھی گئی اور جو حالیہ خبریں موصول ہورہی ہیں

اس سے ہوش کے ناخن نہ لیےگیے تو وہ دن دور نہیں جب ہم اپنی اولاد کی ذلیل حرکتوں سے ذلت و رسوائی کے گڈھے میں جا گریں گے اور ہمارا حال ناگفتہ بہ ہو جائے گا اور آنے والی نسلیں اس بےحیائی اور غلط روئی کا ہمیں ذمہ دار ٹھہرائیں گی۔

اس لیے وقت رہتے ہمیں اپنی اسلامی حس بیدار کرنی اور غفلت کی دبیز چادر کو پرے ہٹا کر بیدار ہونا ہوگااور اپنے گھروں کو اسلامی تعلیمات اور اسلامی ماحول سے آراستہ کرنا ہوگا تبھی جاکر ہم ایسی ذلتوں سے محفوظ ہوسکتے ہیں۔

کیوں کہ اس کا واحد اور سب سے بہترین حل اسلامی ماحول اور اسلامی قوانین پر حتیٰ الامکان عمل پیرا ہونا ہے۔ اب ہمارے لیے جاننا ضروری ہے کہ اسلام میں اس تعلق سے کیا حکم صادرہوا ہے۔تاکہ اس فتنۂ ارتداد پر لگام لگانا آسان ہوسکے۔

اسلام میں مشرکین سے شادی قرآن مجیدمیں اللہ رب العزت نے ارشاد فرمایا:۔

وَلَاتَنْکِوْا الْمُشْرِکَاتِ حَتّٰی یُؤْمِنْ وَلَاَمَۃٌ مُّؤْ مِنَۃٌ خَیْرٌ مِّنْ مُّشْرِکَۃٍ وَّلَوْ اَعْجَبَتْکُمْ وَلَا تُنْکِحُوْا الْمُشْرِکِیْنَ حَتّٰی یُؤْمِنُوْا وَلَعَبْدٌ مُّوْمِنٌ خَیْرٌ مِّنْ مُّشْرِکٍ وَّ لَوْ اَعْجَبَکُمْ اُولٰٓئِکَ یَدْعُوْنَ اِلَی النَّارِ وَاللہُ یَدْعُوْا اِلَی الْجَنَّۃِ وَالْمَغْفِرَۃِ بِاِذْنِہٖ

ترجمۂ کنز الایمان :- اور شرک والی عورتوں سے نکاح نہ کروجب تک مسلمان نہ ہوجائیں ۔اور بے شک مسلمان لونڈی مشرکہ سے اچھی ۔ اگرچہ وہ تمھیں بھاتی ہواور مشرکوں کے نکاح میں نہ دو جب تک وہ ایمان نہ لائیں اور بے شک مسلمان غلام مشرک سے اچھا اگرچہ وہ تمھیں بھاتا ہو

وہ دوزخ کی طرف بلاتے ہیں اور اللہ جنت اور بخشش کی طرف بلاتا ہے اپنے حکم سے خلاصہ یہ کہ انسانی فطرت ہےکہ خوب صورت اور پُرکشش چیزوں کی طرف طبیعت کا میلان زیادہ ہوتا ہے مگر ہر اچھی دِکھنے والی چیز کی قربت فائدہ مند نہیں ہوتی۔

ٹھیک اسی طرح ایک مرد کا خوب صورت عورت کی طرف طبیعت اور ذہن کا میلان فطری ہے مگر یہ جواز کی حد میں ہو تو سکون بخش ہے ورنہ اس کے مضر نتائج سے تاریخ پُر ہے۔

اس لیے مشرک مرد یامشرکہ عورت سے ایک مسلمان کی شادی نہیں سکتی خواہ وہ خوب صورتی کے اعتبار سے جتنے اچھے بھلے معلوم ہوتے ہیں کیوں کہ یہ اچھی دِکھنے والی ایسی چیز ہے کہ اس سے جان اور جان سے قیمتی شئی ایمان کے لیے زہرِ ہلاہل ہے۔

مذکورہ آیتِ کریمہ شادی بیاہ کے ذرعے فتنۂ ارتداد سے بچنے کا مکمل حل ہے۔ لیکن ساتھ میں زناکاری وبدکاری سے بچنے کے متعلق جتنی زیادہ احتیاطی تدابیر اپنانے کا اسلام نے آپس میں حکم دیا ہےاس سے کہیں زیادہ احتیاط غیر مسلموں اور اور مشرکوں سے اپنانا ہوگا۔

تبھی جاکر ہم اس تباہی سے بچ سکتے ہیں ۔اسلام میں زنا کاری وبدکاری سے بچنے کا نسخۂ کیما اللہ رب العزت نے قرآنِ مقدس میں ارشاد فرمایا:۔

وَقُلْ لِلْمُؤمِنِیْنَ یَغُضُوْا مِنْ اَبْصَارِھِمْ وَیَحْفَظَوْا فَرُوْجَھُمْ ذٰلِکَ اَزْکیٰ لَھُمْ اِنَّ اللہَ خَبِیْرٌ بِمَا یَصْنَعُوْنَ وَقُلْ لِّلْمُؤمِنٰتِ یَغْضُضْنَ مِنْ اَبْصَارِھِنَّ وَیَحْفَظْنَ فُرُوْجَھُنَّ وَلَا یُبْدِیْنَ زِیْنَتَھُنَّ اِلَّا مَاظَھَرَ مِنْھَا وَلْیَضْرِبْنَ بِخُمُرِھِنَّ عَلیٰ جُیُوْبِھِنَّ

ترجمۂ کنز الایمان: مسلمان مردوں کو حکم دو اپنی نگاہیں کچھ نیچی رکھیں اور اپنی شرم گاہوں کی حفاظت کریں یہ ان کے لیے بہت ستھرا ہے بے شک اللہ کو ان کے کاموں کی خبر ہے۔ اور مسلمان عورتوں کو حکم دو اپنی نگاہیں کچھ نیچی رکھیں اور اپنی پارسائی کی حفاظت کریں اور اپنا بناؤ سنگار ظاہر نہ کریں ۔

زنا کے قریب بھی جانے سے منع وَلَاتَقْرَبُوْا الزِّنیٰ اِنَّہٗ کَانَ فَاحِشَۃً وَّسَآءَ سَبِیْلًاترجمۂ کنزالایمان: اور بدکاری کے پاس نہ جاؤ بے شک وہ بے حیائی ہے اور بہت ہی بُری راہ اس آیتِ کریمہ میں بدکاری اور زناکاری سے بچنے کا حکم دیا گیا ہے۔

چاہیے کہ آدمی زنا سے بلکہ اس کے لوازمات و اسباب سے بھی بچتا رہے تاکہ اس کا گناہ سے بچنا آسان ہو۔

زنا کے اسباب نو ہیں

بے پردہ عورتو ں کا اجنبی لوگوں میں چلنا پھِرنا
اجنبی سے خلوت میں بیٹھنا ،ملنا جُلنا
بھڑکیلا ۔فینشی لباس پہن کر اجنبی کے سامنے آنا
مخلوط تعلیم
فلم اور ڈرامے اور تصویریں دیکھنا
گانے ناچ اور طبلے سارنگی سننا
چست لباس پہننا
سُرخی پوڈر لگا کر عام محفلوں میں آنا
دکانوں میں کاروبار عورتوں کے ہاتھ میں دینا جب کہ غیر مرد بھی گاہک ہوں شریعت میں اجنبی ہر وہ شخص ہے جس سے نکاح جائز ہو

(تفسیرِ نعیمی جلد ۱۵؍ ص: ۱۶۷)

ان تمام احتیاطی تدابیر کے باوجود شامتِ نفس کی وجہ سےکسی سے زنا سرزد ہوجائے تو پھر شریعت نے اس کی سزا مقرر کی ہے اگر دونوں یعنی زانی اور زانیہ غیر شادی شدہ ہوں تو انہیں سو کوڑے مارنا ہے اور شادی شدہ ہوں تو انہیں سنگسار کرنا ہے اگر اس اسلامی قانون کو نافذ کردیا جائے تو سماج سے بہت حد تک زنا جیسی بُرائی کا خاتمہ ہوجائے گا۔

مگر چوں کہ یہاں اسلامی قانون نہ ہونے کی وجہ سے مذکورہ سزا نہیں دی جاسکتی اس لیے سماج کے لوگ مناسب سزا تجویز کریں گے اور نہ ماننے کی صورت میں سماجی بائیکاٹ کرنے کا حکم ہے تاکہ یہ بُرائی جڑ سے ختم ہو۔

اب قابلِ غور بات یہ ہے کہ جب آپسی حکم اتنا شدید ہے تو غیروں کے ساتھ کا کتنا شدید حکم ہوگا۔

یقیناً اس میں ایمان و عقیدے اور جسم و جان سب کا خطرہ ہے اس لیے اس کے سدِ باب کے لیے ہر ممکن کوشش کی جائے۔

اللہ رب العزت قوم کی بیٹیوں کو اس بلا سے محفوظ رکھے۔ آمین

از قلم : محمدعامرحسین مصباحی
رسول گنج عرف کوئلی

اخلاق حسنہ کے متعلق چالیس حدیثیں

ہمارے لیے آئیڈیل کون ہیں ؟

اتحاد کی بات کرتے ہو مسلک کیا ہے

خطرے میں کون ہے ؟

ہندی میں مضامین کے لیے کلک کریں

हिन्दी में पढ़ने क्लिक करें