تنویر القرآن میں عشق رسول کی گل کاریاں ایک مطالعہ

تنویر القرآن میں عشق رسول کی گل کاریاں ایک مطالعہ

از : مفتی محمد ایوب مصباحی

ترجمہ نگاری خود مشکل ترین فن ہے کہ اس میں عبارت کے سیاق سباق کو سمجھنا، عبارت کا باہمی ربط وضبط پیش نظر رکھنا، عبارت کی روح سے آگاہ ہونا حد درجہ ناگزیر ہے۔ پھر الفاظ کا ذخیرہ بھی وافر مقدار میں فراہم ہو۔ اور قرآن پاک کا ترجمہ کرنا انتہائی دشوار کہ اس کا بامحاورہ اور موزوں وسلیس ترجمہ کرنے کے لیے قطعی طور پر ١٥/علوم وفنون پر کامل دسترس درکار ہے۔ جیساکہ “زبدۃ الاتقان فی علوم القرآن مترجم ص: ٣٥٨/ فرید بک اسٹال لاہور” میں ہے: “اسے لغت، نحو، صرف، اشتقاق، معانی، بیان، بدیع، قراءت، عقائد، ناسخ و منسوخ، اصول فقہ،اسباب نزول وقصص، فقہ، حدیث۔ ان چودہ علوم متداولہ میں ید طولی ہونا چاہیے۔ اور پندرہواں علم وہبی یا لدنی بھی اسے مفوض ہو۔ (ملخصا) تب کہیں جاکر ترجمہ قرآن کی سعادت سے سرفراز ہواجاسکتاہے۔

پھر نظم نگاری کس قدر سنگلاخ وادی سے گزرنے کا نام ہے! کہ اس میں مذکورہ تمام چیزوں کے رعایت کے باوجود قافیہ اور ردیف کا بھی خیال رکھنا ضروری ہے۔ ان سب میں بھی اشکل واصعب واشد قرآن کا منظوم ترجمہ کرنا ہے۔ اس میں بیک وقت شاعر رعایت قافیہ وردیف، افہام وتفہیم مراد، ترجمہ بمقتضاے عبارت، الفاظ کا زیر وبم، احتراز تنقیص الوہیت ورسالت، تطبیق معانی بآیات قرآنی، تسہیل وتشکیل ترجمہ وغیرہ جیسے مسائل سے دوچار ہوتاہے۔

مولانا کیف الحسن قادری مارہروی قابل مدح و ستائش ہیں کہ انھوں نے قرآن مع کنز الایمان اور معتبر تفاسیر کا منظوم ترجمہ وتفسیر کا حسین گلدستہ قوم کو پیش کیا یہ کوئی آسان کام نہیں، بلکہ “ایک آگ کا دریا ہے اور ڈوب کے جانا ہے” کی مثل ہے۔ اللہ تعالی قبول عام وخاص فرماۓ! آج ہماری مطالعاتی میز پر “تنویر القرآن منظوم ترجمہ وتفسیر” ہے جس میں بے شمار مقامات پر عشق رسالت کی گلکاریاں منتثر ہیں۔ جنھیں یک جا کرنے کی حتی المقدور ہم کوشش کریں گے۔ قارئین آپ بھی پڑھیں اور فرحت وانبساط کے دامن میں سما جائیں۔ محبت کا تقاضا یہ ہے کہ محبوب کا نام ادب سے لیا جائے اس میں کوئی شک نہیں کہ اللہ تعالی کو اپنے پیارے حبیب صلی اللہ علیہ وسلم سے بے پناہ محبت ہے۔ اور ہر جگہ اس نے آپ کا نام ادب سے پکارا ہے۔مثلا اللہ تعالی نے کہیں آپ کو “یایھا المزمل” کہا۔

تو کہیں “یایھا المدثر” کہیں “طٰہٰ” کے لقب سے تو کہیں یٰسین وغیرہ کے لقب سے یاد فرمایا۔ اور جب بھی آپ کو یاد کیا تو خطاب عزت سے سرفراز کیا۔ اس میں اس پر بھی دلیل ہے کہ محبوب کو ہمیشہ ادب و تہذیب کے دائرے میں خطاب کیا جاۓ اور یہ بھی کہ ادب سے نام لینا محبت کی علامت اور نشان ہے۔ اور یہ بھی معلوم ہوجاتا ہے کہ اللہ تعالیٰ کو اپنے محبوب صلی اللہ علیہ وسلم سے بے پناہ محبت و الفت ہے مزید برآں اگر محبوب پر کسی قسم کا ظلم و ستم ہو تو محبت کا تقاضا یہ ہے کہ اس کا دفاع کیا جائے اور محبوب کی تسکین خاطر کی جاۓ ۔ جیسا کہ “تنویر القرآن” میں مولانا کیف الحسن قادری نے بڑے اچھے اسلوب میں اس کو بیان کیا۔ لکھتے ہیں:ع اے رسول مجتبی! تم کو نہ وہ غمگیں کریں، کفر کی جانب ہے بڑھتے رہنے سے مطلب جنھیں جس گھڑی محبوب کو خالق نے فرمائی ندا تو خطاب عزت اس کے واسطے مختص کیا آپ کی تسکین خاطر کو کہا: ہاں،اے حبیب! آپ کا ناصر ہوں، رحمت آپ سے میری قریب کفر میں جلدی اگر کرتے ہیں اصحاب نفاق کام ہے پھیلانا جن کا، انتشار و افتراق آپ ان کے کفر کے اطوار سے غمگیں نہ ہوں

کافروں کے ساتھ ان کے پیار سے غمگیں نہ ہوں

( تفسیر النسفی، الجزء الاول، ص: ٤٤٦)

(تنویر القرآن، منظوم ترجمہ وتفسیر ، ج:٢، ص: ٢٩٥)

جس کا حامی ہو خدا اس کو مٹا سکتا ہے کون؟ عشق و محبت کا تقاضا یہ ہے کہ محب اپنا سب کچھ اپنے محبوب پر قربان کردے، اور ہر قسم کے شر و فساد سے بچا کر اس کی حفاظت کرے، اسے پورا پروٹیکشن مہیا کرے، اس کے لیے تمام تر حفاظتی اقدامات اور تدابیر اختیار کرے۔ایسا ہی پروردگار عالم نے کیا کہ اپنے محبوب سرور دوجہاں صلی اللہ علیہ وسلم کو سیکیورٹی عطا کی۔ در اصل منصوبے اور عزائم جس قدر اہم اور بڑے ہوتے ہیں اس کے دشمن بھی اسی معیار کے ہوتے ہیں۔ ہمارے آقا صلی اللہ علیہ وسلم کو دعوت وارشاد حق اور تبلیغ دین متین کے مشن کے ساتھ مبعوث کیا گیاجو نہایت اہم ہے۔

تو دشمن بھی ابلیس لعین ہوا جس نے آپ کے مشن کو روکنے کی حتی الامکان کوشش کی۔ اور پھر یہود بے بہبود کی دشمنی بھی سب سے بڑھ کر تھی۔

“لتجدن اشد الناس عداوۃ للذین آمنوا الیہود” جس پر ناطق وشاہدہے ۔ انھوں نے بھی آپ پر مظالم کے پہاڑ ڈھانے میں کوئی کسر نہ اٹھا رکھی، کبھی ندوہ میں آپ کے قتل کا منصوبہ بنایا گیا، کبھی طائف کی سنگلاخ وادی میں آپ کی نعلین مبارک کفار و مشرکین کی سنگ باری کے باعث خون سے لبریز ہوۓ۔ تو اللہ تعالی نے اس کے جواب میں کفار ناہنجار کے ظلم و ستم سے آپ کی حفاظت وصیانت اپنے ذمہ کرم پر لی۔

اور ارشاد فرمایا: “یایھا الرسول بلغ ما انزل الیک من ربک وان لم تفعل فمابلغت رسالتک واللہ یعصمک من الناس ان اللہ لایھدی القوم الکفرین۔ (مائدہ، آیت:٦٧) ترجمہ: اے رسول! پہنچادو جو کچھ اترا تمھیں تمھارے رب کی طرف سے اور ایسا نہ ہو تو تم نے اس کا کوئی پیام نہ پہنچایا اور اللہ تمھاری نگہبانی کرے گا لوگوں سے بے شک اللہ کافروں کو راہ نہیں دیتا۔ (کنز الایمان)

قارئین! اللہ تعالی کا اپنے محبوب سے محبت کا یہ انداز کہ آپ کو ہر طرح کی حفاظت عطا کیترجمہ میں آپ نے جسے ملاحظہ کیا_ تعجب خیز اور دل چسپ ہے۔ اب مولانا کیف الحسن قادری نے اپنے منظوم ترجمہ وتفسیر ” تنویر القرآن “میں جس گوناگوں تفسیری رنگ سے اس کو ہم آہنگ کیا ہے اور جس قدر جاں فشانی اور عرق ریزی سے اس میں عشق رسالت کی گل کاری کی ہے وہ کافی حیرت انگیز اور قابل دید ہے ۔ قارئین! آپ بھی اسے ملاحظہ فرمائیں، اور اپنے ایمان کو جلا بخشیں۔ فرماتے ہیں: ع پیش فرمادو من وعن اے امام الانبیا! اور تمھارے دل میں پیدا ہو نہ اندیشہ ذرا اور بچاۓ گا تمھیں کفار سے رب علا جو ارادہ رکھتے ہیں یکسر تمھارے قتل کا (تفسیر الماوردی، الجزء الثانی، ص: ٥٣)

(تنویر القرآن منظوم ترجمہ وتفسیر،ج: ٢،ص:٣١٦)

سر کٹاتے ہیں ترے نام پہ مردان عرب یہ انداز بھی کتنا نرالا ہے کہ صحابہ کرام آقاے کریم صلی اللہ تعالی علیہ وسلم کی خاطر راتوں رات پہرہ دیتے تھے اور کبھی آپ پر کوئی آنچ نہیں آنے دی بلکہ ہمارا ایمان تو یہ ہے کہ ہر کوئی آپ کا خواستگار اپنی زبان حال سے یہی کہتا ہوگا!

ع کروں تیرے نام پہ جان فدا نہ ایک جاں دو جہاں فدا نہیں دو جہاں سے بھی جی بھرا کروں کیا کروڑوں جہاں نہیں ہر کوئی پروانہ نثار اپنی جان قربان کرنے کو تیار ہے بلکہ آپ کے اندر ہی اس قدر کشش اور جاذب تھ! !!کہ جو دیکھتا وہ آپ کا شیدائی ہوجاتا۔ جیسا کہ اعلی حضرت الشاہ امام احمد رضا خان فاضل بریلوی نے فرمایا: ع

حسن یوسف پہ کٹی مصر میں انگشت زناں

سر کٹاتے ہیں ترے نام پہ مردان عرب

صحابہ کرام رضوان اللہ تعالی علیھم اجمعین ابتداے اسلام میں حضور صلی اللہ علیہ وسلم کی حفاظت کرتے، راتوں میں پہرہ دیتے۔ یہ صحابۂ کرام کی اپنے آقا سے غایت درجہ محبت ہے۔ پھر اللہ تعالی نے جب آپ کی حفاظت کا ذمہ لے لیا تو حضور سرور کائنات صلی اللہ علیہ وسلم نے تمام پہرہ داروں کو چھٹی دے دی۔ مولانا کیف الحسن قادری صاحب نے اپنے منظوم ترجمہ و تفسیر “تنویر القرآن ” میں اس کی تصویر کشی اور نظم نگاری میں خوب گل کاریاں کیں، فرماتے: ع آپ کا پہرہ دیا جاتا تھا دوران سفر جاگتے تھے آپ کی خاطر صحابہ رات بھر جب خدا نے آپ پر نازل اس آیت کو کیا تو شہ کون و مکاں نے ختم پہرہ کردیا پہرہ داروں سے کہاں حاجت تمھاری اب نہیں ہے نگہباں میرا ہر صورت الہ العالمیں

(سنن الترمذی، ج:٤، ص:١١٢، المستدرک للحاکم، ج: ٤، ص: ١٦٢)

(تنویر القرآن منظوم ترجمہ وتفسیر، ج:٢، ص:٣١٦)

نبی سے عداوت اور دشمنی روزی گھٹنے کا ایک سبب! نبی سے بغض و عداوت سے روزی گھٹ جاتی ہے۔ جیسا کہ ابھی آپ ملاحظہ کریں گے۔ واضح رہے ہمارا عنوان دراصل یہ ہے کہ “تنویر القرآن میں عشق رسالت کی گل کاریاں” لیکن ہم یہاں اس کی جانب مخالف کو بھی بیان کررہے ہیں اس لیے کہ ضابطہ ہے “تعرف الاشیاء باضدادھا” یعنی چیزیں اپنی ضدوں سے پہچانی جاتی ہیں۔ تو اس مخالف سمت کے بیان سے عشق رسالت کا گوشہ نہایت نمایاں اور واضح ہو جاۓ گا۔ نبی سے دشمنی رکھنے سے روزی گھٹادی جاتی ہے یہ بھی اللہ کی اپنے محبوب سے کمال محبت کی علامت ہے۔ کہ پروردگار عالم کو یہ برداشت نہیں کہ کوئی اس کے محبوب سے کدورت رکھے، آپ سے عداوت اور بغض رکھے اور اللہ تعالی اسے خوش خرم دیکھے۔ لہذا دشمنی رکھنے کے باعث اللہ تعالی اس کی روزی کم کردیتاہے تاکہ وہ اس حرکت سے باز آجاۓ۔ روزی کے گھٹنے کے اسباب کیا ہیں ؟ اور ان کا تدارک کیاہے؟ قارئین! اگر اس پر سیر حاصل بحث چاہیں تو ہماری تحریر : “روزگار کی عدم فراہمی اسباب و تدارک کے چند اصول ” کا مطالعہ کرسکتے ہیں۔

یہ “سہ ماہی پیغام شریعت دہلی اکتوبر، نومبر، دسمبر ٢٠٢٠ء” بنام “فلاح و نجات نمبر” میں طبع ہوچکاہے۔ علاوہ ازیں گوگل ویب سائٹ :” ہماری آواز ” وغیرہ پر بھی وزٹ کیا جاسکتاہے۔ مزید بر آں ہماری کتاب “رزق کی تنگی: اسباب وحل” میں بھی عنقریب پڑھ سکیں گے جو ابھی تشنہ طباعت ہے۔ منجملہ رزق کی تنگی کے اسباب میں سے ایک سبب یہ ہے کہ پیغمبر سے بغض و عداوت رکھنے سے بھی رزق میں تنگی آجاتی ہے جس کا مفہوم مخالف یہ ہوتاہے کہ نبی سے محبت و عشق تضعیف رزق میں ممد و معاون ثابت ہوگا۔ اسی کو مولانا کیف الحسن صاحب قادری نے اپنی تصنیف لطیف وعجیب “تنویر القرآن منظوم ترجمہ وتفسیر ” میں بیان کیا۔ اور اس ترجمہ میں خوب عشق رسالت کی جلوہ سامانیوں سے مخطوطے کو آراستہ کیا اس میں خوب عشق نبوی گے گلشن کے پھول کھلاۓ ۔ فرماتے ہیں: “تفسیر :آیت :٦٤ دشمنان مصطفی کی روزیاں کم ہوگئیں: اور یہودی بولے بستہ ہاتھ ہے اللہ کا یعنی آمادہ بخالت پر ہے خلاق علا اس جگہ مذکور ہے یہ قول بن عباس کا آل اسرائیل کا طبقہ بہت خوش حال تھا جب انھوں نے کی شہ کون و مکاں سے دشمنی تو یکایک ان کی روزی کم سے کمتر ہوگئی۔

(تنویر القرآن منظوم ترجمہ وتفسیر، ج:٢، ص: ٢١٤)