حقیقت کے آئینے میں قوم مسلم پر ایک نظر

تاریخ کے اوراق شاہد ہیں کہ مٹھی بھر صحابہ کرام کی جماعت پوری دنیا پر چھائی ہوئی تھی،فتح و نصرت کا الم ان کے ہاتھوں میں تھا-جس طرف رخ کرتے فتح یابی ملتی۔

آج ہم کروڑوں کی تعداد میں ہیں پھر بھی ہماری کوئی شناخت نہیں،ہماری کوئی طاقت نہیں،ہمارے اوپر یہود ونصاریٰ اس طرح ٹوٹ پڑے ہیں جس طرح بھوکے دستر خوان پر ٹوٹ پڑتے ہیں- یہ ہمیں چن چن کر کھا رہے ہیں

اور ہم ہیں کہ اپنی بے چارگی اور کمزوری پر آنسو بہا رہے ہیں- یہود ونصاریٰ مسلمانوں کو ختم کرنے کی سازش کو عملی جامہ پہنانے کے لیے ہزاروں اختلاف بھلا کر آپس میں متحد ہو سکتے ہیں

مگر افسوس صد افسوس ان مسلم حکم رانوں پر جو اپنی جان ومال کی حفاظت کی خاطر بھی بادل ناخواستہ بھی ایک جگہ جمع نہیں ہوسکتے،حرص و ہوس نے انہیں اس طرح اندھا کردیا کہ بھائیوں کے بہتے خون دیکھ کر بھی انہیں ترس نہیں آتا۔

معزز قارئین! آج ہمیں وہ وقت بھی یاد ہے- جس وقت افغانستان کے صحرا میں پتھر کی بے جان مورتی کے توڑے جانے پر ساری دنیا چیخ اٹھی تھی

اصحابِ اقتدار سے لے کر عوام وخواص تک سب نے کھلے لفظوں میں اس کی مذمّت کی تھی اسی افغانستان اور عراق کے بے گناہ بوڑھے،بچے،عورت،مرد،بیمار،تندرست، مسلمانوں کو بے دریغ قتل کئے جانے پر کوئی ٹھوس لائحہ عمل تو دور کی بات کوئی معمولی سا اقدام کرنے کے لئے بھی دنیا تیار نہ تھی۔

اور مسلم ممالک بھی ہاتھ پر ہاتھ دھرے بیٹھے ہوئے تھے

میں یہ پوچھنا چاہتا ہوں کہ کیا اس وقت مسلمانوں کے خون کی قیمت کیا اس پتھر سے کم تھی جس کے سینے میں نہ دھڑکتا ہوا دل اور نہ ہی کسی کے لیے ہم دردی کا جذبہ

کیا صحابہ کرام کی زندگی میں بھی کوئی ایسی تاریخ ملتی ہے کہ ایک بھائی کو بے گناہ قتل کیا جائے اور دوسرا دیکھتا رہے؟

ہر گز نہیں بلکہ ان میں سے اگر کسی کی ایک کے پاؤں میں کانٹا چبھتا تو دوسرا اس کی چبھن کو دل میں محسوس کرتا- آپ نے پڑھا ہوگا کہ جنگ یرموگ میں ایک صحابی زخموں سے چور ہو کر زمین پر گر پڑے شدت تشنگی سے مغلوب ہو کر پانی مانگا

ایک شخص پانی لے کر پہنچے ہی تھے کہ دوسری جانب سے العطش کی آواز آئی سنتے ہی فرمایا کہ پہلے انہیں پلاؤ ان کے قریب گئے ابھی گلاس لبوں تک پہنچا بھی نہ تھا کہ تیسری طرف سے بھی العطش کی آواز آئی اسی طرح سات آوازیں آئیں اور ساتوں کے پاس پانی کا پیالہ لے جایا گیا اور سب اپنے بھائی کی پیاس بجھانے کی خاطر اپنی پیاس نہ بجھا کر جام شہادت نوش فرمالیا اور پانی کا پیالہ ایسے ہی رہ گیا۔

ذرا اس واقعے سے اندازہ لگائیے ہماری زندگی اور ان کی زندگی میں کتنا فرق ہے ہم ہیں کہ اپنے بھائی کا حق مارنے اور مروانے پر تلے ہوئے ہیں اور وہ ایسے لوگ تھے کہ اپنی جان دے کر دوسرے کی جان کی حفاظت فرمایا کرتے تھے۔

ان کے اندر محبت تھی، جذبہ اخلاص تھا ہمدردی اور اجتماعیت تھی جس کے ذریعے ہر مشکل سے مشکل کام آسانی سے حل فرمایا کرتے تھے اور آج یہ چیزیں ہم میں موجود نہیں۔ اگر آج بھی یہ چیزیں ہمارے اندر موجود ہو جائیں تو پھر ہم کل کی طرح کام یاب ہو سکتے ہیں۔

ذرا آپ اپنے ہاتھ کی ان پانچوں انگلیوں کو ہی دیکھیں انہیں اگر آپ جدا جدا کھول کر رکھتے ہیں تو ایک کمزور سے کمزور انسان آپ کے ہاتھوں کی ان پانچوں انگلیوں کو توڑنا چاہے تو الگ الگ توڑ سکتا ہے۔

مگر آپ انہیں پانچوں انگلیوں کو ملا کر ایک مٹھی باندھ لیتے ہیں تو پھر ایک طاقتور انسان بھی آپ کی کسی انگلی کو آسانی کے ساتھ کوئی تکلیف نہیں پہنچا سکتا۔

ایک بڑی طاقت کو جس طرح منتشر کرکے شکست دے سکتے ہیں اسی طرح چند کمزوروں کو متحد کر کے ایک عظیم قوت بن کر ابھر سکتے ہیں۔

متحد ہو تو بدل ڈالو نظام قدرتمنتشر ہو تو مرو شور مچاتے کیوں ہوایک حدیثِ مبارکہ کےراوی حضرت ابو موسیٰ اشعری رضی اللّٰہ عنہ ہیں وہ فرماتے ہیں کہ رسول اللّٰہ صلی اللّٰہ تعالیٰ علیہ واٰلہٖ وسلّم نے اپنی انگلیوں میں انگلیاں پھنسا کر رکھتے ہوئے فرمایا،،ایک مومن دوسرے مومن کے لیے ایسی عمارت ہے جس کا ایک حصہ دوسرے کو مضبوط کرتاہے۔

جس طرح ایک انگلی دوسری انگلی کی طاقت اور گرفت مضبوط کرنے کا ذریعہ ہے۔

ایک دوسری حدیث پاک میں رسول اللہ صلی اللّٰہ علیہ وسلم ارشاد فرماتے ہیں: سارے مسلمان ایک جسم کی طرح ہیں اگر اس کی آنکھ دکھتی ہے تو سارے جسم کو تکلیف پہنچتی ہے

اللہ کے رسول صلی اللّٰہ تعالیٰ علیہ واٰلہٖ وسلم نے مسلمان کو ایک جسم قرار دیتے ہوئے اپنی امت کو بتلا دیا کہ اگر دنیا کے کسی خطے میں مسلمان کو تکلیف پہنچے تو دوسرا مسلمان محسوس کرے۔

کاش یہ قوم ایک دھاگے میں پیروئے ہوئے تسبیح کے دانے کے ماند ہوتی تو پوری دنیا اسے تسبیح کی طرح گلے کا ہار بنا کر ہاتھوں ہاتھ لیےہوتی اور فلک بوس عمارتیں ان کی عظمتوں کے ترانے گاتیں

تحریر: افتخاراحمد قادری برکاتی

کریم گنج،پورن پور،ضلع،بھیت،مغربی اتر پردیش