دینی مدارس ہمارے سماج اور معاشرے کو کیا دے رہے ہیں

دینی مدارس ہمارے سماج اور معاشرے کو کیا دے رہے ہیں ؟

۔✒️ سرفرازاحمد قاسمی،حیدرآباد

اس وقت پوری دنیا میں چھوٹے بڑے لاکھوں مدارس اوردینی ادارے قائم ہیں ،اور شب و روز اپنی خدمات انجام دے رہے ہیں،ان اداروں کی خدمات وسرگرمیوں کادائرہ ںہت وسیع ہے ، ہمارے ملک بھارت میں بھی ہزاروں کی تعداد میں یہ مدارس قائم ہیں۔

اور اپنے اپنے حدود میں کام کررہے ہیں ، مجھے یہ لکھنے میں بالکل کوئی جھجھک نہیں ہے کہ “تحریک مدارس” یہ پوری دنیا کی سب سے بڑی تحریک ہے جو انتہائی منظم انداز میں کسی رکاوٹ کی پرواہ کیے بغیر دینی اداروں کا یہ سفر برسوں سے جاری ہے ، اوران شاء اللہ قیامت تک جاری رہے گا۔

جب یہ اتنی بڑی تحریک ہے تو اس پر وقفے قفے سے سوالات بھی کئے جاتے رہے ہیں، کچھ سوالات تووہ ہوتےہیں جو اپنوں کی جانب سے کیے جاتے ہیں اور کچھ غیروں کی جانب سے، حالاں کہ بارہا اس کا جواب دیا جاتارہا ہے۔

لیکن سوالوں کا یہ سلسلہ ابھی تک برقرار ہے،اور شاید یہ آگے بھی قائم رہے،ایسا بالکل بھی نہیں ہے کہ سوال کرنا غلط ہے بلکہ غلط یہ ہے کہ مناسب اور موزوں جواب مل جانے کے بعد بھی آدمی اپنے موقف پر قائم رہے اوراس میں کوئی تبدیلی نہیں ہو۔

ہمارے یہاں سوالات کرنے والوں کا ایک بڑا طبقہ وہ ہے جو خود کو” تعلیم یافتہ ” اور ” ماڈرن” سمجھتا ہے،اسی لیے ان کی جانب سے گاہے بگاہے تنقیدوں کی بوچھار ہوتی رہتی ہے ،کبھی وہاں کے نظام و انصرام پر تنقید کی جاتی ہے، کبھی وہاں دی جانے والی تعلیم پرسوال کھڑے کیے جاتے ہیں۔

تو کبھی وہاں پڑھنے اور پڑھانے والوں پر تیرو نشتر کی بوچھار کی جاتی ہے،ایسے میں ہمیں یہ جاننا بے حد ضروری ہوجاتا ہے کہ آخر یہ دینی مدراس کیا ہیں؟ یہ کیوں قائم کئے گئے ہیں؟ اس کا مقصد کیا ہے؟۔

اور سب سے بڑی بات یہ کہ ہزاروں اور لاکھوں کی تعداد میں یہ ادارے ہمارے سماج اور معاشرے کو کیا دے رہے ہیں؟۔

ظاہر ہے اس طرح کے سوالات اس لیے بھی اٹھائے جاتے ہیں یا “پیدا” کیے جاتے ہیں کیوں کہ ہرسال ان اداروں پر کروڑوں،اربوں روپے خرچ ہوتے ہیں اور یہ رقم کسی حکومت کی جانب سے فراہم نہیں کی جاتی ، بلکہ یہ قوم کا پیسہ ہوتاہے جو مالدار اور دولت مندوں کے علاوہ غریب ومزدور کی جانب سے فراہم کی جاتی ہے۔

ایک غریب مسلمان اپنا پیٹ کاٹ کر اور ایک ایک روپے جوڑ کر اپنے خون پسینے کی کمائی جمع کرکے ان اداروں پر خرچ کرتاہے اور بغیر کسی دنیوی لالچ اور حرص کے خرچ کرتاہے،ایسے میں اس طرح کے سوالوں کا اٹھنا کوئی بعید نہیں،

حالاں کہ ان مدارس اوراداروں کی خدمات اتنی واضح اور روشن ہیں کہ کسی سوال کی چنداں ضرورت نہیں، لیکن کچھ لوگوں کادل ہے کہ مانتا نہیں

تو آئیے آج انھیں باتوں پرغور کرتےہیں اور سب سے پہلے یہ سمجھنے کی کوشش کرتے ہیں کہ آخر یہ مدارس کیا ہیں؟۔

اور یہ کیوں قائم کئے گئے ہیں؟

ہندوستان میں جب انگریز بہادر کی آمد ہوئی تو اس وقت یہاں مسلمانوں کی حکومت تھی، انگریز بہادر ایک منظم سازش کے تحت ملک ہندوستان میں تجارت کی غرض سے داخل ہوئے۔

اورپھر رفتہ رفتہ یہاں کے سیاہ و سفید کے مالک بن بیٹھے،بھارت میں اثرورسوخ حاصل کرنے کے بعد یہاں کی ہرچیز پر قابض ہوگئے، ہندوستان کو عیسائی ملک بنانے کا منظم پلان اور منصوبہ تیارکرلیا۔

اس مشن کی تکمیل کے لیے وہ ہندوستان کے سیاسی،تعلیمی اور انتظامی امور میں مداخلت کرنے لگے،اور اپنی شاطرانہ و عیارانہ چالوں کے ذریعے کام یاب ہوتے چلے گئے ، چناں چہ جب انھوں نے ہندوستان میں اقتدار حاصل کرلیا اوریہاں کے مالک بن بیٹھے اور منصوبے کے تحت، یورپ سے عیسائی پادریوں اور مسیحیت کے مبلغین کوبلایا ۔

پھر یہاں ان پادریوں کا سیلاب امڈ آیا،شہروں سے لیکر گاؤں تک عیسائیت کاجال بچھادیا گیا اور یہ مبلغین ملک کے طول وعرض میں ہرطرف پھیل گئے،یہ لوگ صرف اپنے مذہب کے فضائل ومحاسن بیان کرنے پراکتفا نہیں کرتے تھے، بلکہ ایسا لٹریچر شائع کرنے لگے ۔

جس میں ہندوستان بھر کے مذاہب بالخصوص مذہب اسلام کی تعلیمات کامذاق اڑایا جاتا تھا،پیغمر اسلام ﷺ،مسلم بادشاہوں اور بزرگوں کی توہین وتذلیل کی جاتی تھی، یہ سلسلہ جاری تھا کہ ۶1834 میں چرچ آف انگلستان کا ایک مشہور مبلغ، ڈاکٹر سی جی فینڈر، ہندوستان آیا یہ ایک جرمن نزاد پادری تھا اور انگلش کے علاوہ عربی وفارسی دونوں زبانوں میں تقریر وتحریر پر مہارت رکھتاتھا ،اس نے اسی سال فارسی زبان(جواسوقت ہندوستان کی قومی زبان تھی)

میں اسلام کی تردید میں ایک کتاب شائع کی جس کا نام میزان الحق تھا،ایک طرف تو یہ سرگرمیاں جاری تھیں اور دوسری جانب بڑے پیمانے پر “تحریک اسکول” چلایا جارہا تھا ، بڑی تعداد میں اسکول وکالج کھولے جارہے تھے،پیسوں اور ملازمتوں کا لالچ دیکر مسلمانوں کوایسی تعلیم پانے پر مجبور کیاجانے لگا۔

ان اسکولوں میں ایسا نصاب پڑھایا جاتا تھا جس سے اسلامی عقائد پرکاری ضرب لگ سکے،1835ء میں ہی ایک تعلیمی نظام مرتب کیا گیا،لارڈ میکالے جوانگریزی حکومت کا وزیر تعلیم تھا، اس نے اپنے نئے تعلیمی نظام کو متعارف کراتے ہوئے یہ بیان جاری کیا کہ

۔”ہم اس تعلیمی نظام کے ذریعے ایک ایسی نسل تیار کرنا چاہتے ہیں جو رنگ ونسل کے لحاظ سے تو ہندوستانی ہو مگر فکرو عمل کے اعتبار سے عیسائیت کے سانچے میں ڈھلی ہو”۔

یہ تعلیمی نظام چوں کہ مسلمانوں کے مذہبی زندگی کے سخت خلاف تھا ، اسی لیے مسلمان ابھی اپنے مذہبی تشخص اورقومی شعور کو بیدار رکھنے کی کوئی مؤثر تدبیر سوچ بھی نہیں سکے تھے کہ اس دوران 1857ء کی جنگ چھڑگئی،اور مسلمانوں نے انگریزی حکومت کے خلاف علم بغاوت بلند کردیا ،

مگر اس میں ناکامی ہاتھ لگی،جسکی بے پناہ تباہ کاریوں نے دلوں کو ہیبت زدہ،دماغوں کو ماؤف اور حوصلوں کو پست کردیا،
مسلمانوں کی 800 سوسالہ اقتدار اور شان وشوکت کاخاتمہ ہوچکاتھا،مسلمان ذریعۂ معاش سے یکسر محروم کردئیے گئے،ان کی جائیدادوں کو ضبط کرلیا گیا،اوقاف کی وہ قیمتی جائیدادیں جن سے ہندوستان کی مسلم حکومت،مدارس کابھرپور تعاون کرتی تھی، ۔

اور انھیں جائیدادوں پرمدارس کا انحصار تھا،انگریزی دورحکومت میں انکو بھی ضبط کرلیا گیا، جس سے مسلمانوں کے سینکڑوں سال کا تعلیمی نظام درہم برہم اور برباد ہوگیا ،برطانوی پارلیمنٹ کے “برک” نامی ایک ممبر نے پارلیمنٹ میں اپنی جو یاد داشت پیش کی تھی۔

اس میں لکھا ہے کہ”ان مقامات میں جہاں علم کاچرچا تھا اور جہاں دور دور سے علم کے متلاشی حصول علم کے لیے آتے تھے،آج وہاں علم کا بازار ٹھنڈا پڑگیا ہے”دہلی شہر جو کئی سو برسوں سے اسلامی علوم وفنون اور تحقیق وتدقیق کا مرکزتھا ، جہاں شاہ ولی اللہ محدث دہلوی نے علم حدیث کاایک بہترین باغ لگایا تھا،۔

وہ اسی انقلاب 1857ء میں اجڑگیا اور ہزاروں علماے کرام اس میں شہید کردئیے گئے،انگریزی حکومت کی تائید وحمایت سے ملک کے طول وعرض میں “مسیحی تبلیغ” کے جوادارے قائم کیے گئے تھے ستاون کے انقلاب کے بعد اور اس میں توسیع کردی گئی،عیسائی پادری کھلے عام، بازاروں،میلوں اور عام مجمع میں اسلام اور صاحب شریعت سرکاردوعالم ﷺ پرتنقید واعتراض کرنے لگے،جسکی وجہ سے ارتداد کا بازار خوب گرم ہوگیا۔

(تفصیلات کے لیے دیکھئے،مسلمانوں کا نظام تعلیم وتربیت، مولانامناظر احسن گیلانی )۔

جب صورت حال یہ ہوگئی تو اس وقت جو علما بچ گئے تھے اب انکو اس بات کی فکر دامن گیر ہوئی کہ اگراس پرقابو پانے کی تدابیر اختیار نہ کی گئی تو ملک سے مسلمانوں کا صفایا کردیا جائے گا،کیوں کہ انگریزوں کے مقابل مسلمان ہی تھے جن سے انگریزوں نے آٹھ سو سالہ حکومت چھینی تھی،اسی لیے انگریزوں نے اپنے ظلم وستم کاخاص نشانہ مسلمانوں کو بنایا،بے شمار لوگوں کو گرفتار کیاگیا اور وحشیانہ طور پرپھانسی پر لٹکا دیاگیا،اور یہ تاثر دینے کی کوشش کی گئی کہ اب ہندوستان میں اسلام اور مسلمانوں کا کوئی مستقبل نہیںْ

لیکن خدا کی قدرت کہ بچے کھچے علما کی ٹیم نے پھرسے عزم کیا،اور اسلام ومسلمانوں کے تحفظ کے لیے سرگرم ہوگئے،اسی سرگرمی اورجدو جہد کے نتیجے میں 30 مئی ، ۶1866 پندرہ محرم الحرام،سہارن پور،یوپی کے ایک چھوٹے سے قصبہ “دیوبند” میں ، قاسم العلوم والخیرات حضرت مولانا قاسم نانوتوی نے اپنے رفقا کے ساتھ انتہائی سادگی اور بغیر کسی رسمی تقریب اور نمائش کے ایک مدرسہ یعنی ” دارالعلوم دیوبند ” کی بنیاد ڈالی،عملی طور پریہاں سے”تحریک مدارس”کا آغاز کردیا گیا۔

جس کو آج ام المدارس کہاجاتاہے،اور پوری دنیا میں جسکی ہزاروں شاخیں قائم ہیں،کوئی تصور نہیں کرسکتاتھاکہ صرف ایک استاذ اور ایک شاگرد سے شروع ہونے والا یہ ادارہ پوری دنیا میں کیسے انقلاب برپاکرے گا؟۔

لیکن اللہ کی مرضی ہے وہ جس سے چاہتا ہے اورجب چاہتاہے کام لے لیتاہے، وہ کسی کا محتاج نہیں،بانی دارالعلوم،حضرت مولانا قاسم نانوتوی جن کے پاس پہننے کے لیے ایک دو جوڑے سے زیادہ کپڑے بھی نہیں تھے،انھوں نے آخرکیوں دارالعلوم قائم کیا؟

اور کیوں اتنی بڑی تحریک چلائی؟حکیم الاسلام حضرت مولانا قاری محمد طیب صاحبؒ اس سوال کے جواب میں لکھتے ہیں کہ ” بانی دارالعلوم دیوبند،مولانا قاسم نانوتوی ” نے انگریز کے تعلیمی نظام کے مقابلے کے لیے دارالعلوم کی بنیاد ڈالی،جس کا مقصد یہ ہےکہ ہمیں اس ادارے سے ایسے نوجوان اورایسے افراد تیارکرنا ہےجو رنگ ونسل کے اعتبار سے تو ہندی وسندھی،ایرانی وافغانی اورخراسانی و ترکستانی ہوں لیکن روح وفکر کے لحاظ سے وہ اسلامی ہوں”(دیکھئے مثالی شخصیات)

اوپر کی تحریر اوراقتباس سے یہ تو سمجھ میں آگیا ہوگا کہ آخران دینی اداروں کے قیام کا مقصد کیا ہے؟ بعض لوگوں کا اعتراض یہ بھی ہے کہ مدارس اور دینی ادرے پہلے کیوں نہیں تھے اب کیوں ہیں؟ ۔

ان کے جواب کے لیے حضرت قاری صدیق احمد باندوی کا یہ اقتباس پیش خدمت ہے،وہ رقم طراز ہیں کہ”رسول اکرم ﷺ کی رحلت کے بعد اسوقت صرف مدینہ منورہ میں 6 عظیم الشان درس گاہیں تھیں۔

سب سے بڑی درس گاہ حضرت عائشہ صدیقہؓ کی تھی،آپ بہت بڑی عالمہ فاضلہ تھیں ،9 سال رسول اکرم ﷺ کی نکاح میں رہیں

حضورﷺ کی وفات کے وقت ان کی عمر 18سال تھی،اسی نو سال کے درمیان میں بڑے بڑے علوم حاصل کئے،حضرت ابو موسیٰ اشعری رضی اللہ عنہ کا بیان ہے کہ جب کبھی صحابہ کو کسی مسئلہ میں مشکل پیش آتی اور وہ حل نہ ہوتی تو حضرت عائشہ صدیقہ رضی اللہ عنھا سے دریافت کرتے توانکے پاس ضرور ان کا حل نکل آتا ،۔

دوسری درس گاہ حضرت زیدابن ثابت رضی اللہ عنہ کی تھی،آپ اتنے بڑے عالم تھے کہ جس وقت سوار ہوتے تھے تو حضرت ابن عباسؓ جیسے جلیل القدر عالم انکی رکاب تھام لیتے تھے،جس وقت ان کا انتقال ہوا اور قبر میں رکھے گئے،توابن عباس رضی اللہ عنہ نے فرمایا کہ علم یوں جاتا ہے آج علم کا بہت بڑا حصہ دفن ہوگیا،حضرت ابوہریرہؓ باوجود اپنی جلالت علمی کے فرمایا کہ آج امت کاعالم اٹھ گیاہے۔

تیسری درس گاہ حضرت ابوہریرہ رضی اللہ عنہ کی تھی جن کے پاس آٹھ سو طلبہ زیر تعلیم تھے۔
چوتھی درس گاہ حضرت جابر ابن عبداللہ رضی اللہ عنہ کی تھی،ان کا حلقہ درس خاص مسجد نبوی میں تھا۔
پانچویں درس گاہ حضرت ابوسعید رضی اللہ عنہ کی تھی۔

چھٹی درس گاہ حضرت عمررضی اللہ عنہ کے صاحب زادے حضرت عبداللہ رضی اللہ عنہ کی تھی،جنھوں نے 60برس تک حدیث کی اشاعت کی۔ اس کے علاوہ مکہ مکرمہ میں حضرت ابن عباس رضی اللہ عنہ تعلیم دیتے تھے اورعلمی تبحر کی بنا پر انکو بحرالعلوم یعنی علم کادریا کہاجاتا تھا”(ملاحظہ ہوفضائل علم والعلماء)۔

یہ بات بھی ذہن نشیں رہنی چاہیے کہ خود سرکار دوعالم ﷺ کے زمانے میں دو ادارے “دارارقم” اور”صفہ” کے نام سے قائم تھے جس کی نگرانی خودآپ ﷺ فرماتے تھے ۔ اب یہ سوال کہ مدرسہ کیا ہے؟ اس کی حقیقت کیا ہے؟۔

اس کا جواب جاننے کے لیے،مفکراسلام حضرت مولانا ابوالحسن علی میاں ندوی کا ایک معروف اقتباس یہاں کافی ہوگا،فرماتے ہیں کہ”مدرسہ سب سے بڑی کارگاہ ہے جہاں مردم گری اور مردم سازی کا کام ہوتا ہے۔

جہاں دین کے داعی اور اسلام کے سپاہی تیار ہوتے ہیں،مدرسہ عالم اسلام کا وہ بجلی گھر (پاورہاؤس) ہے جہاں سے اسلامی آبادی بلکہ انسانی آبادی میں بجلی تقسیم ہوتی ہے ، مدرسہ وہ کارخانہ ہے جہاں قلب و نگاہ ڈھلتے ہیں،مدرسہ وہ کائنات ہے جہاں سے پوری کائنات کا احتساب ہوتاہے اورپوری انسانی زندگی کی نگرانی کی جاتی ہے

جہاں کا فرمان پورے عالم پرنافذ ہے،عالم کا فرمان اس پرنافذ نہیں،اس کا تعلق براہ راست نبوت محمدی ﷺ سے ہے جوعالمگیر بھی ہےاور زندہ جاوید بھی،اس کا تعلق اس انسانیت سے ہے جو ہردم جواں ہے،اس زندگی سے ہے جو ہمہ وقت رواں دواں ہے ہردور اور ہرزمانے میں اس نے اہم رول اداکیا ہے” (ماہنامہ اذان بلال آگرہ)۔

ایک دوسری جگہ رقم فرماتے ہیں کہ “دینی مدرسے کے بارے میں میرانقطہ نظر بہت سے ان بھائیوں اور پڑھے لکھے دوستوں سے مختلف ہے جو مدرسوں سے واقفیت کا دعویٰ رکھتے ہیں ،یا اس سے تعلقات رکھتے ہیں ، میں مدرسے کو پڑھنے پڑھانے اور پڑھا لکھا انسان بنانے کا کارخانہ نہیں سمجھتا۔

میں مدرسے کی اس حیثیت کو تسلیم کرنے کےلئے تیار نہیں ہوں، میں اس سطح پرآنے کوتیار نہیں ہوں کہ مدرسہ اسی طریقہ سے پڑھنا لکھنا سکھانے یا یوں کہنا چاہیے کہ پڑھنے لکھنے کاہنر سیکھنے کاایک مرکز ہے،جیسے کہ دوسرے اسکول اور کالج ہیں۔

میں مدرسے کو نائبین رسول اور خلافت الہی کا فرض انجام دینے والے اور انسانیت کو ہدایت کا پیغام دینے والے اور انسانیت کو اپنا تحفظ وبقا کا راستہ دکھانے والے افراد پیدا کرنے والوں کا ایک مرکز سمجھتاہوں۔

میں مدرسہ کو آدم گری اورمردم سازی کا ایک کارخانہ سمجھتا ہوں،جس طرح فیکٹریاں ہوتی ہیں ،مختلف قسم کی،کوئی گن فیکٹری ہوتی ہے،کوئی شوگر فیکٹری ہوتی ہے،کوئی کسی اور قسم کی مشین ڈھالتی ہے،ہیوی الیکٹرک کے سامان پیدا کرنے کے بہت سے کارخانے ہیں۔

ہم ان کی بہت قدر کرتے ہیں،ہم انکی ملک میں ضرورت تسلیم کرتے ہیں،ہم ان کی تحقیر نہیں کرتے ،لیکن چیزوں کے مختلف درجے ہوتے ہیں،مدرسہ اس طرح کے پڑھے لکھے آدمی پیدا کرنے کا مرکز نہیں،مدرسہ ایسے لوگوں کے پیدا کرنے کا مرکز ہے جنکا ابھی آپ کے سامنے ذکر کیا گیا۔

یہ الگ بات ہے کہ مدرسہ ایسا کررہا ہے یانہیں؟اور ہرمدرسہ یہ کرنا چاہتاہے یا نہیں؟ اس کا اس اصولی بحث سے کوئی تعلق نہیں،میں مدرسے کے ایک خادم کی حیثیت سے اور مختلف مدارس سے تعلق رکھنے والے کی حیثیت سے اس بات کو تسلیم کرتاہوں کہ بہت سے مدارس یہ فرض انجام دینے سے قاصر ہیں یا قاصر ہوگئے ہیں۔

پہلے یہ فرض وہ انجام دیا کرتے تھے،اب یہ فرض وہ انجام نہیں دے رہےہیں کیوں؟لیکن مدرسے کو کیافرض انجام دینا چاہیے،مدرسہ کا فرض کیاہے؟ مدرسہ کے سپرد کونسا کام کیا گیا ہے؟” (پاجاسراغ زندگی)

درج بالا اقتباس اور اوپر کی تحریروں سے یہ تو معلوم ہوگیا کہ مدرسہ کیا ہے،اسےکیوں قائم کیاگیا ؟ اس کا مقصد کیا ہے؟ مدرسہ کس چیز کانام ہے؟۔

حضرت حکیم الاسلام قاری محمد طیب ،مدارس دینیہ کی اہمیت بیان کرتے ہوئے ایک جگہ رقم طراز ہیں کہ “آج جو مدارس ومکاتب قائم کئے جارہے ہیں ، یہ دراصل انسانی خصوصیت کو اجاگر کیاجارہا ہے،انسان کی افضلیت کو برقرار رکھنے کےلئے یہ سب کچھ کیا جارہاہے ۔

اگریہ مدارس قائم نہ کئے جائیں ،یہ جامعات قائم نہ کی جائیں اورتعلیم نہ دی جائے اورفرض کیجئے کہ تعلیم مٹ گئی توانسانیت مٹ گئی،یہ تعلیم وتعلم کاساراجھگڑا انسان کی بقاء کے لیے ہے کیونکہ یہ انکی خصوصیت ہے،دینی اداروں کاقائم ہونا یہ ایک سعادت ہے اورمبارک علامت ہے۔

یہ انسانیت کے برقرار رکھنے کا ایک اہم سلسلہ ہے یہ جتنا مضبوط ہوگا،انسانیت اتنی ہی مضبوط اور مستحکم ہوگی،جتنی نیک نیتی اوراخلاص کےساتھ تعلیم دی جائے گی اتناہی فی الحقیقت آدمیت کو اونچا بنایاجائے گا،خلاصہ یہ ہے کہ مدارس بقائے انسانیت کا اہم ذریعہ ہیں ” (ملاحظہ ہو خطبات حکیم الاسلام جلددوم)۔

بعض لوگ یہ بھی کہتے ہیں کہ مدارس کا کوئی تذکرہ قرآن وحدیث میں ہے ہی نہیں پھر کیونکر اس پر اتنی توجہ دی جاری ہے ؟اور گاؤں سے لیکر شہروں تک میں اسکا جال بچھایا جارہاہے؟۔

اس کے جواب کے لیے ہم یہاں حضرت مولانا علی میاں ندوی کا ایک اقتباس نقل کررہے ہیں، وہ فرماتے ہیں کہ”اگرپوچھا جائے کہ قرآن کریم میں سب کچھ ہے،اس میں ہرطرح کے علوم وفنون ہیں، ہرطرح کے حقائق ہیں،کیا مدارس اورجامعات کا بھی اس میں کہیں تذکرہ ہے؟۔

ایک نظر ادھر بھی

ملک میں جھوٹ اور لوٹ مار کا کاروبار کب تک چلے گا

عوام دشمن حکومت کو اقتدار سے باہر کرنا آپ کی ذمہ داری ہے

اسلام ہی سچا مذہب کیوں ؟ 

ہندوستان کی آزادی اور علامہ فضل حق خیر آبادی 

ہمارے لیے آئیڈیل کون ہیں ؟ 

قتل عام اور خطرہ والے ممالک میں بھارت دوسرے نمبر پر

ہم نےجہاں تک مطالعہ کیا کہیں نام نہیں دیکھا،نہ جامعہ کے نام سے کوئی چیز ہے اورنہ مدرسے کےنام سے،یہ مدرسے کہاں سے آئے ؟ اورکب سے آئے؟ یہ کہاں سے نکالے گئے؟ کیسے ان کو قائم کیا گیا ؟ ۔

اور یہ دانش گاہیں اورجامعات کب سےقائم ہوگیے؟۔

یہ تعلیم وتعلم کے مراکز یہ کتابوں کامطالعہ ،ان میں جو مخصوص علوم ہیں قرآن فہمی کے لیے ،حدیث کے لیے ،انکا پڑھنا ،ان میں سالہا سال لگالینا،خود کواس کے لیے وقف کر دینا اوریکسو ہوجانا ،اپنے گھروں پہ نہ کمائی کرنا اورنہ کوئی دوسرافن سیکھنا،یا کسی دوسری مشغولیت میں خودکو وقف کردینا،اسکاقرآن مجید میں کہاں ذکرآیا ہے؟۔

تو ایسے لوگوں سے ہم کہیں گے اپنے مطالعے کی بنا پراور قرآن مجید سے جو توفیق الہی سے فہم حاصل ہواہےاسکی بناپر ہم کہہ سکتے ہیں کہ اس آیت سے مراد مدارس وجامعات ہیں۔

جس کامفہوم یہ ہے اللہ تعالی فرماتاہے کہ”یہ بات تو آسان اور ممکن نہیں ہے اورہرجگہ قابل عمل نہیں ہےکہ اہل ایمان سب کے سب کھڑے ہوجائیں،اپنے سب کام کاج چھوڑدیں اوراپنے تمام مشاغل ترک کردیں لیکن ایسا کیوں نہیں ہوتا کہ ان میں سے ہرجماعت اور ہرگروہ میں سے ایک جماعت اور ایک گروہ کھڑا ہوجاتا، تاکہ وہ دین میں سمجھ حاصل کرے ،اورجب دین کاضروری علم یہ لوگ حاصل کرلیتے اورانکو علم ہوجاتا تو پھر وہ اپنی قوم کو ڈرائیں جب وہ انکے پاس واپس جائیں،تاکہ وہ لوگ احتیاط کرنے لگیں اورڈرنے لگیں”(سورہ توبہ آیت 122)۔

اس آیت میں صاف صاف دینی مدارس اور جامعات کی تعریف کی گئی ہے،اور اسکے فوائد ومقاصد کو بیان کیا گیاہے”(ملت اسلامیہ کا مقام اور پیغام)دینی اداروں اور عصری اداروں میں کیا فرق ہے ؟۔

اس پران شاء اللہ پھر کسی دوسرے موقع پر مفصل گفتگو کی جائےگی،ابھی صرف اتنا کافی ہے کہ دینی اداروں اور عصری اداروں کی تعلیم میں فرق ہے ؟۔

اور کیوں ان دونوں کے مقاصد ایک جیسے نہیں ہیں ؟ اس بارے میں حضرت مولانا حبیب الرحمن اعظمی کا ایک اقتباس یہاں پیش ہے،فرماتے ہیں کہ “ہم انگریزی پڑھنے کو بالکل منع نہیں کرتے

مگر جو طریقہ اختیار کیا گیا ہے وہ غلط ہے،ایک بچہ انگریزی پڑھتاہے تو یہ سمجھتاہے کہ یہ نماز وغیرہ تو مدرسے میں جو طالب علم پڑھتے ہیں انکا کام ہے،روزہ رکھنا انکا کام ہے،انکو ان چیزوں سے

اسلامی وضع قطع سے نہ کوئی دل چسپی ہے اور نہ وہ اپنے لیے اس کو ضروری سمجھتے ہیں ،بلکہ وہ اپنے لیے یہ ضروری سمجھتے ہیں کہ ان تعلیمات کی مخالفت کریں ، اگروہ ایسا نہیں کرتے تو اپنی نسبت سمجھتے ہیں کہ لوگ ہم کو دقیانوسی اور قدیم خیال کا آدمی تصور کریں گے،یہ ساری برائیاں ہیں ،یہ برائیاں اسکول وکالج سے تو دفع ہونے کی نہیں ،لیکن کسی مجبوری کے تحت جب ہمارے بچے ان جگہوں میں پڑھتے ہیں تو ان کی ذہنی تربیت کا انتظام کرنا چاہئے”(حیات ابوالمآثر جلد1)

اس اقتباس سے بھی آپ نے اندازہ لگایا ہوگا کہ دینی مدارس کے مقابلے عصری تعلیم گاہیں کس قدر”روشن خیالی” کی راہ پر گامزن ہیں اور وہاں پڑھنے والی ہماری اولادیں کونسی تعلیم حاصل کررہی ہیں؟۔

تعلیم کے نام پر انھیں کیا فراہم کیا جارہا ہے؟ اور انکی ذہنی تربیت کس رخ پر کی جارہی ہے ؟ اوپر جتنے بھی اقتباس نقل کئے گئے وہ سب کے سب علماے دین اور اہل علم حضرات سے متعلق ہے،کچھ لوگوں کے دل میں شاید یہ خیال بھی پیدا ہوگا کہ یہ سب تو عالموں کے خیالات ہیں،توآئیے ذرا دیکھتے ہیں کہ غیر عالم کا دینی مدارس کے بارے میں کیا موقف ہے؟۔

ایک اقتباس ہم یہاں شاعر مشرق علامہ اقبال ؒ کا نقل کررہے ہیں ،یہ وہ شخص ہیں جنھوں نے اپنی پوری زندگی میں کبھی بھی دینی ادراوں کا رخ نہیں کیا اور نہ وہاں کوئی تعلیم حاصل کی ،کالج ویونیورسٹی کی فضاء میں پلنے اور بڑھنے والے اس مفکر کی نگاہ میں مدارس اور دینی اداروں کی اہمیت کیاہے ؟۔

وہ لکھتے ہیں کہ”ان مکتبوں اور مدرسوں کو اسی حالت میں رہنے دو،غریب مسلمانوں کے بچوں کو انھیں مدارس میں پڑھنے دو،اگریہ ملا اور درویش نہ رہے تو جانتے ہو کیا ہوگا؟ جو کچھ ہو گا میں انھیں اپنی آنکھوں سے دیکھ آیا ہوں، اگر ہندوستانی مسلمان ان مدرسوں کے اثر سے محروم ہوگئے تو بالکل اسی طرح ہوگا جس طرح اندلس(اسپین)میں مسلمانوں کی آٹھ سو برس کی حکومت کے باوجود آج غرناطہ اور قرطبہ کے کھنڈرات اور الحمراء کے نشانات کے سوا اسلام کے پیروؤں اور اسلامی تہذیب کے آثار کا کوئی نقش نہیں ملتا۔

ہندوستان میں بھی آگرہ کے تاج محل اوردلی کے لال قلع کے سوا مسلمانوں کے آٹھ سو سالہ حکومت اور ان کی تہذیب کا کوئی نشان نہیں ملے گا “(دینی مدارس ماضی حال اور مستقبل)

اس مضمون کو بھی پڑھیں : کیا سری لنکا کی طرح بھارت کو بھی کنگال بنایا جارہا ہے

یہ کسی عالم اور کسی خانقاہ میں بیٹھ کر لوگوں کی رشدوہدایت کا فریضہ انجام دینے والے کسی اللہ والے کا تاثر نہیں ،یہ ایک “مسٹر” کی سوچ ہے ان کی دوراندیشی ہے اور ان کی یہ فکر ہے جنھوں نے تقریبا پوری دنیا کی سیر کی ہے اور جی بھر کر دنیا کے حالا ت سے واقفیت حاصل کی ہے،جنھوں نے کبھی کسی مدرسے کی کسی کمیٹی یااسکے کسی انتظام وانصرام میں کوئی حصہ نہیں لیا۔

لیکن اس کے بادجود ان کا یہ خیال اوران کی یہ سوچ بہت سے مسٹروں اور دینی اداروں پر طعن و تشنیع کرنے والے،ماڈن تعلیم یافتہ کہلانے والے مدارس کے”نادان دوستوں “کے لیے لائق تقلید ہے

اور لمحہِ فکریہ بھی ، جولوگ آج بھی یہ کہتے ہیں کہ دینی مدارس سے سماج اور معاشرے کا کوئی فائدہ نہیں،ان کوبند کردینا چاہیے یا مدارس کے نصاب ونظام میں تبدیلی ہونی چاہیے اور زمانے کے ساتھ ان دینی اداروں کو چلنا چاہیے، ایسے لوگوں کو باربار یہ اقتباس پڑھنا چاہیے اورغوروفکر کرنا چاہئے،کچھ لوگوں کو یہ بھی اعتراض ہے کہ اب مدارس میں پہلے جیسے علما تیار نہیں ہوتے تو پھر ان مدارس کا کیا فائدہ؟۔

مفتی اعظم ہند ،حضرت مفتی محمود حسن گنگوہی سے ایک صاحب نے(جن کے والد بڑے نیک دل تھے ) سوال کیا کہ حضرت اب پہلے جیسے علما کیوں نہیں ہوتے؟ یعنی حضرت تھانوی اور دیگر بڑےعلما کے جیسے،تو حضرت مفتی صاحب نے ان سے فرمایا کہ پہلے تو تم یہ بتلاؤ کہ تم اپنے والد کے جیسے کیوں نہیں ہو؟۔

تمہارے والد تو ایسے ایسے تھے تم ایسے کیوں نہیں؟ پھراس کے بعد فرمایا کہ جیسے پہلے استاذ ہوتے تھے ویسے ہی ان کے شاگرد ہوتے تھے،اب مجھ جیسا استاذ ہے تو شاگرد بھی مجھ جیسا ہی ہوگا ،نیز پہلے کے لوگ خون پسینہ ایک کرکے صرف جائز طریقے سے ہی پیسے کماتے تھے اورحرام سے اجتناب کرتے تھے۔

اسی خالص اورحلال کی کمائی سے اخلاص کے ساتھ چندہ دیتے تھے وہ طلبہ پر خرچ ہوتا تھا،اس لیے اس کے اثرات اچھے نمودار ہوتے تھے،اور بہترین علما تیار ہوتے تھے ، اوراب لوگوں میں حلال وحرام کی تمیز نہیں رہی بس مال کے پیچھے پڑے ہیں کسی طرح ملنا چاہیے گو حرام ہی ہو،اسی سے چندہ دیتے ہیں اوراگر حلال کمائی ہوتی بھی ہے تو اس میں عام طور پراخلاص نہیں ہوتا، وہی طلبہ پر خرچ ہوتاہےپس جیسا مال ویسے ہی اس کے اثرات ظاہر ہورہے ہیں”(ملفوظات فقیہ الامت جلد2)۔

اوپر کی ان سطروں سے ہمیں یہ توسمجھ میں آگیا کہ آج کےاس گئے گذرے زمانے میں مدارس ومکاتب کا وجود غنیمت ہے،ہمیں اسکی قدر کرنی چاہئے،انکی اہمیت وافادیت سے انکار کی کوئی گنجائش نہیں ،آج جب کہ ملک کے حالات ناگفتہ بہی ہوتے جا رہے ہیں ۔

دینی مدارس حکومت کے نشانے پر ہے،اورحکومت مسلمانوں کے ان اداروں کو ختم کرنے کا مکمل پلان بنا چکی ہے، ایسے میں ہماری ذمہ داری مزید بڑھ جاتی ہے کہ ہم پہلے سے زیادہ مزید قوت کے ساتھ ان اداروں کا دفاع کریں اوراس کی بقا کے لیے ہر ممکن کوشش کریں،۔

یہ ادارے ہمارے سماج اورمعاشرے کو روحانی غذا فراہم کررہے ہیں،رب کریم دنیابھر کے تمام چھوٹے بڑے اداروں کی حفاظت فرمائے۔

(مضمون نگار،معروف صحافی اورکل ہند معاشرہ بچاؤ تحریک کے جنرل سکریٹری ہیں)
sarfarazahmedqasmi@gmail.com